Ninyɛne Mɔɔ Yɛfa Yɛkilehile
1. Kɛzi Kilisiene edwɛkpakavolɛma le kɛ dwinvolɛma ɛ?
1 Dwinvolɛma fa adwinli ninyɛne ngakyile di gyima. Bɛfa bie mɔ bɛdi gyima wɔ mekɛ titili bie mɔ anu, yɛɛ bɛta bɛfa bie mɔ noko bɛdi gyima. Dwinvolɛma mɔɔ bɛbe la lɛ adwinli ninyɛne ɛhye mɔ bie wɔ bɛ ninyɛne nu dahuu na yemɔ a bɛkola bɛfa bɛdi gyima kpalɛ a. Baebolo ne maa Kilisienenli ko biala anwosesebɛ kɛ ɔva ɔ nwo ɔwula daselɛlilɛ ɛhɔlɛ nu na ɔyɛ “gyimayɛvolɛ mɔɔ ɛnze ye gyima nwo nyiane” a. (2 Tem. 2:15) Debie mɔɔ hyia kpalɛ wɔ yɛ ninyɛne nu la a le boni? Yemɔ a le Nyamenle Edwɛkɛ ne, debie titili mɔɔ yɛdua zo yɛmaa ‘menli bayɛ ɛdoavolɛma’ la. (Mat. 28:19, 20) Yemɔti, ɔwɔ kɛ yɛbɔ mɔdenle ‘yɛkilehile Nyamenle nɔhalɛ edwɛkɛ ne kpalɛ.’ Noko ninyɛne gyɛne mɔɔ yɛfa yɛkilehile la wɔ yɛ ninyɛne nu mɔɔ ɔwɔ kɛ Kilisienema kɔsɔɔti sukoa kɛ bɛbava bɛali gyima kpalɛ bɛahilehile menli nɔhalɛ ne.—Mrɛ. 22:29.
2. Ninyɛne titili mɔɔ yɛfa yɛkilehile la a le boni mɔ?
2 Ninyɛne Titili Mɔɔ Yɛfa Yɛkilehile La: Saa ɛye Baebolo ne ɛsie ahane a, nzɔne bieko a ɔwɔ kɛ yɛfa yɛkilehile a? Debie titili ko mɔɔ yɛfa yɛkilehile Baebolo nu nɔhalɛ ne la a le Duzu A Baebolo Ne Kilehile Amgba A? Saa yɛ nee sukoavo bie sukoa buluku ɛhye wie a, yɛfa “Bɛzie Bɛ Nwo Wɔ Nyamenle Ɛhulolɛ Ne Anu” yɛboa ye yɛmaa ɔfa Baebolo ngyinlazo ɔbɔ ye ɛbɛla dahuu. Yemɔti ɔwɔ kɛ yɛnwu kɛzi bɛfa mbuluku nwiɔ ɛhye bɛdi gyima la kpalɛ. Eza ɔwɔ kɛ yɛfa brohyua bie mɔ yɛboka yɛ ninyɛne nwo. Edwɛkpa Mɔɔ Vi Nyamenle Ɛkɛ! boka ninyɛne mɔɔ yɛfa yɛbɔ Baebolo ɛzukoalɛ bo la anwo. Saa menli mɔɔ bɛngola kenga kpalɛ anzɛɛ bɛka aneɛ mɔɔ yɛnlɛ nwolɛ mbuluku dɔɔnwo anzɛɛ nwolɛ mbuluku fee la wɔ yɛ azɛlɛsinli ne anu a, yɛbahola yɛava Tie Nyamenle anzɛɛ Tie Nyamenle Na Nyia Dahuu Ngoane brohyua ne yɛali gyima. Buluku titili mɔɔ yɛdua zo yɛmaa awie mɔ nwu ahyehyɛdeɛ ne la a le Nwane Mɔ A Ɛlɛyɛ Gyihova Ɛhulolɛdeɛ Ɛnɛ A? Eza ɔwɔ kɛ yɛfa vidio mɔɔ boa ɔmaa yɛyɛ menli ɛdoavolɛma mɔɔ le kɛ Duzu Ati A Ɔwɔ Kɛ Ɛsukoa Baebolo Ne A?, Duzu A Bɛyɛ Ye Wɔ Belemgbunlililɛ Asalo Ɛkɛ A?, yɛɛ Does God Have a Name? la noko yɛdi gyima.
3. Nzɔne a Yɛ Belemgbunlililɛ Gyima mɔɔ bara nzinlii la baboa yɛ yeamaa yɛayɛ a?
3 Yɛ Belemgbunlililɛ Gyima ne mɔ mɔɔ bara nzinlii la baboa yɛ yeamaa yɛanwu kɛzi yɛbava yɛ mbuluku titili mɔɔ wɔ yɛ ninyɛne nu yɛali gyima kpalɛ la. Saa yɛbɔ mɔdenle yɛfa ninyɛne ɛhye mɔ yɛdi gyima kpalɛ a, ɛnee yɛlɛtie sunsum nu folɛdulɛ ɛhye: “Nea ɛ nwo boɛ na nea wɔ ngilehilelɛ ne boɛ. Kɔ zolɛ yɛ ɛhye mɔ, ɔluakɛ saa ɛyɛ ye zɔhane a, ɛkɛlie ɛ nwo nee bɛdabɛ mɔɔ bɛtie wɔ la ngoane.”—1 Tem. 4:16.