Sukoa Nolobɔlɛma Mɔɔ Bɔ Mɔdenle La
Nolobɔlɛma mɔɔ bɔ mɔdenle wɔ asafo ne anu la sonle bolɛ maa yɛ. Bie mɔ ɛva nɔhalɛlilɛ ɛzonle Gyihova ɛvolɛ dɔɔnwo. Bie mɔ noko nyianle anyuhɔlɛ wɔ daselɛlilɛ nu la ɛtɛkyɛle. Nolobɔlɛma ɛhye mɔ ɛnwu kɛzi Gyisɛse ɛlɛkile Kilisiene asafo ne adenle wɔ awieleɛ mekɛ ɛhye anu ɔlua edwɛkɛhanlɛ nee ɛdoavolɛyɛlɛ gyima ne mɔɔ yemaa yenyia anyuhɔlɛ la azo. (Mat. 28:19, 20) Ɔlua gyima ɛhye mɔɔ bɛfa bɛ nwo bɛwula nu la ati, “tumi bedevinli” ne boa bɛ ɔmaa bɛgyinla ngyegyelɛ nee sɔnea biala anloa. (2 Kɔl. 4:7) Yɛbahola yɛazukoa ninyɛne dɔɔnwo yɛavi nolobɔlɛma ɛhye mɔ mɔɔ bɔ mɔdenle la ɛkɛ. Saa bɛmaa bɛ nwolɛ adenle a, bɛ nye balie nwo kɛ bɛbahilehile awie mɔ mɔɔ bɛzukoa la. (Edw. 71:18) Yemɔti ɔwɔ kɛ yɛkpondɛ nwolɛ adenle yɛsukoa dɔɔnwo yɛfi bɛ ɛkɛ. Kɛ ɔkɛyɛ na yɛayɛ ɛhye ɛ?
Wɔ Daselɛlilɛ Nu: Amaa nolobɔlɛma fofolɛ anzɛɛ mɔɔ bɛnlɛ anwubielɛ kpalɛ la anyia anyuhɔlɛ wɔ daselɛlilɛ nu la, bɛbahyia ndetelɛ. Saa bɛnea kɛzi nolobɔlɛma mɔɔ bɛbɔ mɔdenle la di daselɛ la a, ɔbaboa bɛ kpalɛ. (Nea edwɛkɛ “Kɔ Zɔ Fa Wuluwuluyɛlɛ Ka Edwɛkɛ Ne,” mɔɔ wɔ February 15, 2015, Ɛzinzalɛ Arane ne anu la, ɛdendɛkpunli ne mɔɔ tɔ zo nsa wɔ edwɛkɛtile “Boa Nolobɔlɛma Mɔɔ Bɛle Fofolɛ” abo la.) Kɛzi menli ɛhye mɔ mɔɔ ɛ nee bɛ ɛlua daselɛlilɛ nu la ɛboa wɔ ɛ?
Ka kile nolobɔlɛnli mɔɔ bɔ mɔdenle la kɛ ɛ nee ye bahɔ daselɛlilɛ. Saa nolobɔlɛnli ne le wuleravolɛ a, ɛbahola wɔayɛ wɔ Baebolo ɛzukoalɛ ne ko wɔ ye sua nu. Saa bɛwie Baebolo ɛzukoalɛ ne a, maa nolobɔlɛnli ne ɛha ninyɛne mɔɔ ɔnwunle ye nee nzuzulɛ mɔɔ ɔbaboa wɔ la.
Nyia Mekɛ Maa Bɛ: Nyia mekɛ maa nolobɔlɛma mɔɔ bɔ mɔdenle la amaa wɔanwu bɛ kpalɛ. To ɛsalɛ fɛlɛ bɛ nuhua ko wɔ bɛ abusua ɛzonlenlɛ ne abo na bizebiza ye edwɛkɛ. Saa ɔle wuleravolɛ a, ɛbahola wɔayɛ ngyehyɛleɛ wɔamaa bɛayɛ abusua ɛzonlenlɛ ne wɔ ye sua nu ɔ? Maa ɔha kɛzi ɔnwunle nɔhalɛ ne la. Nyilalɛ boni mɔ a yenyia a? Anyuhɔlɛ boni a yenwu ye wɔ bɛ ɛkɛ ne a? Nzɔne ati a Gyihova ɛzonlenlɛ maa ɔ nye die a?
Da ndelebɛbo ali, mmakpondɛ dɔɔnwo ɛfi bɛ ɛkɛ. Asolo mɔɔ nolobɔlɛma mɔɔ ɛzonle ɛhyɛ la biala kola yɛ wɔ daselɛlilɛ nu a kɛmɔ ɔde wɔ yɛ afoa nu la. (Wulo. 12:6-8) Bie mɔ ɛnyi na bie a ɔnrɛmaa bɛnrɛnyia mekɛ dɔɔnwo bɛnrɛmaa yɛ. Noko ɔlua Gyihova mɔɔ bɛzonle ye nɔhalɛ nu la ati, yɛbahola yɛazukoa ninyɛne dɔɔnwo yɛavi bɛ ɛkɛ.