Fa “Sukoa Mɔɔ Wɔ Nyamenle Edwɛkɛ Ne Anu La” Bɔ Adawubɔlɛ Bo
1. Buluku fofolɛ boni a yɛbava yɛali gyima wɔ daselɛlilɛ nu a?
1 Bɛyɛ ɛleka bie mɔɔ wɔ New World Translation fofolɛ ne mɔlebɛbo la buluku ekyi bie wɔ Nzema nu mɔɔ ɔ ti ne se “Sukoa Mɔɔ Wɔ Nyamenle Edwɛkɛ Ne Anu La.” Kɛzi yɛbahola yɛava ɛhye yɛali gyima wɔ mekɛ mɔɔ yɛlɛsiezie yɛ nwo yɛamaa daselɛlilɛ la ɛ? Ɔbahola yeaboa yɛ yeamaa yɛabɔ adawubɔlɛ bo ɔluakɛ bɛhyehyɛ Baebolo edwɛkɛ adile mɔɔ ngɛlɛlera wɔ ɔ bo la wɔ nu kɛmɔ Reasoning buluku ne de la.
2. Kɛzi yɛbahola yɛava “Sukoa Mɔɔ Wɔ Nyamenle Edwɛkɛ Ne Anu La” yɛali gyima wɔ daselɛlilɛ nu ɛ?
2 Ɛbahola wɔava kpuyia 8 ne na wɔaha kɛ: “Yɛlɛfa mekɛ ekyii yɛakpɔlakpɔla menli mɔɔ wɔ kpalɛ ye azo la ɔluakɛ menli dɔɔnwo biza bɛ nwo kɛ, ‘Asoo Nyamenle a maa yɛnwu amaneɛ a?’ [Wɔ azɛlɛsinli bie mɔ anu, ɔbayɛ kpalɛ kɛ ɛbava kpuyia ne wɔahile suamenle ne.] Kɛ wɔ adwenle se wɔ ɛ? [Maa ɔbua.] Baebolo ne fa nwolɛ mualɛ kpalɛ maa.” Kenga ngɛlɛlera mɔɔ bɛhwe adwenle bɛhɔ zo la ko anzɛɛ mɔɔ bo la wɔ Baebolo ne anu na kilehile nu. Saa suamenle ne anye die nwolɛ a, ɛbahola wɔava kpuyia 20 ne mɔ mɔɔ wɔ mukenye ne anu la wɔahile ye na wɔamaa yeakpa ko mɔɔ ɛsia ɛba a bɛbazuzu nwo la. Anzɛɛ ɛbahola wɔava buluku mɔɔ yɛfa yɛsukoa Baebolo ne mɔɔ ka dɔɔnwo ɔfane edwɛkɛ mɔɔ bɛzuzule nwolɛ la anwo la wɔamaa ye.
3. Kɛ ɔkɛyɛ na yɛava “Sukoa Mɔɔ Wɔ Nyamenle Edwɛkɛ Ne Anu La” yɛali gyima wɔ azɛlɛsinli mɔɔ nuhua menli ne ɛnle Keleseɛnema la anu ɛ?
3 Kpuyia 4 nee 13 kɔdwu 17 bahola aboa kpalɛ wɔ mekɛ mɔɔ ɛlɛdi daselɛ wɔ azɛlɛsinli mɔɔ menli ne ɛnle Keleseɛnema anu la. Kɛ neazo la, ɛbahola wɔakpa kpuyia 17 ne na wɔaha kɛ: “Yɛlɛfa mekɛ ekyii yɛakpɔla mbusua mɔɔ wɔ ɛke la. Ɛ nee me bayɛ adwenle kɛ mbusua yia ngyegyelɛ dɔɔnwo ɛnɛ ɔ? [Maa ɔbua.] Agyalɛma dɔɔnwo ɛnwu kɛ edwɛkɛ ɛhye mɔɔ nrɛlɛbɛ wɔ nu la ɛboa bɛ kpalɛ: Ɔwɔ kɛ “yelɛ biala noko di ɔ hu eni.” [Ɔngyia kɛ ɛbaha kɛ edwɛkɛ ɛhye wɔ Ɛfɛsɛsema 5:33. Saa ɛ nee raalɛ ɛlɛtendɛ a, yemɔ ɛbaha edwɛkɛ mɔɔ wɔ Ɛfɛsɛsema 5:28 la.] Ɛnea a agyalɛma fa folɛdulɛ zɔhane yɛ gyima a, ɔbaboa bɛ ɔ?”
4. Saa ɛ nee awie mɔɔ ɔnle Keleseɛnenli la bɔ adawu wie a, duzu a ɛbahola wɔayɛ a?
4 Bɛwie bɛ adawubɔlɛ ne a, yɛ ngyehyɛleɛ maa bɛdoa zo mekɛ fofolɛ. Bie a bɛbahola bɛazuzu ngɛlɛlera mɔɔ wɔ kpuyia mɔɔ ɛvale ɛlile gyima la anu la anwo mekɛ fofolɛ. Wɔ mekɛ kpalɛ nu, maa suamenle ne ɛnwu kɛ ɛnyianle edwɛkɛ ngɛnlɛma ne mɔɔ ɛ nee ye suzu nwo la wɔ Baebolo ne anu. Gyinla adawu mɔɔ bɛlumuale bɛbɔle nee kɛzi ahenle bu Baebolo ne la azo fa buluku mɔɔ ɛnea a ɔ nye balie nwo la maa ye.—Nea edwɛkɛ mɔɔ vea December 2013 Yɛ Belemgbunlililɛ Gyima ne anu la.