Daselɛlilɛ Ayia Mɔɔ Di Bɛ Bodane Nwo Gyima
1. Bodane boni a daselɛlilɛ ayia di nwolɛ gyima a?
1 Mekɛ bie, Gyisɛse nee ye ɛdoavolɛma 70 ne yiale kolaa na bɛahɔ bɛabɔ edwɛkɛ ne nolo. (Luku 10:1-11, NW) Ɔmanle bɛ anwosesebɛ na ɔhakyele bɛ kɛ ɔtɛkale bɛ ngome, emomu “egyinli menle ne,” Gyihova, a ɛlɛkile bɛ adenle a. Eza ɔmanle bɛ adehilelɛ mɔɔ ɔbaboa bɛ yeamaa bɛayɛ gyima ne la na ɔhyɛle bɛ “nwiɔ nwiɔ.” Ɛnɛ, ayia mɔɔ yɛyɛ kolaa na yɛahɔ daselɛlilɛ la di bodane ko ne ala anwo gyima—ɔmaa anwosesebɛ, ɔboa na ɔsiezie yɛ.
2. Mitini nyɛ a ɔwɔ kɛ bɛfa bɛyɛ daselɛlilɛ ayia ne a?
2 Yɛ daselɛlilɛ ayia ne le mitini 10 mɔɔ kɔ 15. Bɛkyɛ ekpunli ne mɔ, azɛlɛsinli ne na bɛyɛ asɔne. Kɛkala bɛlɛyɛ nzenzaleɛ wɔ nu. Ɔvi April mɔɔ ɔkɔ la, daselɛlilɛ ayia ne tendenle bayɛ mitini nnu mɔɔ kɔ mitini nsuu. Noko saa bɛkpɔne debiezukoalɛ na bɛfa bɛtoa zo a, ɔnle kɛ ɔdwu ɔluakɛ mediema ne mɔ ɛlumua ɛdie ɛdendɛlɛ mɔɔ gyi Ngɛlɛlera ne azo la. Saa ayia ne yɛ sikalɛ a, ɔbaboa bɛ muala yeamaa bɛava mekɛ dɔɔnwo bɛahɔ daselɛlilɛ. Bieko, saa dahuu adekpakyelɛma anzɛɛ nolobɔlɛma bie mɔ bɔle daselɛlilɛ bo kolaa na bɛara ayia ne abo a, ɔnle kɛ bɛsɛkye bɛ mekɛ dɔɔnwo.
3. Amaa daselɛlilɛ ayia ne aboa nolobɔlɛma la, kɛzi ɔwɔ kɛ bɛyɛ ye ɛ?
3 Ɔwɔ kɛ bɛyɛ daselɛlilɛ ayia ne kpalɛ amaa yeaboa nolobɔlɛma. Wɔ asafo dɔɔnwo anu, saa daselɛlilɛ ekpunli ne mɔ yia wɔ ɛleka ngakyile a ɔboa ɔtɛla kɛ bɛ muala bɛbabɔ nu bɛayia ɛleka ko la. Ɛhye baboa yeamaa bɛadwu ɛleka mɔɔ bɛbayia la nee azɛlɛsinli ne anu ndɛndɛ. Ɔmaa bɛkola bɛkyɛ nolobɔlɛma ndɛndɛ yɛɛ ɔnrɛmaa ɔnrɛyɛ se kɛ ekpunli zo neavolɛma ne anye bahɔ bɛ ekpunli ne anu amra anwo zo. Mgbanyima eku ne bahola azuzu bɛ ɛkɛ ne tɛnlabelɛ ne anwo na bɛanwu mɔɔ ɔbaboa kpalɛ la. Ɔwɔ kɛ bɛkyɛ mediema ne mɔ na bɛmaa bɛ azɛlɛsinli kolaa na bɛayɛ asɔne sikalɛ bɛakpɔne.
4. Duzu ati a ɔnle kɛ yɛbu daselɛlilɛ ayia kɛ nwolɛ ɛngyia kɛ debiezukoalɛ mɔɔ ɛha la ɛ?
4 Nwolɛ Hyia Kɛ Asafo Nyianu Gyɛne Mɔɔ Ɛha La: Kɛmɔ bɛyɛ daselɛlilɛ ayia ne bɛmaa menli mɔɔ bɛbahɔ daselɛlilɛ la ati, tɛ asafo ne anu amra amuala a bara a. Ɛhye ɛngile kɛ ɔwɔ kɛ yɛbu ye kɛ nwolɛ ɛngyia kɛ debiezukoalɛ mɔɔ ɛha la. Kɛmɔ ayia mɔɔ ɛha la de la, daselɛlilɛ ayia ne le nziezielɛ mɔɔ Gyihova ɛyɛ amaa yeaboa yɛ yɛamaa yɛadwenle yɛakpondɛ adenle mɔɔ yɛdua zolɛ a yɛkɛhulo yɛ nwo ngoko ngoko, na yɛkɛyɛ gyima kpalɛ la. (Hib. 10:24, 25) Yemɔti ɔwɔ kɛ ahenle mɔɔ banlea zolɛ la siezie ɔ nwo kpalɛ amaa mɔɔ bɛbazuzu nwo la ali Gyihova eni na yeaboa menli mɔɔ kɛra la. Saa ɔbayɛ boɛ a, ɔwɔ kɛ nolobɔlɛma kɔsɔɔti mɔɔ bɛbahɔ daselɛlilɛ la bɔ mɔdenle kɔ bie.
Ɔnle kɛ yɛbu daselɛlilɛ ayia kɛ nwolɛ ɛngyia kɛ asafo debiezukoalɛ mɔɔ ɛha la
5. (a) Kɛ ɔkɛyɛ na ɛzonlenlɛ gyima zo neavolɛ ne atoto daselɛlilɛ ayia nwo ngyehyɛleɛ ne boɛ ɛ? (b) Kɛzi ɔwɔ kɛ adiema raalɛ nea daselɛlilɛ ayia zo ɛ?
5 Kɛzi Ahenle Mɔɔ Banlea Zo Baziezie Ɔ Nwo La: Amaa awie aziezie ɔ nwo kpalɛ amaa debiezukoalɛ foa bie la, ɔwɔ kɛ ɔ sa ka ye gyimalilɛ ne ndɛ. Zɔhane ala a daselɛlilɛ ayia ne mɔ de a. Saa daselɛlilɛ ekpunli ne mɔ yia wɔ ɛleka ngakyile a, ekpunli zo neavolɛma anzɛɛ bɛ boavolɛma a banlea ayia ne azo a. Noko saa asafo ne amuala bɔ nu yia a, ɛzonlenlɛ gyima zo neavolɛ ne bakpa awie yeamaa yeanlea zolɛ. Ɛzonlenlɛ gyima zo neavolɛma bie mɔ yɛ menli mɔɔ banlea daselɛlilɛ ayia ne mɔ azo la anwo ngyehyɛleɛ maa bɛ na bɛfa bie bɛbɔ nolobɔlɛ ɛleka ne. Ɔwɔ kɛ ɛzonlenlɛ gyima zo neavolɛ ne nea boɛ na ɔnwu kɛ saa ayia ne mɔ baboa a, ɔgyi kɛzi menli mɔɔ bɛbanlea zolɛ la kilehile na bɛsiezie bɛ nwo la azo. Saa ɔdwu mekɛ ne bie na asafo nu kpanyinli, sonvolɛ anzɛɛ adiema nrenya mɔɔ bɛzɔne ye mɔɔ fɛta la ɛnle ɛkɛ mɔɔ ɔbanlea zo a, ɔwɔ kɛ ɛzonlenlɛ gyima zo neavolɛ ne kpa adiema raalɛ mɔɔ bɛzɔne ye mɔɔ fɛta la maa ɔnea zo.—Nea edwɛkɛ “Saa Adiema Raalɛ A Nea Zo A.”
6. Nzɔne ati a ɔhyia kɛ ahenle mɔɔ banlea zo la siezie ɔ nwo kpalɛ ɛ?
6 Saa yɛnyia gyimalilɛ wɔ Teokelase Ɛzonlenlɛ Sukulu anzɛɛ Ɛzonlenlɛ Nyianu ne anu a, yɛmaa yɛ nye bolo nwo na yɛsiezie ye kpalɛ. Yɛ nuhua ekyi bie ala a kendɛ toonwo na yɛlɛkɔ debiezukoalɛ a yɛabɔ ɔ bo kɛ yɛdwenle mɔɔ yɛbaha la anwo a. Zɔhane ala a ɔwɔ kɛ yɛbu daselɛlilɛ ayia mɔɔ yɛbanlea zo la a. Kɛkala mɔɔ yɛbayɛ ayia ne sikalɛ la, ɔhyia kɛ yɛsiezie yɛ nwo kpalɛ amaa yeaboa mediema na yɛawie mekɛ nloa. Saa ɛbaziezie ɛ nwo kpalɛ a, eza ɔwɔ kɛ ɛdumua ɛnwu azɛlɛsinli mɔɔ bɛbayɛ nu gyima la.
7. Ninyɛne boni mɔ a ahenle mɔɔ banlea zo la bahola aha nwolɛ edwɛkɛ a?
7 Edwɛkɛ Mɔɔ Bɛbazuzu Nwo: Kɛmɔ asolo ɛleka biala nee ye tɛnlabelɛ la ati, akɛlɛ nɔhavo ne ɛtɛfale ɛdendɛlɛ kɛlata mɔɔ bɛbanlea zo bɛayɛ daselɛlilɛ ayia biala la ɔtɛmanle. Ɛlɛka ne mɔɔ se “Bɛbahola Bɛazuzu Ɛhye Mɔ Bie Anwo Wɔ Daselɛlilɛ Ayia Bo” la ka ninyɛne mɔɔ yɛbahola yɛaha la bie. Fane dɔɔnwo ne ala ayia ne bayɛ adawubɔlɛ. Ɔdwu mekɛ ne bie a, bɛbahola bɛayɛ yɛkile mɔɔ bɛziezie ye kpalɛ anzɛɛ bɛbaye jw.org ne azo video ko mɔɔ fɛta la. Saa ahenle mɔɔ banlea zo la ɛlɛsiezie ɔ nwo a, ɔwɔ kɛ ɔdwenle edwɛkɛ mɔɔ ɔbamaa menli mɔɔ bɛbahɔ daselɛlilɛ kenle zɔhane anwosesebɛ na yeaboa bɛ la anwo.
Saa ahenle mɔɔ banlea zo la ɛlɛsiezie ɔ nwo a, ɔwɔ kɛ ɔdwenle edwɛkɛ mɔɔ ɔbamaa menli mɔɔ bɛbahɔ daselɛlilɛ kenle zɔhane anwosesebɛ na yeaboa bɛ la anwo
8. Duzu a bɛsuzu nwo wɔ Folɛ nee Molɛ daselɛlilɛ ayia bo a ɔbaboa kpalɛ a?
8 Kɛ neazo la, wɔ Folɛ biala, nolobɔlɛma dɔɔnwo fa Ɛzinzalɛ Arane ne nee Awake! maa. Menli dɔɔnwo mɔɔ kɔ daselɛlilɛ wɔ Folɛ la ɛngɔ bie wɔ dapɛne ne anu, yemɔti bie a ɔbayɛ se kɛ bɛbahakye mɔɔ bɛzukoale ye wɔ bɛ Abusua Ɛzonlenlɛ ne abo mɔɔ fane kɛzi bɛbava magazine ne mɔ bɛamaa anwo la. Yemɔti ɔbayɛ kpalɛ kɛ ahenle mɔɔ banlea zo la badi edwɛkɛ mɔɔ yɛbaha la neazo ne mɔɔ wɔ Yɛ Belemgbunlililɛ Gyima ne anzi la anu. Bɛbahola bɛazuzu kɛzi bɛbalua amaneɛbɔlɛ, edwɛkɛ bie mɔɔ ɛzi anzɛɛ ɛnwomenlelielɛ bie azo bɛava magazine bɛamaa anzɛɛ kɛzi bɛbayɛ ngyehyɛleɛ bɛamaa siakɔkpɔla la anwo. Saa nolobɔlɛma mɔɔ wɔ ayia ne abo la bie mɔ ɛva magazine ne bie ɛmaa a, ahenle mɔɔ ɛlɛnea ayia ne azo la bahola amaa bɛava nzuzulɛ sikalɛ bɛamaa anzɛɛ bɛaha anwubielɛ sikalɛ. Ahenle mɔɔ banlea ayia ne azo wɔ Molɛ la bahola ayɛ zɔhane ala wɔ mbuluku mɔɔ yɛbava yɛamaa wɔ siane ne anu la anwo. Bɛkola bɛfa mbuluku ɛhye mɔ, Edwɛkpa, Tie Nyamenle yɛɛ Baebolo ne Kilehile ne mɔɔ bɛfa bɛyɛ Baebolo ɛzukoalɛ la bɛmaa mekɛ biala, yemɔti ahenle mɔɔ banlea zo la bahola aha kɛzi yɛbava mbuluku ɛhye mɔ bie yɛamaa la anwo edwɛkɛ sikalɛ wɔ daselɛlilɛ ayia bo.
9. Saa bɛlɛbɔ nolo titile bie wɔ dapɛne awieleɛ a, nzɔne a bɛbahola bɛazuzu nwo a?
9 Saa asafo ne babɔ nolo titile bie wɔ dapɛne ne awieleɛ a, ɔwɔ kɛ ahenle mɔɔ banlea zo la ka kɛzi bɛbava magazine fofolɛ ne mɔ bɛaboka nwo bɛamaa anzɛɛ mɔɔ ɔwɔ kɛ bɛyɛ wɔ mekɛ mɔɔ awie anye kɛlie edwɛkɛ ne anwo la. Eza ɔbahola yeaha anwubielɛ bie mɔ mɔɔ si nvasoɛ mɔɔ wɔ nolobɔlɛ ɛhye mɔ azo la.
10, 11. Duzu ati a ɔwɔ kɛ nolobɔlɛma siezie bɛ nwo amaa daselɛlilɛ ayia ne ahɔ zo ɛ?
10 Kɛzi Nolobɔlɛma Baziezie Bɛ Nwo La: Ɔwɔ kɛ nolobɔlɛma noko boa maa daselɛlilɛ ayia ne kɔ zo. Saa bɛdumua bɛdua bɛ abusua ɛzonlenlɛ ne azo bɛsiezie bɛ nwo bɛmaa daselɛlilɛ ayia ne a, bɛbanyia edwɛkɛ bɛ nee nolobɔlɛma gyɛne abɔ nwolɛ adawu. Anwoziezielɛ kpalɛ noko bahyia kɛ ɛbalie magazine nee mbuluku kolaa na wɔahɔ ayia ne abo amaa bɛ muala bɛahola bɛavi ɛkɛ ne ndɛndɛ mɔɔ bɛnzɛkye mekɛ a.
11 Eza ɔwɔ kɛ ɛdwu daselɛlilɛ ayia ne abo ndɛ kolaa na bɛabɔ ɔ bo. Nɔhalɛ nu, yɛbɔ mɔdenle kɛ yɛbadwu debiezukoalɛ ne amuala abo ndɛ. Noko saa yɛka amozi wɔ daselɛlilɛ ayia bo a, ɔkola ɔgyegye kpalɛ. Adenle boni azo? Ahenle mɔɔ banlea zo la suzu ninyɛne bie mɔ anwo kolaa na yeahyɛ ekpunli ne anu amra. Saa menli ekyi bie ba a, ɔbahola yeamaa bɛ muala bɛayɛ gyima wɔ azɛlɛsinli mɔɔ bɛtɛyɛle nuhua gyima kpalɛ la anu. Saa bie mɔ diale na bɛara daselɛlilɛ ayia ne na ɛkɛ ne mɔɔ kɔ bɛ azɛlɛsinli ne anu la wale a, ɔbahola yeamaa bɛ nee nolobɔlɛma mɔɔ lɛ kale la ahɔ. Saa basabasayɛlɛ kɔ zo wɔ azɛlɛsinli ne anu a, ɔbamaa mediema mrenya nee mraalɛ ahɔ anzɛɛ mediema mrenya abikye ɛleka mɔɔ mediema mraalɛ ɛlɛyɛ gyima la. Ɔbamaa nolobɔlɛma mɔɔ le wuleravolɛma la ayɛ gyima wɔ ɛleka mɔɔ ɔnle awoka anzɛɛ bɛnrɛvo ɛbolɔnsam zo la. Nolobɔlɛma mɔɔ le fofolɛ la nee mɔɔ lɛ anwubielɛ la bɛayɛ gyima. Noko saa nolobɔlɛma ka amozi a, ɔwɔ kɛ bɛkyɛ ye fofolɛ amaa bɛanyia awie mɔ bɛ nee bɛ ahɔ. Nɔhalɛ nu, ɔdwu mekɛ ne bie a tɛnlabelɛ bie maa yɛka amozi. Noko akee saa ɔyɛ yɛ subane a, ɔwɔ kɛ yɛbiza yɛ nwo saa kɛmɔ yɛmbu daselɛlilɛ ayia ne kpalɛ anzɛɛ kɛmɔ yɛnlumua yɛnziezie yɛ nwo la ati a yɛka amozi a.
12. Saa mediema bie mɔ a ɛta ɛ nee bɛ kɔ daselɛlilɛ a, duzu a ɔwɔ kɛ ɛsuzu nwo a?
12 Nolobɔlɛma bahola ayɛ bɛ ngyehyɛleɛ kolaa na ayia ne abɔ ɔ bo anzɛɛ bɛbahola bɛamaa bɛ awie mɔɔ bɛ nee ye bahɔ a. Saa ɛta ɛ nee awie mɔ yɛ ngyehyɛleɛ kɔ daselɛlilɛ a, ɛbahola ‘wɔabuke wɔ munli nu’ ɛ nee nolobɔlɛma gyɛne alua mɔɔ tɛ agɔnwolɛma ko ne ala a dahuu ɛ nee bɛ kɔ ɔ? (2 Kɔl. 6:11-13) Ɛbahola ɛ nee nolobɔlɛnli fofolɛ ayɛ gyima amaa wɔaboa ye wɔamaa yeanyia anyuhɔlɛ wɔ ye ngilehilelɛ nu ɔ? (1 Kɔl. 10:24; 1 Tem. 4:13, 15) Tie adehilelɛ biala mɔɔ bɛbava bɛamaa la nee adehilelɛ mɔɔ fane ɛleka mɔɔ bɛbabɔ ɔ bo bɛayɛ gyima la boɛ. Saa bɛwie ayia ne a, bɛmmakakyihakyi menli mɔɔ bɛvale bɛ bɛmanle bɛ la na bɛhɔ azɛlɛsinli ne anu ndɛndɛ.
13. Saa awie biala yɛ ye afoa nu ɛdeɛ a, kɛzi daselɛlilɛ ayia baboa yɛ ɛ?
13 Mɔɔ ɛdoavolɛma 70 ne mɔɔ Gyisɛse zoanle bɛ la kpɔnenle daselɛlilɛ la, ‘bɛvale fɛlɛkolilɛ bɛziale’ bɛrale. (Luku 10:17) Nɔhalɛ nu, ayia mɔɔ Gyisɛse nee bɛ yɛle kolaa na bɛahɔ la boale bɛ. Ɛnɛ, daselɛlilɛ ayia bahola aboa yɛ zɔhane ala. Saa awie biala mɔɔ bara daselɛlilɛ ayia bo la yɛ ye afoa nu ɛdeɛ a, ɔbamaa yɛ anwosesebɛ, yeaboa na yeaziezie yɛ yeamaa ‘yɛali aleɛabo amra daselɛ.’—Mat. 24:14.