Maa Ɛ Nye Ɛbolo Di Gyisɛse Anwo Daselɛ

Saa yɛze kɛzi yɛka Gyisɛse anwo nɔhalɛ ne yɛkile awie mɔ la a, ɔmaa yɛbɔ yɛ nwo mɔdenle. Nɔhalɛ diedi mɔɔ yɛlɛ la gyi Gyisɛse anwo zo. (Ɛfɛ. 2:20) Saa ɔnle nu a anrɛɛ yɛnlɛ anyelazo biala. (Gyi. 4:12) Yemɔti, ɔwɔ kɛ awie biala nwu gyima mɔɔ Gyisɛse yɛ maa Nyamenle bodane ba nu la. Bɛva adalɛ ngilehilelɛ bɛbɛlɛbɛla menli dɔɔnwo. Wɔannea a, menli ɛhye mɔ ɛnrɛnyia nyilalɛ mɔɔ Nyamenle ɛbɔ ɛwɔkɛ kɛ menli mɔɔ die Gyisɛse di banyia la bie. Mɔdenle mɔɔ yɛbabɔ ye nɔhalɛ ne anwo la baboa yɛ yeamaa yɛaboa ahonlekpalɛma yɛamaa bɛanwu Gyisɛse kpalɛ, agɔnwolɛvalɛ mɔɔ ɔ nee Nyamenle lɛ nee gyima mɔɔ ɔdi ɔmaa Nyamenle bodane ba nu la. Bɔ mɔdenle kilehile Gyisɛse anwo nɔhalɛ ne wɔ Ngakyelɛlilɛ mekɛ ɛhye anu.