Edwɛne Fofolɛ Mɔɔ Yɛbava Yɛazonle!
1 Wɔ Watch Tower Bible and Tract Society of Pennsylvania ɛvolɛ nyianu ne mɔɔ bɛyɛle ye October 4, 2014 la abo, bɛvale kpɔkɛ mɔɔ bɛbɔ kɛ bɛzia bɛyɛ yɛ edwɛne buluku ne fofolɛ la bɛdole gua. Ɛnee ɔle anyelielɛ edwɛkɛ kpalɛ! Bɛhakyele tievolɛma amuala kɛzi yɛ Belemgbunlililɛ edwɛne ne mɔ hyia wɔ yɛ ɛzonlenlɛ nu la.—Edw. 96:2.
2 Wɔannea a ɛbaha kɛ, ‘Nzɔne ati a ɔhyia kɛ bɛsia bɛyɛ yɛ edwɛne buluku ne fofolɛ a?’ Ninyɛne mɔɔ ɔti bɛlɛyɛ ye zɔhane la zonle. Mɔɔ lumua la, yɛneɛnlea Ngɛlɛlera ne anu ndelebɛbo mɔɔ yɛlɛ la anu dahuu, na yemɔ bahola aha edwɛne ne anu edwɛkɛ ne mɔ. (Mrɛ. 4:18) Bieko: Bɛvale edwɛkɛ nee ɛdendɛsinli dɔɔnwo mɔɔ bɛvale bɛlile gyima wɔ yɛ edwɛne buluku ne anu la bɛvile New World Translation dɛba ne anu. Yemɔti ɔwɔ kɛ bɛkakyi zɔhane edwɛkɛ ne mɔ bɛmaa ɔ nee New World Translation fofolɛ ne anu edwɛkɛ ne yɛ ko. Kɛmɔ ɔwɔ kɛ bɛyɛ nwolɛ gyima dɔɔnwo na yɛ sa aha ye kɛzi yɛkpondɛ ye la ati, bɛzile kpɔkɛ kɛ bɛfa edwɛne fofolɛ bie mɔ bɛaboka mɔɔ wɔ ɛkɛ la anwo.
3 Asoo ɔwɔ kɛ yɛkendɛ yɛmaa bɛyɛ edwɛne buluku fofolɛ ne kolaa na yɛava edwɛne fofolɛ ne mɔ yɛali gyima ɔ? Kyɛkyɛ. Yɛfa anyelielɛ yɛabɔ bɛ amaneɛ kɛ, wɔ siane dɔɔnwo mɔɔ li yɛ nyunlu la anu, bɛbava edwɛne fofolɛ ne bɛagua yɛ Web site, jw.org ɛleka ne. Saa bɛye edwɛne fofolɛ ne a, bɛbayɛ ngyehyɛleɛ bɛamaa yɛado bie wɔ Ɛzonlenlɛ Nyianu ne awieleɛ. Bɛbahɛlɛ nwolɛ “edwɛne fofolɛ.”
4 Kɛzi Yɛbazukoa Edwɛne Fofolɛ Ne Mɔ La: Edwɛne fofolɛ ɛzukoalɛ bahola ayɛ se kpalɛ. Noko kɛmɔ edwɛndolɛnli ne yɛle la, yɛkpondɛ kɛ yɛto edwɛne ne bie wɔ debiezukoalɛ bo, yɛngulo kɛ yɛyɛ “koonwu.” (Edw. 30:12) Amaa wɔazukoa edwɛne fofolɛ ne la, di adehilelɛ sikalɛ ɛhye mɔ azo.
Tie edwɛne ne mɔɔ bɛva piano bɛbɔ mɔɔ bɛbava bɛagua yɛ Web site ne azo la fane dɔɔnwo. Saa ɛtie ye fane dɔɔnwo a, ɔnrɛyɛ se kɛ ɛbahakye.
Sukoa nuhua edwɛkɛ ne na bɔ mɔdenle kɛ ɛbahye wɔagua ɛ ti anu.
Akee fa nuhua edwɛkɛ ne to edwɛne ne.Yɛ ye zɔ kɔkpula kɛ ɛbanwu edwɛne ne to kpalɛ la.
Bɛva bɛ Abusua Ɛzonlenlɛ mekɛ ne bie bɛzukoa edwɛne ne mɔ kɔkpula kɛ wɔ abusua ne banwu ye to la.
5 Saa yɛbado edwɛne fofolɛ ne bie yɛadwula Ɛzonlenlɛ Nyianu ne wɔ aziane mɔɔ li yɛ nyunlu la anu a, asafo ne bɛadie mɔɔ bɛhye bɛgua milahyinli ne azo la ko. Akee tievolɛma bɛado edwɛne ne wɔ mekɛ mɔɔ milahyinli ne ɛlɛbɔ la kɛmɔ yɛyɛ ye wɔ edwɛne mɔɔ ɛha la anu la.
6 Saa ɛdwenle nwo a, ɛnwu ye kɛ edwɛne mɔɔ yɛto ye wɔ debiezukoalɛ bo la maa yɛnyia nwolɛ adenle yɛbɔ nu yɛto edwɛne yɛye Gyihova ayɛlɛ. Yemɔti ɔnle kɛ ɔyɛ yɛ subane mɔɔ saa ɔwɔ kɛ yɛto edwɛne wɔ Keleseɛne ayia bo biala a ɛnee yɛdwazo yɛvinde.
7 Adenle bieko wɔ ɛkɛ mɔɔ yɛbahola yɛalua zo yɛahile kɛ yɛ nye sɔ yɛ edwɛne nwuanzanwuanza ne a. Saa yɛkɔ nyianu a, bɛbɔ edwɛne ekyi kolaa na gyimalilɛ foa biala abɔ ɔ bo. Mediema mrenya nee mraalɛ mɔɔ bɛwɔ ewiade ye ɛleka biala mɔɔ bɛdu bɛ nwo bɛmaa la fa bɛ kodoku nu ezukoa tu adenle fane nwiɔ wɔ ɛvolɛ ne anu kɔ Patterson, New York amaa bɛahyehyɛ edwɛne mɔɔ yɛ fɛ la bɛamaa yɛava yɛazonle. Yemɔti saa ebianutɛnlavolɛ ne to ɛsalɛ fɛlɛ yɛ kɛ yɛdɛnla aze na yɛdie edwɛne ne mɔɔ edwɛndolɛma ekpunli ne ɛhyehyɛ la a, ɔwɔ kɛ yɛyɛ ye zɔ. Saa yɛyɛ ye zɔ a, ɔbaboa yɛ yeamaa yɛaziezie yɛ ahonle yɛamaa edwɛkɛ mɔɔ badoa zo la.—Ɛzela 7:10, NW.
8 Yɛbava edwɛne fofolɛ ne mɔɔ ɔ ti ne se “The Kingdom Is in Place—Let It Come!” la yɛakpɔne ɛnɛ debiezukoalɛ ne. Bɛhyehyɛle edwɛne ɛhye mɔɔ bɛdole ye wɔ kenlensa ye ɛvolɛ ayia ne abo la titile kɛ bɛfa bɛahakye Belemgbunlililɛ ne awolɛ mɔɔ yeli ɛvolɛ 100 la.
9 Amgba edwɛne fofolɛ ne mɔ le ‘ninyɛne mgbalɛ’ mɔɔ vi Gyihova ɛkɛ la bie. (Mat. 12:35a) Bɛmaa yɛva yɛzie yɛ nye zo kɛ yɛbazukoa edwɛne fofolɛ ɛhye mɔ, yɛavi yɛ ahonle nu yɛado na yɛalua zo yɛaye Gyihova yɛ Nyamenle ne ayɛlɛ kpalɛ!—Edw. 147:1.