Kɛzi Bɛyɛ Baebolo Ɛzukoalɛ Kpalɛ La
1. Ɛzonlelilɛ boni a la nolobɔlɛma anwo zo a?
1 Awie biala ɛnrɛhola ɛnrɛzonle Nyamenle kyesɛ Gyihova “twe ye.” (Dwɔn 6:44) Saa Gyihova bayɛ ye zɔhane bɔbɔ a, ɔwɔ kɛ nolobɔlɛma mɔɔ bɛyɛ Baebolo ɛzukoalɛ la yɛ bɛ afoa nu ɛdeɛ boa menli bɛmaa bɛbikye bɛ anwuma Selɛ ne. (Gye. 4:8) Ɛhye kile kɛ ɔwɔ kɛ bɛsiezie bɛ nwo. Saa yɛmaa yɛ Baebolo sukoavoma ne kenga ɛdendɛkpunli ne mɔ na yɛbiza nwolɛ kpuyia ne mɔ a, yemɔ angomekye ɛnrɛboa bɛ ɔnrɛmaa bɛnrɛde edwɛkɛ ne abo kpalɛ na bɛanyia anyuhɔlɛ.
2. Nzɔne a bavi Baebolo ɛzukoalɛ kpalɛ nu ara a?
2 Saa nolobɔlɛma bahola ayɛ Baebolo ɛzukoalɛ kpalɛ a, ɔwɔ kɛ bɛboa bɛ sukoavoma bɛmaa (1) bɛte mɔɔ Baebolo ne kilehile la abo, (2) bɛmaa bɛdie mɔɔ Baebolo ne kilehile la bɛto nu, na (3) bɛfa mɔɔ Baebolo ne kilehile la bɛdi gyima. (Dwɔn 3:16; 17:3; Gye. 2:26) Ɔbahola yealie siane dɔɔnwo na wɔaboa awie wɔamaa yeayɛ ɛhye mɔ. Noko agyakɛ ko biala mɔɔ ɔbadu la kile anyuhɔlɛ mɔɔ ɔlɛnyia ye wɔ ɔ nee Gyihova avinli agɔnwolɛvalɛ nu na yeayila ɔ nwo zo yeamaa ye la.
3. Duzu ati a kilehilevolɛma kpalɛ biza kpuyia mɔɔ maa bɛnwu awie adwenle la ɛ?
3 Adwenle Boni A Baebolo Sukoavo Ne Lɛ A?: Amaa wɔanwu ye kɛ wɔ Baebolo sukoavo ne te mɔɔ ɔlɛsukoa la abo na ɔdie ɔdi la, ɛ ngomekye mmadie edwɛkɛ ne ɛfa, maa ye adenle maa ɔdendɛ. (Gye. 1:19) Asoo ɔte mɔɔ Baebolo ne ka ye wɔ mɔɔ bɛlɛsuzu nwo la abo ɔ? Ɔbahola yeava ye edwɛkɛ yeahilehile edwɛkɛ ne anu ɔ? Kɛzi ɔte nganeɛ wɔ mɔɔ yezukoa la anwo ɛ? Asoo ɔdie ɔdi kɛ nrɛlɛbɛ wɔ mɔɔ Baebolo ne kilehile la anu? (1 Tɛs. 2:13) Asoo ɔte ɔ bo kɛ ɔwɔ kɛ ɔmaa mɔɔ ɔlɛsukoa la kakyi ye ɛbɛlabɔlɛ ɔ? (Kɔl. 3:10) Amaa yɛanyia zɔhane kpuyia ne mɔ anwo mualɛ la, ɔwɔ kɛ yɛmaa yɛ nye da ɛkɛ na yɛbiza kpuyia mɔɔ bamaa bɛahile bɛ adwenle la na yɛtie bɛ.—Mat. 16:13-16.
4. Saa ɔyɛ se kɛ sukoavo bie bade mɔɔ ɔlɛsukoa wɔ Baebolo ne anu la abo anzɛɛ ɔbava yeayɛ gyima a, duzu a ɔwɔ kɛ yɛyɛ a?
4 Fane dɔɔnwo ne ala, kɛzi menli yɛ bɛ nyɛleɛ nee kɛzi bɛdwenle la sosɔ ndinli wɔ bɛ nu mɔɔ ɔbalie mekɛ na bɛahwe bɛ nwo bɛavi nwo a. (2 Kɔl. 10:5) Na saa sukoavo ne ɛnva ninyɛne mɔɔ wɔhilehile ye la ɛnli gyima ɛ? Ɔwɔ kɛ ɛnyia abotane na ɛmaa mekɛ gua nu amaa Nyamenle Edwɛkɛ ne nee sunsum nwuanzanwuanza ne ayɛ gyima wɔ sukoavo ne ahonle nu. (1 Kɔl. 3:6, 7; Hib. 4:12) Kɛ anrɛɛ ɛbatinlitinli ɔ nwo zo la, fane dɔɔnwo ne ala saa ɔyɛ se ɔmaa sukoavo bie kɛ ɔbade Baebolo ngilehilelɛ bie abo anzɛɛ ɔbava yeali gyima a, ɔle kpalɛ kɛ ɛbahɔ edwɛkɛ fofolɛ zo. Saa yɛkɔ zo yɛnyia abotane na yɛfi ɛlɔlɛ nu yɛkilehile ye Baebolo ne a, bie a mekɛ ɛlɛkɔ la ɔbaha ye yeamaa yeayɛ nzenzaleɛ mɔɔ hyia la.