Magazine Ɛlielɛma—Boa Bɛ Maa Bɛbɔ Baebolo Ɛzukoalɛ Bo
1. Duzu ati a Gyihova ahyehyɛdeɛ ne ɛmaa nolobɔlɛma anwosesebɛ kɛ bɛkpondɛ menli mɔɔ die magazine la a?
1 Menli dɔɔnwo anye ɛnlie kɛ bɛ nee yɛ bazukoa Baebolo ne, noko bɛ nye die kɛ bɛbagenga yɛ magazine ne mɔ. Ɛhye ati, Gyihova ahyehyɛdeɛ ne ɛmaa nolobɔlɛma anwosesebɛ kɛ bɛkpondɛ menli mɔɔ die magazine la. Saa menli kenga yɛ magazine ne dahuu a, ɔmaa bɛ nye die Nyamenle Edwɛkɛ ne anwo. (1 Pita 2:2) Awieleɛ bɔkɔɔ ne, bɛ nye bahola alie debie mɔɔ bɛbagenga la anwo na yeamaa bɛalie bɛado nu kɛ bɛbazukoa Baebolo ne.
2. Kɛ ɔkɛyɛ na yɛamaa menli mɔɔ die magazine la anyelielɛ ne ayɛ kpole ɛ?
2 Gugua Nɔhalɛ Ma Ne Azo “Nzule”: Kɛ anrɛɛ ɛbava magazine ne wɔamaa suamenle ne na wɔavi ɛkɛ ne la, ɔwɔ kɛ ɛ nee ye bɔ adawu na ɛbɔ mɔdenle ɛfa ye agɔnwolɛ. Ɛhye baboa yeamaa wɔanwu tɛnlabelɛ mɔɔ ɔwɔ nu, debie mɔɔ ɔ nye die nwo yɛɛ ye diedi, na wɔava nwunu wɔadendɛ. (Mrɛ. 16:23) Siezie ɛ nwo maa ɛkpɔlalɛ ko biala. Saa ɔkɛyɛ boɛ a, twe adwenle kɔ edwɛkɛ bie mɔɔ wɔ magazine ne anu nee nwolɛ ngɛlɛlera zo sikalɛ, na gugua nɔhalɛ ma mɔɔ wɔ ye ahonle nu la azo nzule. (1 Kɔl. 3:6) Yɛ kenle biala mɔɔ ɛbakpɔla ye, buluku mɔɔ ɛbava wɔamaa ye yɛɛ edwɛkɛ nee ngɛlɛlera mɔɔ bɛbazuzu nwolɛ la anwo kɛlɛtokɛ.
3. Fane nyɛ a ɔwɔ kɛ yɛsia yɛkɔ menli mɔɔ die yɛ magazine ne la ɛkɛ a?
3 Fane Nyɛ A Ɔwɔ Kɛ Ɛsia Ɛkɔ Ɛkɛ A? Ɔwɔ kɛ siane biala ɛsia ɛkɔ na ɛfa magazine fofolɛ mɔɔ ɛra la ɛmaa menli mɔɔ die la. Noko akee, bie a wɔ tɛnlabelɛ ne nee kɛzi ahenle anye die nwolɛ la bamaa wɔazia wɔahɔ ye ɛkɛ fane dɔɔnwo. Kɛ neazo la, saa ɛfa magazine ne ɛmaa ye a, dapɛne ko anzɛɛ nwiɔ anu, ɛbahola wɔazia wɔahɔ ɛkɛ na wɔaha kɛ, “Menvale ɛke kɛ mekile wɔ debie wɔ magazine ne mɔɔ ɛliele la anu.” Ɛhye bamaa ahenle anye alie kɛ ɔbagenga nuhua edwɛkɛ bie. Saa yegenga a, ɛbahola wɔabiza ye kɛzi ɔdwenle nuhua edwɛkɛ bie anwo la na yɛ nee ye azuzu nwolɛ sikalɛ. Anzɛɛ saa ahenle anye die yɛ mbuluku ne ɛgengalɛ nwo a, ɛbahola wɔazia wɔahɔ ɛkɛ na wɔahile ye trate, brohyua anzɛɛ buluku mɔɔ yɛlɛfa yɛamaa wɔ siane ne anu la.
4. Duzu a yɛbahola yɛayɛ ɔvi mekɛ mɔɔ kɔ mekɛ la na yɛanwu ye kɛ menli mɔɔ die magazine la bahulo kɛ bɛsukoa Baebolo ne a?
4 Mmakendɛ ɛmaa suamenle ne ka kɛ ɛ nee ye ɛzukoa debie. Dumua ka kile ye. Saa dɛba ne ɔkpole kɛ ɔbazukoa Baebolo ne a, ɔvi mekɛ mɔɔ kɔ mekɛ la, ɛbahola wɔava “Baebolo Kpuyia Mɔɔ Bɛbua” mɔɔ wɔ Ɛzinzalɛ Arane ne anu la wɔahile ye na wɔanlea kɛ ɔbahulo kɛ ɔ nee wɔ bazukoa a. Bie a ɛbahola ɛ nee ye abɔ debiezukoalɛ bo wɔ ye anlenkɛ ne anloa. Noko akee, saa wɔangola ɛ nee ye ambɔ debiezukoalɛ bo a, ɛbahola wɔahɔ zo wɔamaa ye magazine amaa anyelielɛ mɔɔ ɔlɛ la ayɛ kpole.