Ɛbahola Wɔado Ɛsalɛ Wɔavɛlɛ Awie Ɔ?

Nolobɔlɛma mɔɔ wɔ asafo dɔɔnwo anu la ɛngola ɛnyɛ dɔɔnwo wɔ daselɛlilɛ nu ɔlua anwodolɛ anzɛɛ kpanyinliyɛlɛ ti. (2 Kɔl. 4:16) Ɛbahola wɔado ɛsalɛ wɔavɛlɛ awie mɔɔ wɔ tɛnlabelɛ zɛhae anu la na ɛ nee ye ahɔyɛ Baebolo ɛzukoalɛ ɔ? Saa nolobɔlɛnli ne ɛha sua nu a, bie a ɛbahola wɔayɛ debiezukoalɛ ne wɔ ye sua nu ɛkɛ. Asoo ɛbahola wɔayɛ ngyehyɛleɛ na ɔdwu mekɛ ne bie a ɛ nee nolobɔlɛnli mɔɔ ɔnlɛ anwosesebɛ la alua nwo ahɔ daselɛlilɛ wɔ azua ekyi anu anzɛɛ bɛahɔyɛ sia kɔkpula ko anzɛɛ nwiɔ? Nolobɔlɛma mɔɔ bɛyɛ mgbanyima la lɛ anwubielɛ dɔɔnwo wɔ daselɛlilɛ nu. Yemɔti, saa ɛbɔ mɔdenle ɛ nee bɛ kɔ a tɛ bɛ ngomekye a bɛbanyia anwosesebɛ a. Ɔbaboa ɛdawɔ noko. (Wulo. 1:12) Bieko, Gyihova bayila mɔdenle mɔɔ ɛbɔ ɛda ɛlɔlɛ ali wɔ adenle ɛhye azo la.—Mrɛ. 19:17; 1 Dwɔn 3:17, 18.