Kpuyia Ɛleka
◼ Kolaa na bɛalie bɛado nu kɛ bɛzɔne nolobɔlɛnli mɔɔ bɛtɛsɔnenle ye la, kɛzi ɔwɔ kɛ ye debiezukoalɛ nee daselɛlilɛ ɛhɔlɛ yɛ ɛ?
Saa awie si kpɔkɛ kɛ bɛzɔne ye a ɔle kpɔkɛzilɛ titile mɔɔ nwolɛ hyia a. Yemɔti, kolaa na bɛalie bɛado nu kɛ bɛzɔne awie la, ɔwɔ kɛ ɔte mɔɔ Nyamenle kpondɛ kɛ ɔyɛ la abo kpalɛ. Bieko, ɔwɔ kɛ ɔmaa ɔda ali kɛ yezi kpɔkɛ kɛ ɔbava mɔɔ Nyamenle kpondɛ kɛ ɔyɛ la yeabɔ ye ɛbɛla.
Bɛha bɛhile Keleseɛnema kɛ bɛmmagyakyi nyianuhɔlɛ, yemɔti ɔwɔ kɛ nolobɔlɛnli mɔɔ bɛtɛsɔnenle ye la maa ɔda ali kɛ ɔbɔ mɔdenle ɔkɔ debiezukoalɛ. (Hib. 10:24, 25) Ɔkɔ noko a, ɔbamaa mualɛ ne bie. Ɔbahola yeara ye noko kɛ yehɛlɛ ye duma wɔ Teokelase Ɛzonlenlɛ Sukulu ne anu, ɔwɔ nuhua kɛ ɛhye ɛnle debie mɔɔ bɛkpondɛ kɛ ɔyɛ ɛdeɛ.
Bieko, kɛmɔ bɛva gyima bɛmaa Keleseɛnema kɛ bɛbɔ edwɛkpa ne nolo na bɛmaa menli ɛrayɛ ɛdoavolɛma la ati, ɔwɔ kɛ nolobɔlɛnli mɔɔ bɛtɛsɔnenle ye la kɔ daselɛlilɛ dahuu kolaa na bɛazɔne ye. (Mat. 24:14; 28:19, 20) Ɔwɔ kɛ ɔkɔ daselɛlilɛ siane nyɛ na bɛazɔne ye? Ɔfɛta kɛ bɛmaa ɔfa mekɛ dɔɔnwo ɔkile kɛ yezi kpɔkɛ kɛ ɔbabɔ mɔdenle yeahɔ daselɛlilɛ fane dɔɔnwo wɔ siane biala anu. (Edw. 78:37) Noko akee, saa ɔbɔ daselɛlilɛ bo a, ɔnle kɛ ɔkyɛ dɔɔnwo na yeafɛta kɛ bɛsɔne ye, bie a ɔbahola yeayɛ zɔ wɔ siane ekyi anu. Mekɛ nyɛ a ɔwɔ kɛ ɔfa ɔbu daselɛlilɛ nwo mgbonda a? Mɛla kyengye biala ɛnle nwolɛ. Ɔwɔ kɛ mgbanyima ne mɔ suzu kɛzi nolobɔlɛnli ko biala de la anwo na bɛfa ndelebɛbo nee adwenle kpalɛ bɛdi gyima.—Luku 21:1-4.
Mgbanyima ne mɔ (anzɛɛ azonvolɛ mɔɔ wɔ asafo mɔɔ mgbanyima anzo wɔ nu) mɔɔ nee menli mɔɔ kpondɛ kɛ bɛsɔne bɛ kɛyia la ɔwɔ kɛ kakye kɛ awie ko biala le ngakyile, na bɛfa ndelebɛbo kpalɛ bɛnea kɛ ɔfɛta kɛ bɛsɔne ye a. Ɔwɔ kɛ bɛnwu kɛ ɔlɛ ɛhulolɛ kɛ ɔbayɛ Gyihova Dasevolɛ na ɔkile kɛ ɔ nye sɔ adenle mɔɔ yenyia kɛ ɔ nee Gyihova ahyehyɛdeɛ ne balua na yeahɔ daselɛlilɛ la kpalɛ. Mgbanyima ne mɔ bade ɔ bo kɛ ɔtɛnyinle wɔ sunsum nu kpalɛ anzɛɛ ɔnlɛ anwubielɛ kɛ nolobɔlɛma mɔɔ bɛzɔne bɛ la. Saa mgbanyima ne mɔ te nganeɛ kɛ ɔnfɛta kɛ bɛsɔne ahenle a, ɔwɔ kɛ bɛdua Ngɛlɛlera ne azo bɛmaa ɔnwu deɛmɔti bɛzi kpɔkɛ zɔhane la na bɛfa sunsum nu moalɛ bɛmaa ye.