Nwane Mɔ A Anye Balie Ɛhye Anwo A?
1. Saa yɛkenga yɛ Ɛzinzalɛ Arane anzɛɛ Awake! ɛdeɛ ne a, duzu a ɔwɔ kɛ yɛsuzu nwo a, na kɛmɔti ɛ?
1 Bɛyɛ Ɛzinzalɛ Arane nee Awake! bɛfa bɛdi ewiade amuala azɛlɛsinli ne anwo gyima. Ɛhye ati, bɛka ninyɛne ngakyile nwo edwɛkɛ. Saa yɛlɛkenga edwɛkɛ ko biala wɔ yɛ ɛdeɛ ne anu a, ɔwɔ kɛ yɛkola yɛnwu awie mɔɔ anye balie nwolɛ la, na yɛbɔ mɔdenle yɛfa yɛmaa ahenle zɔhane.
2. Edwɛkɛ mɔɔ wɔ yɛ magazine ne anu la boni a menli anye balie nwolɛ kpalɛ a?
2 Asoo Ɛzinzalɛ Arane mɔɔ ɛra kenlensa ye la ka Baebolo nu edwɛkɛ mɔɔ ɛ nee ɛ gɔnwo gyimayɛvolɛ ɛlumua ɛha nwolɛ edwɛkɛ la ɔ? Edwɛkɛ bie wɔ nu mɔɔ fane abusua asetɛnla nwo mɔɔ baboa ɛ nwo sonla ɔ? Ɛlɛ ɛ gɔnwo bie mɔɔ ɛyɛ kɛ ɔtu adenle yeahɔ ɛleka mɔɔ bɛha nwolɛ edwɛkɛ wɔ Awake! nu la ɔ? Asoo gyima bie mɔ anzɛɛ arane gyima nu amra mɔɔ wɔ azɛlɛsinli ne anu la anye balie magazine ne ko anwo? Kɛ neazo la, menli mɔɔ yɛ gyima wɔ asopiti la anye balie magazine mɔɔ ka kpɔkɛdelɛ nwo edwɛkɛ la anwo. Menli mɔɔ nea maa mɛla yɛ gyima la anye balie magazine mɔɔ ka ɛtanelilɛ anzɛɛ kpolisima nwo edwɛkɛ la anwo.
3. Ka anwubielɛ mɔɔ kile kɛzi nvasoɛ wɔ zo kɛ yɛbava magazine titile bie yɛamaa bɛdabɛ mɔɔ yɛte nganeɛ kɛ bɛ nye balie edwɛkɛ mɔɔ wɔ nuhua anwo la.
3 Mɔɔ Vi Nu Ɛra: Mekɛ mɔɔ agyalɛma bie mɔɔ wɔ South Africa asa hanle October 2011 Awake! mɔɔ se, “How to Raise Responsible Children” (Kɛzi Bɛtete Ngakula Kpalɛ) la, bɛvɛlɛle sukulu 25 mɔɔ wɔ bɛ azɛlɛsinli ne anu la. Nuhua 22 liele bie na bɛhyɛle bɛmanle sukoavoma ne. Agyalɛma bieko mɔɔ wɔ maanle zɔhane anu la nyianle adwenle ko ne ala bie na bɛvale bɛmanle sukuluma mɔɔ wɔ bɛ azɛlɛsinli ne anu la. Kilehilevolɛma mɔɔ wɔ sukulu ne ko anu la vale magazine ne yɛle bɛ dapɛne debiezukoalɛ nee ɛgengalɛ ngyehyɛleɛ. Agyalɛma ne hanle bɛ anwubielɛ ne hilele maanzinli zo neavolɛ. Ɔmanle asafo mɔɔ wɔ ye maanzinli ne anu la anwosesebɛ kɛ bɛva bie bɛmaa sukulu mɔɔ wɔ bɛ azɛlɛsinli ne mɔ anu la. Bɛbizale dɔɔnwo bɛvile ɔfese ne ɛkɛ yemɔti bɛziale bɛyɛle magazine ɛhye dɔɔnwo!
4. Duzu ati a yɛkulo kɛ menli dɔɔnwo nyia magazine ne bie ɛ?
4 Yɛ magazine ne maa yɛte mɔɔ ɛlɛsisi kenlensa ye la abo na ɔtwe adwenle ɔkɔ Baebolo ne nee Nyamenle Belemgbunlililɛ ne azo. Bɛmɛ ala a bɛle ewiade ye anu magazine mɔɔ ‘bɛlɛbɔ ngoanelielɛ’ nwo nolo a. (Aye. 52:7) Ɛhye ati, yɛkulo kɛ menli dɔɔnwo nyia bie. Adenle kpalɛ mɔɔ ɛbalua zo wɔayɛ zɔ la a le kɛ ɛbabiza ɛ nwo kɛ, ‘Nwane mɔ a anye balie ɛhye anwo a?’