Ɛnyia Bɛtianwo Azɛlɛsinli A Ɔbaboa Wɔ Ɔ?
1. Bɛtianwo azɛlɛsinli a le duzu?
1 Bɛtianwo azɛlɛsinli a le duzu? Ɛhye le asafo azɛlɛsinli ne foa ekyi bie mɔɔ bɛkile ye wɔ Territory Map Card (S-12) zo, na bɛfa bɛmaa nolobɔlɛnli bie la. Bɛyɛ ɛhye anwo ngyehyɛleɛ wɔ asafo mɔɔ bɛlɛ azɛlɛsinli kpole la anu. Ɔle azɛlɛsinli mɔɔ bɛva bɛmaa wɔ, mɔɔ bie a ɔbikye ɛleka mɔɔ ɛde la. Organized buluku ne, mukelɛ 103, kilehile nu kɛ: “Ɛnyia bɛtianwo azɛlɛsinli mɔɔ bikye wɔ la a, ɔbaboa yeamaa wɔava mekɛ dɔɔnwo wɔahɔ daselɛlilɛ. Bieko, ɛbahola wɔado ɛsalɛ wɔavɛlɛ nolobɔlɛnli gyɛne na ɛ nee ye ayɛ gyima wɔ azɛlɛsinli ne mɔɔ bɛva bɛmaa wɔ la anu.”
2. Kɛ ɔkɛyɛ na wɔayɛ bɛtianwo azɛlɛsinli nu gyima wɔaboka ekpunli daselɛlilɛ nwo ɛ?
2 Bɛyɛ Bɛboka Ekpunli Daselɛlilɛ Nwo: Saa ɛdie bɛtianwo azɛlɛsinli mɔɔ bikye wɔ gyima la a, ɛbahola ɛ nee nolobɔlɛnli gyɛne mɔɔ ye gyima bikye ɛkɛ la ahɔ daselɛlilɛ wɔ ewiazo ɛnwomenlelielɛ mekɛ ne anu anzɛɛ kolaa na wɔahɔ sua nu la. Saa ɛnyia azɛlɛsinli mɔɔ bikye wɔ sua nu la a, ɛbahola ɛ nee wɔ abusua ne ayɛ nɔsolɛ nu daselɛlilɛ wɔ nu. Nɔhalɛ nu, saa wɔangɔ daselɛlilɛ nyianu ne bie a, ɔfɛta kɛ ɛyɛ asɔne ɛfa ɛkpondɛ adehilelɛ ɛfi Gyihova ɛkɛ na wɔabɔ daselɛlilɛ bo. (Fel. 4:6) Bieko, ɔwɔ kɛ ɛnyia mekɛ ɛfa ɛyɛ wɔ azɛlɛsinli ne anu gyima na eza ɛboa asafo ekpunli daselɛlilɛ ngyehyɛleɛ ne. Wɔ dapɛne awieleɛ titile, mɔɔ menli dɔɔnwo yia kɔ daselɛlilɛ la, ɔle kpalɛ kɛ ɛbaboa ekpunli mɔɔ ɛwɔ nu la.
3. Nvasoɛ boni a wɔ zo kɛ ɛbanyia bɛtianwo azɛlɛsinli a?
3 Zolɛ Nvasoɛ: Saa ɛlɛ bɛtianwo azɛlɛsinli a, ɛnee ɛlɛ ɛleka mɔɔ ɛbahɔ daselɛlilɛ wɔ mekɛ biala mɔɔ wɔ ngyehyɛleɛ ne kɛmaa adenle la. Ɛbanyia mekɛ dɔɔnwo wɔahɔ daselɛlilɛ yɛɛ ɔnrɛmaa ɛnrɛdia adenle tendenle. Ɛhye ɛboa dɔɔnwo ɛmaa bie mɔ ɛyɛ adekpakyelɛ boavolɛma anzɛɛ dahuu adekpakyelɛma. Kɛmɔ suamenle ne mɔ mɔɔ anye die edwɛkɛ ne anwo de wɔ kpalɛ ne azo la ati, ɔnyɛ se kɛ ɛbayɛ sia kɔkpɔla na ɛ nee bɛ ayɛ Baebolo ɛzukoalɛ. Menli dɔɔnwo ɛnwu kɛ bɛka edwɛkɛ ne wɔ bɛtianwo azɛlɛsinli nu a ɔboa ɔmaa bɛnwu suamenle ne mɔ kpalɛ na bɛnyia anwodozo wɔ bɛ nu, titile saa bɛyɛ azɛlɛsinli ne anu gyima fane dɔɔnwo kolaa na bɛava bɛahɔ amaa awie gyɛne ahola alie a. Saa ɛyɛ gyima wɔ bɛtianwo azɛlɛsinli nu a ɔbaboa wɔ nee wɔ abusua ne yeamaa bɛayɛ bɛ ɛzonlenlɛ gyima ne bɔkɔɔ ɔ?—2 Tem. 4:5.