Mmamaa Ɛzulolɛ Ka Wɔ—Bɔ Mɔdenle Nyia Alagye
1. Kɛmɔti a bie mɔ twehwe bɛ bo aze kɛ bɛkɛyɛ Baebolo ɛzukoalɛ ɛ?
1 Bie mɔ twehwe bɛ bo aze kɛ bɛkɛyɛ Baebolo ɛzukoalɛ ɔluakɛ bɛnlɛ alagye la ati. Ɔwɔ kɛ yɛnyia mekɛ yɛmaa Baebolo sukoavo ne. Ɔwɔ kɛ yɛnyia mekɛ yɛsiezie yɛ nwo yɛmaa debiezukoalɛ ne, yɛnyia mekɛ yɛyɛ, na yɛboa sukoavo ne yɛmaa ɔdi ye ngyegyelɛ bie mɔ anwo gyima. Ɛzoanvolɛ Pɔɔlo hanle kɛ ɔvale ye ɛkɛla ɔmanle kɛ ɔfa yeaboa menli mɔɔ wɔ Tɛsalonaeka la yeamaa bɛanwu Gyihova. (1 Tɛs. 2:7, 8, NW) Saa yɛnlɛ alagye bɔbɔ a kɛzi yɛbahola yɛayɛ Baebolo ɛzukoalɛ ɛ?
2. Kɛzi Gyihova anwo ɛlɔlɛ ka yɛ mekɛ mɔɔ yɛfa yɛdi gyima la ɛ?
2 Ɛzonlenlɛ Die Mekɛ: Ɔle nɔhalɛ sikalɛ kɛ ɛzonlenlɛ die mekɛ. Kɛ neazo la, dahuu yɛnyia mekɛ yɛkɔ debiezukoalɛ, yɛkɔ daselɛlilɛ, yɛkenga Baebolo ne, na yɛyɛ asɔne. Awie mɔɔ ɛgya mɔɔ ɔnlɛ alagye la fi anyelielɛ nu nyia mekɛ maa ye bokavolɛ. Nea kɛzi ɔwɔ kɛ yɛfi anyelielɛ nu ‘yɛtɔ’ mekɛ yɛfa yɛsonle Gyihova ɔluakɛ yɛkulo ye la ati. (Ɛfɛ. 5:15-17, NW; 1 Dwɔn 5:3) Kɛmɔ Gyisɛse hilele la, yɛ ɛzonlenlɛ ne foa mɔɔ hyia kpalɛ la a le ɛdoavolɛyɛlɛ gyima ne. (Mat. 28:19, 20) Saa yɛsuzu ɛhye anwo a ɔbaboa yɛ yeamaa yɛalie gyima mɔɔ yɛlɛ kɛ ɔwɔ kɛ yɛyɛ Baebolo ɛzukoalɛ la yɛado nu.
3. Saa ninyɛne bie sɛkye yɛ daselɛlilɛ ngyehyɛleɛ ne a kɛzi yɛbahola yɛali Baebolo ɛzukoalɛ nwo gyima ɛ?
3 Na saa gyima, anwodolɛ mɔɔ anu yɛ se, anzɛɛ teokelase gyimalilɛ sɛkye yɛ ngyehyɛleɛ ne ɛ? Nolobɔlɛma bie mɔ mɔɔ kɛhɔ ɛleka bie la yɛ bɛ Baebolo ɛzukoalɛ ne wɔ moba anzɛɛ kɔmputa zo. Menli mɔɔ ewule mɔɔ anu yɛ se kɛzɛkye bɛ ngyehyɛleɛ ne la yɛ ngyehyɛleɛ maa sukoavo ne ba bɛ sua nu na bɛ nee ye sukoa. Bie mɔ maa nolobɔlɛnli mɔɔ bahola la kɔyɛ debiezukoalɛ ne wɔ mekɛ mɔɔ bɛnle ɛkɛ la.
4. Saa yɛyɛ Baebolo ɛzukoalɛ gyima ne bie a nyilalɛ boni a yɛbanyia a?
4 Pɔɔlo anye liele kpole kɛ ɔvale ye mekɛ nee ye anwosesebɛ ɔboale awie mɔ ɔmanle bɛnwunle nɔhalɛ ne la. (Gyi. 20:35) Mekɛ mɔɔ ɔzuzule ma mɔɔ ɔbɔle mɔdenle ɔluale wɔ Tɛsalonaeka anwo la, ɔyɛle Gyihova mo wɔ nwolɛ. (1 Tɛs. 1:2) Saa yɛnyia alagye yɛyɛ Baebolo ɛzukoalɛ gyima ne bie a yɛbanyia anyelielɛ nee ahunlundwolɛ kpole wɔ daselɛlilɛ gyima ne anu.