Bɔ Wɔ Adwenle Nwo Bane
1. Ɛzonlenlɛ ɛvolɛ 2013 kenle ko nyianu titile edwɛkɛtile ne a le duzu, na nyianu ne bodane a le boni?
1 Alehyenlɛ biala, yɛnwu ninyɛne ngakyile mɔɔ bahola azɛkye yɛ adwenle la. Ɛhye ati a kenle ko nyianu titile maa 2013 ɛzonlenlɛ ɛvolɛ ne edwɛkɛtile ne se, “Bɔ Wɔ Adwenle Nwo Bane” la. (1 Tem. 1:19) Bɛyɛ nyianu ngyehyɛleɛ ne kɛ bɛfa bɛaboa yɛ nuhua ko biala bɛamaa yeanlea kɛzi ɔlɛfa ahyɛlɛdeɛ kɛnlɛma ɛhye mɔɔ vi Bɔvolɛ ne ɛkɛ yeali gyima kpalɛ la.
2. Kpuyia mɔɔ hyia la boni mɔ a bɛbabiza wɔ nyianu ne anu a?
2 Nea Kɛ Ɛbade Edwɛkɛ Ɛhye Mɔ: Nyianu ne babua adwenle ne anwo kpuyia titile nsuu:
• Duzu a le esiane maa adwenle ne a?
• Kɛ ɔkɛyɛ na yɛatete yɛ adwenle ne ɛ?
• Kɛzi ɔkola ɔyɛ boɛ kɛ yɛnrɛli menli kɔsɔɔti mogya nwo ɛzonle ɛ?
• Duzu a yɛ nzuzulɛ nee Baebolo ngyinlazo mɔɔ yɛfa yɛbɔ ɛbɛla la maa ɔda ali wɔ yɛ nwo a?
• Kɛ ɔkɛyɛ na yɛangyegye awie mɔ wɔ ninyɛne mɔɔ ɔwɔ kɛ bɛfa bɛ adwenle bɛdi nwolɛ gyima la anwo ɛ?
• Ngakula, saa bɛgyegye bɛ kɛ bɛyɛ ninyɛne mɔɔ ɔnle kpalɛ a, kɛzi bɛbagyinla ɔ nloa ɛ?
• Nyilalɛ boni mɔ a menli mɔɔ maa sunsum ne kile bɛ adwenle ne adenle la nyia a?
3. Kɛ ɔkɛyɛ na nyianu ne aboa yɛ ɛ?
3 Ɔlua Gyihova moalɛ zo yɛbahola yɛagyinla mɔdenle mɔɔ Seetan ɛlɛbɔ kɛ ɔsɛkye yɛ adwenle la anloa. Yɛ anwuma Selɛ ne mɔɔ lɛ ɛlɔlɛ la ɛlɛdua ye Edwɛkɛ nee ye ahyehyɛdeɛ ne azo aha ahile yɛ kɛ: “Adenle ne ɛne, bɛlua nuhua.” (Aye. 30:21) Nyianu ɛhye le adenle ko mɔɔ Gyihova ɛlɛdua zo ava adehilelɛ zɛhae amaa a. Ɛhye ati, yɛ ngyehyɛleɛ kɔ ɔ muala bie. Tie edwɛkɛ ne boɛ, na suzu kɛzi ɛbahola wɔava edwɛkɛ ne wɔaboa ɛ nwo la anwo. Bɛha nyianu ne anwo edwɛkɛ kɛ abusua. Saa yɛfa ninyɛne mɔɔ bɛkilehile yɛ la yɛdi gyima a ɔbamaa yɛahɔ zo ‘yɛanyia adwenle kpalɛ’ na yeaboa yɛ yeamaa yɛahoati kɛ yɛbali Seetan ewiade ne anu anyelielɛ nzi na yɛavi adenle ne azo.—1 Pita 3:16.