Asoo Wɔ Adwenle Ne Kile Wɔ Adenle Kpalɛ?

1, 2. Nwane a vale adwenle ne maanle yɛ a na nzɔne ati a ɔwɔ kɛ yɛkile nwolɛ anyezɔlɛ a?

GYIHOVA NYAMENLE bɔle alesama mɔɔ bɛkola bɛkpa mɔɔ bɛkulo la. Eza yemaa yɛ debie mɔɔ ɔbaboa yɛ yeamaa yɛazi kpɔkɛ kpalɛ la. Deɛ ɛhye a le adwenle ne, mɔɔ ɔmaa yɛnwu mɔɔ le kpalɛ nee mɔɔ le ɛtane la. Saa yɛfa yɛ adwenle ne yɛdi gyima kpalɛ a, ɔbahola yeamaa yɛayɛ mɔɔ tenrɛ la na yɛahoati ɛtane. Yɛ adwenle ne di daselɛ kɛ Gyihova kulo yɛ na ɔkpondɛ kɛ ɔwie yɛ boɛ.

² Ɛnɛ, menli bie mɔ yɛ mɔɔ le kpalɛ la yɛɛ eza bɛkyi ɛtane ɔnva nwo kɛ bɛnze Baebolo ne anu ngyinlazo ne mɔ la. (Kenga Wulomuma 2:14, 15.) Nzɔne ati ɔ? Bɛ adwenle ne ati ɔ. Ɔmmaa menli dɔɔnwo ɛnyɛ ninyɛndane. Saa awie biala ɛnlɛ adwenle a, anrɛɛ ɛnea a kɛzi ewiade ne bayɛ ɛ? Anrɛɛ menli bayɛ ninyɛndane adɛla mɔɔ ɔlɛkɔ zolɛ la. Yɛyɛ Gyihova mo kɛ ɔmaanle alesama adwenle la!

3. Kɛzi yɛ adwenle ne bahola aboa yɛ wɔ asafo ne anu ɛ?

³ Menli dɔɔnwo ɛndwenle nwo kɛ ɔwɔ kɛ bɛtete bɛ adwenle ne. Noko Gyihova menli kpondɛ kɛ bɛ adwenle ne yɛ gyima kpalɛ ɔluakɛ ɔbahola yeamaa koyɛlɛ adɛnla asafo ne anu. Yɛkpondɛ kɛ yɛ adwenle ne maa yɛkakye Baebolo ngyinlazo mɔɔ fane mɔɔ tenrɛ nee mɔɔ ɛndenrɛ, kpalɛ nee ɛtane anwo la. Noko amaa yɛatete yɛ adwenle ne na yɛava yɛayɛ gyima la, saa yɛnwu mɔɔ Baebolo ne ka la a ɛnee yɛtɛwiele. Ɔwɔ kɛ yɛ nye die Nyamenle ngyinlazo ne mɔ anwo na yɛnyia diedi kɛ bɛbaboa yɛ. Pɔɔlo hɛlɛle kɛ: “Bodane mɔɔ yɛ ngilehilelɛ ɛdeɛ ne gyi zolɛ la a le ɛhulolɛ mɔɔ vi ahonle mɔɔ ɛtane ɛnle nu, adwenle mɔɔ nuhua te wienyi” la. (1 Temɔte 1:5) Saa yɛtete yɛ adwenle ne na yɛfa yɛyɛ gyima a, ɔbamaa ɛlɔlɛ mɔɔ yɛlɛ yɛmaa Gyihova nee diedi mɔɔ yɛlɛ wɔ ye nu la ayɛ kpole. Kɛzi yɛfa yɛ adwenle ne yɛyɛ gyima la kile kɛzi agɔnwolɛvalɛ mɔɔ yɛ nee Gyihova lɛ la anu mia nee kɛzi yɛkpondɛ kɛ yɛyɛ ye ɛhulolɛdeɛ la. Yɛ adwenle ne maa bɛnwu kɛzi yɛde la.

4. Kɛ ɔkɛyɛ ne yɛatete yɛ adwenle ne ɛ?

⁴ Noko kɛ ɔkɛyɛ na yɛatete yɛ adwenle ne ɛ? Ɔwɔ kɛ yɛsukoa Baebolo ne dahuu, yɛdwenledwenle mɔɔ yɛkenga la anwo na yɛsɛlɛ Gyihova kɛ ɔboa yɛ ɔmaa yɛva mɔɔ yɛzukoa la yɛyɛ gyima. Ɛhye kile kɛ ɔnle kɛ yɛkenga edwɛkɛ ne ala. Deɛmɔti yɛsukoa Baebolo ne la a le kɛ yɛkpondɛ kɛ yɛnwu Gyihova kpalɛ. Yɛnwu kɛzi ɔde, mɔɔ ɔkulo nee mɔɔ ɔngulo la. Mekɛ mɔɔ yɛlɛsukoa Gyihova anwo debie dɔɔnwo la, akee yɛ adwenle ne bahola anwu mɔɔ ɔbu ye kɛ ɔtenrɛ nee mɔɔ ɔndenrɛ la ndɛndɛ. Saa yɛtete yɛ adwenle ne dahuu a, ɔbamaa yɛanyia Gyihova adwenle ne bie.

5. Nzɔne a yɛbazuzu nwo wɔ edwɛkɛ ɛhye anu a?

⁵ Bie a yɛbabiza yɛ nwo kɛ: Saa ɔwɔ kɛ yɛsi kpɔkɛ bie a, kɛzi adwenle mɔɔ bɛtete ye boɛ la bahola aboa yɛ ɛ? Kɛ ɔkɛyɛ na yɛahile kɛ yɛbu adwenle mɔɔ yɛ mediema Kilisienema lɛ la ɛ? Yɛɛ kɛzi yɛ adwenle ne bahola amaa yɛayɛ mɔɔ le kpalɛ la ɛ? Bɛmaa yɛzuzu ninyɛne nsa mɔɔ yɛbahyia adwenle mɔɔ bɛtete ye boɛ wɔ nu la anwo: (1) yɛ kpɔkɛdelɛ, (2) anyelielɛ ninyɛne, nee (3) yɛ daselɛlilɛ gyima ne.

DA NDELEBƐBO ALI WƆ KPƆKƐDELƐ NWO

6. Kpɔkɛ boni a ɔwɔ kɛ yɛsi wɔ yɛ kpɔkɛdelɛ nwo a?

⁶ Baebolo ne se yɛhoati nyɛleɛ mɔɔ bahola aboda yɛ la na yɛla ndelebɛbo ali wɔ debie le kɛ nlidi nlidi nee nlono nlono nu. (Mrɛlɛbulɛ 23:20; 2 Kɔlentema 7:1) Saa yɛdi Baebolo folɛdulɛ zo a, ɔbahola yeabɔ yɛ kpɔkɛdelɛ nwo bane. Noko yɛ nwo to yɛ na yɛyɛ mgbanyinli. Kpɔkɛ boni a ɔwɔ kɛ yɛsi a? Wɔ maanle bie mɔ anu, bɛlɛ alɔfolɛ ayile nee aze ayile. Mediema ta kɛlɛ Bɛtɛle ngakyile ne mɔ kɛlata biza bɛ ayile ɛyɛlɛ nwo edwɛkɛ ngakyile. Bɛ nuhua dɔɔnwo biza kɛ, “Gyihova sonvolɛ bahola alie ayileyɛlɛ ɛhye mɔ bie ado nu ɔ?”

7. Kɛ ɔkɛyɛ na yɛazi kpɔkɛ wɔ mogya nwo a?

⁷ Saa Kilisienenli bie biza Bɛtɛle anzɛɛ asafo nu mgbanyima ayileyɛlɛ nwo edwɛkɛ bie a, bɛnlɛ adenle kɛ bɛbazi kpɔkɛ bɛamaa ye. (Galeehyeama 6:5) Noko mgbanyima ne mɔ bahola aha mɔɔ Gyihova ka ye wɔ edwɛkɛ ne anwo la ahile ye, amaa yeazi kpɔkɛ kpalɛ. Kɛ neazo la, Nyamenle se yɛhwe yɛ nwo yɛvi mogya nwo. (Gyima ne 15:29) Mɛla ɛhye boa Kilisienenli ɔmaa ɔnwu ye kɛ ɔnrɛhola ɔnrɛlie ayileyɛlɛ mɔɔ bɛfa mogya anzɛɛ mogya nu ninyɛne nna ne bɛyɛ la anu bie. Edwɛkɛ ɛhye bahola aha kpɔkɛ mɔɔ Kilisienenli bazi kɛ ɔbalie anzɛɛ ɔnrɛlie mogya nu ninyɛne ngyikyi mɔɔ ɔvi mogya nu ninyɛne nna ne anu la bie.a Baebolo nu folɛdulɛ boni bieko a bahola aboa yɛ yeamaa yɛazi kpɔkɛ kpalɛ wɔ ayileyɛlɛ nwo a?

8. Kɛzi Felepaema 4:5 bahola amaa yɛazi ayileyɛlɛ nwo kpɔkɛ kpalɛ ɛ?

⁸ Mrɛlɛbulɛ 14:15 se: “Sonla mɔɔ ye adwenle ɛtɛtinle la die debie biala di, na badwemafo nea ɛleka mɔɔ ɔlɛtu ɔ gyakɛ yeahɔ la.” Ɛnɛ, bie a bɛtɛnyianle ewule bie mɔ anwo ayile. Yemɔti ɔwɔ kɛ yɛnea boɛ wɔ ndenle bie mɔ mɔɔ bɛkile kɛ bɛdua zo bɛyɛ ewule bie mɔ ayile noko bɛnnwu nuhua kpalɛ la. Pɔɔlo hɛlɛle kɛ: “Bɛmaa awie biala ɛnwu kɛ bɛlɛ abotane molozo [anzɛɛ “ndelebɛbo,” NW].” (Felepaema 4:5) Ndelebɛbo bamaa yɛava yɛ adwenle yɛazie Gyihova ɛzonlenlɛ zo yɛadɛla kpɔkɛdelɛ nwo edwɛkɛ zo. Saa kpɔkɛdelɛ nwo kyia yɛ somasoma a, yɛbahola yɛayɛ angomedi. (Felepaema 2:4) Yɛze kɛ yɛnrɛnyia kpɔkɛdelɛ kpalɛ wɔ ewiade ɛhye anu. Yemɔti maa Gyihova ɛzonlenlɛ nwo ɛhyia wɔ ɛdɛla debie biala wɔ wɔ ɛbɛlabɔlɛ nu.​—Kenga Felepaema 1:10.

9. Kɛzi Wulomuma 14:13, 19 ka kpɔkɛ mɔɔ yɛbazi wɔ yɛ kpɔkɛdelɛ nwo la ɛ, na kɛzi yɛ koyɛlɛ ne bahola ala esiane nu ɛ?

⁹ Kilisienenli mɔɔ ɔlɛ ndelebɛbo la ɛnrɛtinlitinli awie mɔ kɛ bɛyɛ mɔɔ ɔsuzu kɛ ɔle kpalɛ la. Wɔ maanle ko anu, ɛnee agyalɛma bie ɛlɛka ahile awie mɔ kɛ bɛnlo ayile na bɛli aleɛ titili bie. Bɛlile mediema bie mɔ adwenle bɛmaanle bɛyɛle zɔ, noko bie mɔ anyɛ. Mɔɔ debie kpalɛ vi zɔhane ayile ne nee aleɛ ne anu amba la, mediema ne mɔ anu dɔɔnwo vale ɛya. Ɛnee agyalɛma ne lɛ adenle kɛ bɛbakpa kɛ bɛbanlo ayile bie na bɛali aleɛ ne bie anzɛɛ bɛnrɛyɛ. Noko, asoo ɛnee nrɛlɛbɛ wɔ nu kɛ ayileyɛlɛ ti, bɛbava koyɛlɛ mɔɔ wɔ asafo ne anu la bɛado esiane nu ɔ? Wɔ tete Wulomu, ɛnee Kilisienema bie mɔ lɛ adwenle ngakyile wɔ aleɛ nee ɛvoyia bie mɔ anwo. Folɛ boni a Pɔɔlo dule bɛ a? Ɔhanle kɛ: “Sonla ne bie adwenle a le kɛ kenle ne bie hyia tɛla kenle mɔɔ ɛha la amuala. Bie noko dwenle nwolɛ kɛ kenle ne amuala sɛ. Ɔwɔ kɛ biala dwenle nwolɛ kpalɛ na ɔmaa ye adwenle si pi wɔ nwolɛ.” Bɛmaa yɛnlea boɛ na yɛammaa awie mɔ andu koti.​—Kenga Wulomuma 14:5, 13, 15, 19, 20.

10. Nzɔne ati a ɔwɔ kɛ yɛbu awie mɔ kpɔkɛzilɛ ɛ? (Nea mɔlebɛbo nvoninli ne.)

¹⁰ Ɔdwu mekɛ ne bie a, yɛnrɛde deɛmɔti adiema bie bazi ninyɛne bie mɔ anwo kpɔkɛ la abo. Nzɔne a ɔwɔ kɛ yɛyɛ a? Ɔnle kɛ yɛbua ye ndɛne anzɛɛ yɛtinlitinli ɔ nwo zo kɛ ɔhakyi ye adwenle. Bie a ɔwɔ kɛ ɔtete ye adwenle ne kpalɛ anzɛɛ bie a ɔngyɛ na debie agyegye ye. (1 Kɔlentema 8:11, 12) Anzɛɛ bie a yɛdayɛ mumua ne yɛtɛwiele yɛ adwenle ne tete. Ɔwɔ kɛ awie biala si ɔ ti anwo kpɔkɛ wɔ kpɔkɛdelɛ nee ninyɛne bie mɔ anwo na ɔdi mɔɔ ɔbavi ye kpɔkɛzilɛ nu yeara la anwo ɛzonle.

DIELIE Ɛ NYE

11, 12. Kɛzi Baebolo ne boa yɛ ɔmaa yɛkpa ninyɛne mɔɔ yɛbava yɛalielie yɛ nye la ɛ?

¹¹ Gyihova bɔle yɛ mɔɔ yɛbahola yɛanyia anyelielɛ zo nvasoɛ. Sɔlɔmɔn hɛlɛle kɛ yɛlɛ “mekɛ mɔɔ bɛsele” yɛɛ “mekɛ mɔɔ bɛsi agole.” (Nolobɔvo ne 3:4) Noko tɛ anyelielɛ ninyɛne ne amuala a boa na ɔmaa bɛ nwo tɔ bɛ a. Eza ɔnle kɛ yɛsɛkye mekɛ wɔ anyelielɛ nwo. Kɛ ɔkɛyɛ na yɛ adwenle ne amaa yɛanyia anyelielɛ ninyɛne mɔɔ Gyihova die to nu la azo nvasoɛ ɛ?

¹² Baebolo ne bɔ yɛ kɔkɔ wɔ “sonla su ne gyima” nwo. Bɛmɛ a le “adwɔmane, ɛbɛla mgbane mgbane mɔɔ anwo ɛnde la ɛbɔlɛ, bozonle ɛzonlenlɛ nee ayɛne ɛbɛla. Ɛkpɔlɛ, konle, nungule, ɛya, angomedi, ngyehyɛnu nee ngilehilenu, anyebolo, kɔdiawuyɛlɛ, nza ɛbolɛ, anyelielɛ mgbane mgbane nee ninyɛne mɔɔ le zɛhae mɔ la.” Pɔɔlo hɛlɛle kɛ: “Bɛdabɛ mɔɔ bɛyɛ ninyɛne ɛhye mɔ la ɛnrɛnwu Nyamenle Belemgbunlililɛ ne.” (Galeehyeama 5:19-21) Yemɔti yɛbahola yɛabiza yɛ nwo kɛ: ‘Asoo me adwenle ne maa metwe me nwo mefi nwɔhoalilɛ mɔɔ anyebolo, ɛzulɛ, maanle nwo ɛhulolɛ anzɛɛ basabasayɛlɛ wɔ nu la anwo ɔ? Saa meyia vidio mɔɔ nlanwonvoninli wɔ nu anzɛɛ ɔsi ɛbɛlatane, nzabolɛ anzɛɛ sunsum evinli nyɛleɛ adua la anwo sɔnea a, asoo me adwenle ne bɔ me kɔkɔ ɔ?’

13. Kɛzi folɛdulɛ mɔɔ wɔ 1 Temɔte 4:8 yɛɛ Mrɛlɛbulɛ 13:20 la bahola aboa yɛ wɔ anyelielɛ ninyɛne nwo ɛ?

¹³ Baebolo ngyinlazo baboa yɛ yeamaa yɛatete yɛ adwenle ne wɔ anyelielɛ ninyɛne nwo. Kɛ neazo la, Baebolo ne se “nwonane agbɔkɛ nu ɛkpundinlɛ hyia.” (1 Temɔte 4:8) Yemɔti menli dɔɔnwo te nganeɛ kɛ saa bɛkpundikpundi bɛ agbɔkɛ nu a, ɔboa bɛ kpɔkɛdelɛ. Na saa yɛkpondɛ kɛ yɛ nee awie mɔ bɔ nu kpundikpundi yɛ agbɔkɛ nu ɛ? Menli mɔɔ yɛbakpa bɛ la anwo hyia ɔ? Mrɛlɛbulɛ 13:20 se: “Sonla mɔɔ nee nrɛlɛbɛvolɛma tu la nwu nrɛlɛbɛ, na mɔɔ nee ahoasea tu la nwu ɔ nyunlu.” Ɛhye ati saa yɛkpondɛ kɛ yɛdielie yɛ nye a, ɔwɔ kɛ yɛfa yɛ adwenle ne mɔɔ yɛva Baebolo ne yɛtete ye la yɛdi gyima.

14. Kɛzi abusua bie vale Wulomuma 14:2-4 lile gyima ɛ?

¹⁴ Christian nee Daniela lɛ ngakula mraalɛ nwiɔ mɔɔ bɛtɛdwule ɛvolɛ 20 a. Christian se: “Yɛzuzule anyelielɛ ninyɛne nwo wɔ yɛ nɔsolɛ Abusua Ɛzonlenlɛ ne abo. Yɛranwunle kɛ ninyɛne mɔɔ yɛfa yɛdielie yɛ nye la bie mɔ le kpalɛ yɛɛ bie mɔ ɛnle kpalɛ. Nwane mɔ a yɛbahola yɛava bɛ agɔnwolɛ a? Yɛ mra mraalɛ ne ko hanle kɛ, saa bɛkɔ sukulu na bɛmaa break a, kɛzi Alasevolɛ ngakula bie mɔ yɛ bɛ ninyɛne la ɔnea a ɔnle kpalɛ. Noko ɔyɛ a ɔkpondɛ kɛ ɔyɛ bie. Yɛmaanle ɔnwunle kɛ awie biala lɛ adwenle, na ɔwɔ kɛ yɛmaa ɔkile yɛ mɔɔ yɛbayɛ nee awie mɔɔ yɛ nee ye badu la.”​—Kenga Wulomuma 14:2-4.

15. Saa yɛkpondɛ kɛ yɛdielie yɛ nye a, kɛzi Mateyu 6:33 bahola aboa yɛ ɛ?

¹⁵ Mekɛ tendenle nyɛ a ɛfa ɛdielie ɛ nye a? Asoo debiezukoalɛ ɛhɔlɛ, daselɛlilɛ nee Baebolo ɛzukoalɛ a dimoa wɔ ɛbɛlabɔlɛ nu ɔ, anzɛɛ anyelielɛ a dimoa a? Nzɔne a anwo hyia wɔ kpalɛ a? Gyisɛse hanle kɛ: “Bɛbɔ mɔdenle bɛdwenle Nyamenle Belemgbunlililɛ ne nee mɔɔ Nyamenle kpondɛ kɛ bɛyɛ la anwo kpalɛ, na ɔkɛva mɔɔ bɛhyia nwolɛ la ɔkɛmaa bɛ.” (Mateyu 6:33) Saa ɛkpondɛ kɛ ɛyɛ debie a, ɛkakye Gyisɛse folɛdulɛ ne ɔ?

BƐMAA YƐ ANWOSESEBƐ KƐ YƐHA EDWƐKƐ NE

16. Kɛzi yɛ adwenle ne boa yɛ maa yɛbɔ edwɛkɛ ne nolo ɛ?

¹⁶ Adwenle mɔɔ bɛtete ye boɛ la bɔ yɛ kɔkɔ wɔ ɛtane ɛyɛlɛ nwo, eza ɔmaa yɛyɛ ninyɛne mgbalɛ. Bie a le azua nu daselɛlilɛ nee menli mɔɔ yɛbali bɛ daselɛ wɔ mekɛ mɔɔ yɛnle daselɛlilɛ nu la. Zɔhane a Pɔɔlo yɛle a. Ɔhɛlɛle kɛ: “Ɔle me gyima mɔɔ ɔwɔ kɛ meyɛ a. Saa meambɔ Edwɛkpa ne nolo a, me gyakɔ!” (1 Kɔlentema 9:16) Saa yɛsukoa Pɔɔlo a, yɛbanyia adwenle mɔɔ anu te ɔluakɛ yɛze kɛ yɛlɛyɛ mɔɔ tenrɛ la. Saa yɛlɛka edwɛkpa ne yɛahile awie mɔ a, yɛkpondɛ kɛ bɛte ɔ bo. Pɔɔlo hanle kɛ: “Yɛlua nɔhalɛ wienyi ne anu yɛbɔ yɛ ɛbɛla wɔ Nyamenle anyunlu kɛ awie biala kɛnyia yɛ nwo adwenle kpalɛ.”​—2 Kɔlentema 4:2.

17. Kɛzi adiema raalɛ kakula ko diele ye adwenle ne mɔɔ yeva Baebolo ne yetete ye la ɛ?

¹⁷ Jacqueline lile ɛvolɛ 16 la, yɛɛ ɔzukoale abɔdeɛ mɔɔ ngoane wɔ nu la anwo debie wɔ sukulu a. Noko ɛnee sukoavoma ne ɛlɛsukoa ngakyihakyililɛ nwo debie. “Me adwenle ne ammaa meanva me nwo meanwula debiezukoalɛ ne anu kpalɛ kɛmɔ meyɛ ye dɛba la. Ɛnee menlie ngakyihakyililɛ ne mendo nu. Mengilehilele foa mɔɔ megyi la anu mengilele kilehilevolɛ ne. Ɔzinle me nwo kɛ ɔlale agɔnwolɛvalɛ subane ali na ɔmaanle me adenle kɛ menga abɔdeɛ nwo edwɛkɛ mengile sukoavoma mɔɔ ɛha la.” Jacqueline ahonle dɔle ye azule nu ɔlua ye adwenle ne mɔɔ yeva Baebolo ne yetete ye mɔɔ ɔdiele ye la azo. Asoo wɔ adwenle ne maa ɛyɛ mɔɔ tenrɛ la?

18. Nzɔne ati a ɔwɔ kɛ yɛnyia adwenle kpalɛ mɔɔ ɔkola ɔkile yɛ adenle kpalɛ la ɛ?

¹⁸ Yɛ bodane a le kɛ yɛbava Gyihova ngyinlazo ne mɔ yɛayɛ gyima. Yɛ adwenle ne bahola amaa yɛadwu bodane zɔhane anwo. Saa yɛsukoa Nyamenle Edwɛkɛ ne dahuu, yɛdwenledwenle nwo na yɛfa mɔɔ yɛsukoa la yɛyɛ gyima a, ɔbamaa yɛatete yɛ adwenle ne. Akee ahyɛlɛdeɛ ɛhye mɔɔ yɛ nwanwane la bahile yɛ adenle kpalɛ wɔ yɛ Kilisiene ɛbɛlabɔlɛ ne anu!