Nea Ɛ Nwo Boɛ Wɔ Daselɛlilɛ Nu
1. Duzu ati a ɔhyia kɛ yɛnea boɛ wɔ daselɛlilɛ nu a?
1 Kɛ “mboane [mɔɔ] wɔ bɛdi avinli” la, Nyamenle azonvolɛ ɛlɛka edwɛkɛ ne “wɔ adalɛ nee ɛtane ewiade ye anu.” (Mat. 10:16; Fel. 2:15) Maanle nu basabasayɛlɛ, menli mɔɔ bɛbo bɛ nee menli mɔɔ bɛkye bɛ amumuyɛ adenle zo la ɛbu zo, na ɔdi daselɛ kɛ menli bahɔ zo amaa “bɛ ti ayɛ se kpalɛ.” (2 Tem. 3:13) Ngɛlɛlera ngyinlazo boni a yɛfa yɛdi gyima a ɔbamaa yɛanlea yɛ nwo boɛ wɔ daselɛlilɛ nu a?—Mat. 10:16.
2. Mekɛ boni a nrɛlɛbɛ wɔ nu kɛ ɛbavi azɛlɛsinli ne anu na wɔahɔ ɛleka fofolɛ a?
2 Maa Ɛ Nye Ɛla Ɛkɛ: Mrɛlɛbulɛ 22:3 si zolɛ kɛ nrɛlɛbɛ wɔ nu kɛ ‘yɛtwe yɛ nwo yɛfea’ na munzule ando yɛ. Maa ɛ nye ɛla ɛkɛ! Ninyɛne mɔɔ wɔ ɛleka mɔɔ banebɔlɛ wɔ la bahola ahakyi arɛlevilɛ nu. Bie a ɛbanwu kɛ kpolisima anzɛɛ menli ekpunli ɛlɛboɔboa bɛ nloa wɔ gua ne azo. Ɔdwu mekɛ ne bie a, suamenle mɔɔ le sonla kpalɛ la babɔ wɔ kɔkɔ. Kɛ anrɛɛ ɛbayɛ kɛ ɛnwu mɔɔ ɛlɛkɔ zo la, nrɛlɛbɛ wɔ nu kɛ ɛbavi ɛkɛ ne ndɛndɛ wɔahɔ ɛleka fofolɛ.—Mrɛ. 17:14; Dwɔn 8:59; 1 Tɛs. 4:11.
3. Kɛzi ngyinlazo ne mɔɔ wɔ Nolobɔvo ne 4:9 la fane daselɛlilɛ nwo ɛ?
3 Bɛbɔ Nu Bɛyɛ Gyima: Nolobɔvo ne 4:9 ka kɛ: “Menli nwiɔ le kpalɛ tɛla sonla ko.” Bie a ɛnee ɛ ngomekye ɛkola ɛkɔ daselɛlilɛ mɔɔ ɛzulolɛ ɛnle nu a, na ɛnɛ noko ɛ? Wɔ ɛleka bie mɔ ɔnyɛ ɛzulolɛ. Noko, wɔ ɛleka bie mɔ ɔnle kpalɛ kɛ adiema raalɛ anzɛɛ kakula kɛyɛ azua nu daselɛlilɛ wɔ nɔsolɛ. Anwubielɛ ɛmaa yela ali kɛ awie boka yɛ nwo a ɔle kpalɛ. (Nolo. 4:10, 12) Kɔ zo dwenle menli mɔɔ wɔ ekpunli ne anu la banebɔlɛ nwo. Maa menli mɔɔ ɛha la ɛnwu kɛ ɛlɛfi azɛlɛsinli ne anu.
4. Kɛ ɔkɛyɛ na yɛaboa yɛamaa bɛabɔ menli kɔsɔɔti mɔɔ wɔ asafo ne anu la anwo bane ɛ?
4 Ɔle mgbanyima ne mɔ mɔɔ “nea bɛ ɛkɛla zo” la ɛzonlelilɛ kɛ bɛbava adehilelɛ kpalɛ bɛamaa kɛmɔ bɛ ɛkɛ ne gyinlabelɛ ne de la. (Hib. 13:17) Saa yɛbɛlɛ yɛ nwo aze kɛ Keleseɛnema na yɛtie bɛ a, Gyihova bayila yɛ. (Mae. 6:8; 1 Kɔl. 10:12) Ɔrɛla ye kɛ Nyamenle azonvolɛ kɔsɔɔti bayɛ biala mɔɔ bɛkɛhola la kɛ bɛdi daselɛ kpalɛ wɔ bɛ azɛlɛsinli ne mɔ anu, noko dahuu bɛanlea boɛ wɔ mekɛ mɔɔ bɛlɛyɛ zɔ la.