Kɛlata Mɔɔ Vi Neazo Eku Ne Ɛkɛ
Yɛ Mediema Gyihova Alasevolɛ:
Ɔyɛ yɛ fɛ kɛ yɛlɛkɛlɛ bɛdabɛ mɔɔ bɛbo mgbe nsuu na bɛlɛfa nɔhalɛlilɛ bɛazonle Gyihova la. Saa diedinli bie yia ɔ gɔnwo mɔɔ vi maanle gyɛne nu a, ɛkɛ ne ala ɛkola ɛnwu kɛ bɛlɛ ɛlɔlɛ kpole bɛmaa bɛ nwo. (Dwɔn 13:34, 35) Mekɛ mɔɔ ɛlɛkenga Yearbook ɛhye la ɛbanwu kɛzi yɛ mediema mrenya nee mraalɛ mɔɔ wɔ maanle gyɛne nu ɛlɛda diedi nee nɔhalɛlilɛ ali la, na ɛhye bamaa wɔanwu ɛlɔlɛ mɔɔ bɛlɛ la.
Amaneɛbɔlɛ mɔɔ yɛ sa ɛha ye la kile kɛ bɛ nuhua dɔɔnwo ɛnva bɛ Abusua Ɛzonlenlɛ ne ɛnli nwɔhoa. Bɛdabɛ mɔɔ bɛlɛ ngakula la ɛlɛdua ngilehilelɛ adenle kpalɛ zo amaa bɛ mra ngyikyi ne mɔ anye alie nwolɛ. (Ɛfɛ. 6:4) Ngyehyɛleɛ ɛhye ɛlɛmaa ɛlɔlɛ mɔɔ wɔ agyalɛma avinli la ayɛ kpole na bɛabikye bɛ nwo kpalɛ, ɔlua sunsum nu ninyɛne mɔɔ bɛbɔ nwolɛ adawu la azo. (Ɛfɛ. 5:28-33) Nɔhalɛ, awie biala mɔɔ fa ngyehyɛleɛ ɛhye di gyima la ɛlɛnyia Nyamenle Edwɛkɛ ne mɔɔ bɛsukoa la azo nvasoɛ.—Dwɔ. 1:8, 9.
Yɛyɛ bɛdabɛ mɔɔ esiane mɔɔ ɛsisi kenlensa ye ala bie hanle bɛ la amuala gyakɔ. Yɛyɛ bɛdabɛ noko mɔɔ bɛvale bɛ nwo bɛwulale ngyehyɛleɛ mɔɔ bɛyɛle kɛ bɛfa bɛaboa menli zɛhae mɔ la kɔsɔɔti mo. (Gyi. 11:28-30; Gal. 6:9, 10) Bieko, wɔ asafo biala anu, mediema bie mɔ nwu bɛ mediema ngyianlɛ na bɛboa bɛ. Bɛle kɛ Dɔkase la, ‘bɛyɛ ahunlunyele gyima na bɛboa ehyiavolɛma.’ (Gyi. 9:36) Bɛnwu ye kɛ Gyihova nwu mɔɔ bɛyɛ la na ɔbadua bɛ kakɛ mɔɔ fɛta la.—Mat. 6:3, 4.
Wɔ maanle bie mɔ anu, bɛdabɛ mɔɔ “bɛfa amumuyɛ adwenle a bɛdi bɛ mɛla la” ɛlɛtietia bɛ fanwodi zo. (Edw. 94:20-22) Kɛmɔ Gyisɛse hanle ɛkpɔlɛ ɛhye dole ɛkɛ la ati, bɛlɛfa bɛ rɛle bɛawula Gyihova anu na bɛava akɛnrasesebɛ bɛagyinla ɔ nloa. (Dwɔn 15:19, 20) Yɛkulo kɛ bɛnwu kɛ yɛkakye bɛ wɔ yɛ asɔneyɛlɛ nu dahuu na yɛze kɛ bɛsiezie bɛ nwo, “amaa saa awie biza bɛ bɛ anyelazo ne mɔɔ bɛlɛ ye la anwo edwɛkɛ a bɛahola bɛaye ɔ nloa.”—1 Pita 3:13-15.
Yɛkanvo bɛdabɛ mɔɔ bɛkɔ zo bɛmaa bɛ nwo te ɛvolɛ biala ɔnva nwo kɛ Seetan ɛlɛbɔ mɔdenle amaa ɛbɛla funli ɛbɔlɛ ahɔ ɔ nyunlu la amuala. Ewiade ne ɛbɛlabɔlɛ nwo ngyinlazo ɛlɛtɔ nzule nu ɛdeɛ, noko bɛmɛ “bɛlua Awulae tumi bedevinli ne azo bɛmaa bɛ nwo ɛyɛ se.” (Ɛfɛ. 6:10) “Bɛwula Nyamenle konle tɛladeɛ ne mɔ amuala” na bɛgyinla “Abɔnsam agyiba ne mɔ anloa.” (Ɛfɛ. 6:11, 12) Bɛnwu ye kɛ Gyihova ɛlɛgyinla bɛ neazo kɛnlɛma ne azo abua Seetan mɔɔ tendɛ tia ye la!—Mrɛ. 27:11.
Yɛ nye liele kɛ menli 19,374,737 rale Awulae Ngakyelɛlilɛ ne mɔɔ yɛyɛle ye wɔ ɛvolɛ 2011 anu la. Adekpakyelɛ boavolɛ gyima ne mɔɔ bɛ nuhua dɔɔnwo yɛle ye wɔ April anu la boka nwo bie a manle yɛnyianle menli dɔɔnwo zɛhae a. Azɛlɛ ye azo menli mgbe dɔɔnwo te ɛnelɛ ko mɔɔ Gyihova nɔhalɛ Alasevolɛ ɛlɛfa aye ye ayɛlɛ la! (Wulo. 10:18) Saa ɛboka menli 2,657,377 mɔɔ zonlenle kɛ adekpakyelɛ boavolɛma la anwo anzɛɛ ɛbɔle mɔdenle ɛyɛle dɔɔnwo wɔ zɔhane mekɛ ne anu o, bɛ muala bɛmanle Neazo Eku ne anye liele ɔlua ɛhulolɛ mɔɔ ɛnee bɛlɛ kɛ bɛbayɛ dɔɔnwo la ati.—Edw. 110:3; Kɔl. 3:23.
Ɛkenle ɛvolɛ ne, bɛzɔnenle menli 263,131 mɔɔ yilale bɛ nwo zo manle Gyihova la. Yɛyɛ Gyihova mo, na yɛyɛ bɛ muala mo kɛ bɛboale yɛ bɛmanle yɛhanle kɛ: “‘Bɛla!’ Awie mɔɔ kɛde la ɔdaye ɔha kɛ: ‘Bɛla!’ Bɛdabɛ mɔɔ nzuhɔne ɛlɛku bɛ la, bɛrɛla bɛralie nzule mɔɔ maa ngoane la bɛnlo. Ɔle ahyɛlɛdeɛ, bɛndɔ. Bɛdabɛ mɔɔ bɛkulo la, bɛranlo bie.” (Yek. 22:17) Ɔlua Nyamenle Belemgbunlililɛ ne anwo edwɛkɛ dɔɔnwo mɔɔ yɛzukoale ye wɔ yɛ 2011 maangyeba nyianu ne mɔ abo la ati, yɛfa wuluwuluyɛlɛ yɛka kɛ, “Nyamenle Belemgbunlililɛ ɛrɛla!” Gyisɛse edwɛkɛ mɔɔ ɔhanle kɛ, “Ɔnrɛhyɛ biala na meara” la maa yɛfi ahonle muala nu yɛka ɛzoanvolɛ Dwɔn edwɛkɛ ne bie kɛ: “Amen! Awulae Gyisɛse, bɛla!”—Yek. 22:20.
Mekɛ mɔɔ bɛlɛmaa bɛ nye ala ɛkɛ bɛahendɛ zɔhane mekɛ ne la, bɛnwu ye kɛ bɛdabɛ mediema mrenya nee mraalɛ mɔɔ bɛlɛfa bɛ ‘nyɛleɛ nee nɔhalɛlilɛ’ bɛahile kɛ bɛkulo Gyihova la anu ko biala la yɛ ahonle nwo kpalɛ!—1 Dwɔn 3:18.
Bɛ mediema,
Gyihova Alasevolɛ Neazo Eku