Ninyɛne Nsa Mɔɔ Bamaa Wɔahilehile Kpalɛ
1. Duzu ati a ɔwɔ kɛ yɛbɔ mɔdenle yɛkilehile kpalɛ ɛ?
1 Nolobɔlɛma kɔsɔɔti le kilehilevolɛma. Saa yɛkɔ awie ɛkɛ wɔ mekɛ mɔɔ lumua, yɛlɛkɔ ɛkɛ bieko yɛamaa ye anyelielɛ ne ayɛ kpole anzɛɛ yɛlɛyɛ Baebolo ɛzukoalɛ a, ɛnee yɛlɛkilehile. Debie mɔɔ yɛkile la anwo hyia. Yɛlɛmaa wienyi ne mɔɔ wɔ “Nyamenle Edwɛkɛ ne” mɔɔ kola maa menli nwu ‘nrɛlɛbɛ na bɛnyia ngoanelielɛ la’ ala ali. (2 Tem. 3:15) Nwolɛ adenle kɛnlɛma boni ɛ! Ninyɛne nsa mɔɔ bamaa yɛahilehile kpalɛ la a wɔ ɛke la.
2. Kɛ ɔkɛyɛ na yɛahilehile menli sikalɛ ɛ?
2 Maa Ɔyɛ Sikalɛ: Saa yɛte edwɛkɛ bie abo kpalɛ a, ɔkola ɔmaa yɛ rɛle fi kɛ ɔbahola yeayɛ se yeamaa awie mɔɔ ɔnze la. Saa ɛlɛyɛ Baebolo ɛzukoalɛ a, mmafa edwɛkɛ dɔɔnwo mɔɔ anwo ɛngyia la ɛboka nwo. Emomu, si edwɛkɛ titile mɔɔ wɔ nu la azo. Ɛdendɛlɛ dɔɔnwo ɛngile kɛ ɛkilehile kpalɛ. (Mrɛ. 10:19) Ɔle kpalɛ kɛ ɛbagenga ngɛlɛlera mɔɔ anwo hyia ala la. Ɛkenga ngɛlɛlera bie ɛwie a, fa wɔ adwenle sie foa ne mɔɔ fane edwɛkɛ ne mɔɔ bɛlɛsuzu nwolɛ la azo. Boka Zo Edwɛkɛhanlɛ ne anwo kɛlɛtokɛ mɔɔ wɔ Mateyu tile 5 kɔdwu 7 la lɛ nɔhalɛ edwɛkɛ dɔɔnwo mɔɔ kɔ moa, noko Gyisɛse vale edwɛkɛ ekyi bie hilehilele nuhua sikalɛ.
3. Nvasoɛ boni a wɔ neazo zo a, na nuhua boni a ta boa kpalɛ a?
3 Neazo: Neazo maa menli dwenle, ɔmaa bɛte nganeɛ, na bɛkakye edwɛkɛ. Mmate nganeɛ kɛ ɔwɔ kɛ ɛyɛ awie mɔɔ ze nwɔra to la na wɔahola wɔamaa neazo kpalɛ. Gyisɛse vale neazo sikalɛ mɔɔ ɔbo ɛdelɛ ɛnyɛ se la lile gyima fane dɔɔnwo. (Mat. 7:3-5; 18:2-4) Nvoninli sikalɛ mɔɔ bɛyɛ wɔ kɛlata ekyi bie azo la noko kola boa kpalɛ. Saa ɛdumua ɛsuzu ninyɛne nwo a, ɛbahola wɔava neazo kpalɛ wɔali gyima.
4. Kɛzi yɛbahola yɛava kpuyia yɛali gyima kpalɛ ɛ?
4 Kpuyia: Kpuyia maa sukoavo ne dwenle. Yemɔti ɛbiza kpuyia bie a, si abotane. Saa ɛyɛ ye ndɛndɛ ɛbua a, ɛnrɛnwu kɛzi wɔ sukoavo ne te edwɛkɛ ne abo la. Saa yeambua ye kpalɛ a, ɔbayɛ kpalɛ kɛ ɛbava kpuyia gyɛne wɔaboa ye wɔamaa yeanwu ye, tɛla kɛ ɛbadenrɛ ye zo la. (Mat. 17:24-27) Nɔhalɛ nu, yɛ nuhua biala ɛnle kilehilevolɛ mɔɔ di munli a. Ɛhye ati, Baebolo ne si yɛ adua kɛ yɛnlea yɛ ngilehilelɛ ne boɛ. Yɛyɛ zɔ a, ɔbayɛ nvasoɛ yeamaa yɛ nee menli mɔɔ tie yɛ la dahuu.—1 Tem. 4:16.