Yɛngyakyi Edwɛkɛhanlɛ Ne
1. Kɛzi yɛkola yɛnwu ye kɛ ɛvoya ne mɔɔ lumua la anu edwɛkpakavolɛma angyakyi edwɛkɛhanlɛ ne ɛ?
1 Ɛvoya ne mɔɔ lumua la anu edwɛkpakavolɛma mɔɔ bɔ mɔdenle la bɔle edwɛkpa ne nolo “dahuu” wɔ ɛleka biala mɔɔ menli wɔ la. (Gyi. 5:42) Yemɔti yɛnrɛhola yɛnrɛzuzu kɛ ɛnee bɛlɛkɔ azua nu a bɛse menli nwo mɔɔ bɛnga edwɛkɛ ne bɛngile bɛ a. Eza bɛnrɛgyakyi kɛ bɛkɛha edwɛkɛ ne wɔ mekɛ mɔɔ bɛkpɔne daselɛlilɛ na bɛlɛkɔ gua nu mɔɔ bɛnle daselɛlilɛ nu la. Kɛmɔ Gyisɛse yɛle la, bɛdabɛ noko bɛngyakyi edwɛkɛhanlɛ ne.—Mak. 6:31-34.
2. Duzu a kile kɛ yɛlɛbɔ yɛ duma ne anwo ɛbɛla a?
2 Dahuu Yɛsiezie Yɛ Nwo: Yɛ duma, Gyihova Alasevolɛ, ɛnga mɔɔ yɛyɛ la anwo edwɛkɛ; ɔkile menli mɔɔ yɛle la. (Aye. 43:10-12) Yemɔti dahuu yɛsiezie yɛ nwo kɛ yɛbaha yɛ anyelazo ne anwo edwɛkɛ wɔ mekɛ bɔbɔ mɔɔ tɛ azua nu a yɛlɛkɔ la. (1 Pita 3:15) Asoo ɛkola ɛnwu gyinlabelɛ bie mɔɔ bamaa wɔali awie daselɛ wɔ mekɛ mɔɔ ɛnle daselɛlilɛ nu na akee ɛsuzu mɔɔ ɛbaha la anwo? Asoo ɛfa mbuluku mɔɔ ɛbava wɔamaa menli mɔɔ anye die nwolɛ la? (Mrɛ. 21:5) Ɛka edwɛkɛ ne wɔ azua nu, anzɛɛ saa ɔkɛyɛ boɛ a ɛbɔ edwɛkpa ne nolo wɔ ɛleka ngakyile ɔ?
3. Edwɛkɛkpɔkɛ boni a fɛta kpalɛ maa edwɛkɛ ne mɔɔ yɛka ye wɔ gua zo, ɛleka mɔɔ kale gyinla, gyima nu nee mɔɔ ɛha la ɛ?
3 “Bagua Nu” Daselɛlilɛ: Ɛzoanvolɛ Pɔɔlo hanle kɛ ɔhanle edwɛkɛ ne wɔ “bagua nu” nee azua nu. (Gyi. 20:20) Yemɔti “bagua nu” daselɛlilɛ a bayɛ edwɛkɛkpɔkɛ mɔɔ fɛta mɔɔ yɛbava yɛavɛlɛ edwɛkɛ ne mɔɔ yɛka ye wɔ gua zo nee ɛleka mɔɔ kale gyinla, nwɔhoalilɛleka, gyima nu nee mɔɔ ɛha la a. Ɔle nɔhalɛ kɛ azua nu daselɛlilɛ a tɛde adenle titile mɔɔ boa maa yɛka Belemgbunlililɛ ne anwo edwɛkɛ ne yɛkile menli a. Noko akee, ɛvoya ne mɔɔ lumua la anu edwɛkpakavolɛma vale bɛ adwenle ziele menli nwo zo, bɛanva bɛanzie azua zo. Bɛluale adenle biala azo bɛhanle nɔhalɛ ne anwo edwɛkɛ wɔ bagua nu, mekɛ mɔɔ bɛnle daselɛlilɛ nu yɛɛ azua nu. Ɔrɛla ye kɛ yɛbanyia adwenle ko ne ala bie amaa yɛawie yɛ ɛzonlenlɛ gyima ne bɔkɔɔ.—2 Tem. 4:5.