Mmatwehwenle Ɛ Bo Aze
1. Duzu a hyia akɛnrasesebɛ a, na kɛmɔti ɛ?
1 Wɔhwehwenle ɛ bo aze kɛ ɛbali daselɛ wɔ sukulu ɔluakɛ ɛnee ɛsulo kɛ bɛbazele wɔ ɔ? Saa ɛse nyiane a, ɛnee ɔhyia akɛnrasesebɛ na wɔahola wɔadendɛ. Duzu a baboa wɔ a?
2. Saa yɛlɛdi daselɛ wɔ sukulu a, kɛzi ɔhyia adwenle kpalɛ ɛ?
2 Fa Adwenle Kpalɛ Di Gyima: Ɛbahola wɔabu sukulu ɛkɛ ni kɛ ɔle wɔ azɛlɛsinli ɛdeɛ, noko kakye kɛ ɛnyelɛ ɛnla kɛ ɛ nee awie biala kɛbɔ sunsum nu adwelielilɛ bo kɛmɔ anrɛɛ ɛbayɛ ye wɔ mekɛ mɔɔ ɛlɛdi daselɛ wɔ azua nu la. Nwu mekɛ mɔɔ ɔwɔ kɛ ɛtendɛ la. (Nolo. 3:1, 7) Debie mɔɔ bɛlɛsuzu nwo wɔ sukulu anzɛɛ gyimayɛlɛ bie bamaa wɔanyia adenle wɔaha wɔ diedi ne anwo edwɛkɛ. Bie a ɛ gɔnwo bie babiza wɔ deɛmɔti ɛnva ɛ nwo ɛnwula ninyɛne bie mɔ anu la anwo edwɛkɛ. Keleseɛnema bie mɔ ɛha ɛhile bɛ kilehilevolɛma wɔ sukulu ɛvolɛ ne mɔlebɛbo kɛ bɛle Gyihova Alasevolɛ na bɛmaa bɛ buluku mɔɔ kilehile bɛ diedi ne anu la. Bie mɔ ɛgyakyi mbuluku ɛgua bɛ ɛkponle ne azo amaa bɛ gɔnwo mɔ abiza nwolɛ edwɛkɛ.
3. Kɛzi ɛbahola wɔaziezie ɛ nwo na wɔali daselɛ wɔ sukulu ɛ?
3 Siezie Ɛ Nwo: Saa ɛsiezie ɛ nwo a, wɔ anwodozo ne bayɛ kpole. (1 Pita 3:15) Yemɔti bɔ mɔdenle nwu kpuyia mɔɔ bɛbabiza la, na dwenle kɛzi ɛbahola wɔabua la anwo. (Mrɛ. 15:28) Saa ɔkɛyɛ boɛ a, fa wɔ Baebolo ne yɛɛ mbuluku ekyi mɔɔ le kɛ Reasoning buluku, Young People Ask mbuluku nee edwɛkɛ mɔɔ fane abɔdeɛ nwo la sie sukulu ɛkɛ, amaa saa nwolɛ hyia a wɔanlea nu. Ka kile wɔ awovolɛ maa bɛyɛ nwolɛ yɛkile wɔ bɛ abusua ɛzonlenlɛ ne anu.
4. Duzu ati a ɔwɔ kɛ ɛkɔ zo ɛdi daselɛ wɔ sukulu a?
4 Nyia Anwodozo: Mmadwenle kɛ ɛka nɔhalɛ ne anwo edwɛkɛ biala a ɛ gɔnwo mɔ sukuluma bazele wɔ. Bie mɔ anye balie wɔ akɛnrasesebɛ ne anwo na bɔbɔ bɛadie. Noko saa awie biala andie a mmamaa ɔgyegye wɔ. Gyihova anye balie kɛ ɛbɔle nwolɛ mɔdenle la. (Hib. 13:15, 16) Kɔ zo sɛlɛ ye kɛ ɔmaa wɔ ‘akɛnrasesebɛ ɔmaa ɛhola ɛha edwɛkɛ’ ne. (Gyi. 4:29; 2 Tem. 1:7, 8) Saa awie tie a nea kɛzi ɛ nye balie la. Ahenle zɔhane bahola aboka ɛ nwo bɔbɔ bɛazonle Gyihova!