Kpuyia Ɛleka

◼ Yɛlɛyɛ anlenkɛnloa Baebolo ɛzukoalɛ a ɔwɔ kɛ yɛyɛ asɔne ɔ?

Saa yɛfa asɔneyɛlɛ yɛbɔ Baebolo ɛzukoalɛ bo na yɛfa yɛkpɔne a nvasoɛ dɔɔnwo wɔ zo. Saa yɛyɛ asɔne a, yɛsɛlɛ Gyihova sunsum nwuanzanwuanza ne kɛ ɔboa yɛ adawubɔlɛ ne. (Luku 11:13) Asɔneyɛlɛ noko maa sukoavo ne nwu kɛzi ye Baebolo ɛzukoalɛ ne anwo hyia na ɔkile ye kɛzi bɛyɛ asɔne la. (Luku 6:40) Ɛhye ati, ɔle kpalɛ kɛ saa ɔkɛyɛ boɛ a ndɛndɛ ne ala yɛfa asɔneyɛlɛ yɛbɔ ɔ bo. Noko akee, kɛmɔ gyinlabelɛ ne kakyi la ati, ɔwɔ kɛ ahenle mɔɔ ɛlɛyɛ debiezukoalɛ ne la si asɔne mɔɔ ɔbayɛ wɔ anlenkɛnloa Baebolo ɛzukoalɛ nu la anwo kpɔkɛ.

Debie ko mɔɔ hyia kɛ ɔsuzu nwolɛ la a le ɛleka mɔɔ bɛyɛ debiezukoalɛ ne la. Saa ɔnle wienyi nu somaa a, ɔbahola yeavi nrɛlɛbɛ nu yeayɛ asɔne sikalɛ yeava yeabuke debiezukoalɛ mɔɔ bɛta bɛyɛ la na yeava asɔneyɛlɛ yeakpɔne. Noko akee, saa ɔyɛ zɔ a menli dɔɔnwo banlea bɛ anzɛɛ ɔbagyegye sukoavo ne a, ɔbayɛ kpalɛ kɛ bɛkendɛ bɛkɔkpula mekɛ mɔɔ bɛbahola bɛayɛ debiezukoalɛ ne wɔ ɛleka mɔɔ menli dɔɔnwo ɛnrɛnwu bɛ la. Ɔnva nwo ɛleka mɔɔ yɛyɛ debiezukoalɛ ne la, ɔwɔ kɛ yɛfa adwenle kpalɛ yɛsuzu mekɛ mɔɔ ɔwɔ kɛ yɛyɛ asɔne la anwo.—Nea March 2005 Our Kingdom Ministry, mukelɛ 8.