5 Mekɛ Nee Ɛleka Ne Anwo Hyia Ɔ?

WƆYƐ ye nzonlɛ kɛ ɛzonlenlɛ dɔɔnwo ta si asɔne azua mgbole na bɛkile kenle nee mekɛ fɔɔnwo mɔɔ ɔwɔ kɛ bɛyɛ asɔne wɔ nu la ɔ? Asoo Baebolo ne kile mekɛ nee ɛleka fɔɔnwo bie mɔɔ ɔwɔ kɛ yɛyɛ asɔne la ɔ?

Baebolo ne ka mekɛ bie mɔ mɔɔ yɛbahola yɛayɛ asɔne la anwo edwɛkɛ. Kɛ neazo la, kolaa na Gyisɛse nee ye ɛdoavolɛma ne ali debie la, ɔyɛle asɔne ɔlale Nyamenle ase. (Luku 22:17) Yɛɛ mekɛ mɔɔ ye ɛdoavolɛma ne yiale nu kɛ bɛsonle la, bɛyɛle asɔne. Dwuuma amaamuo mɔɔ ɛnee kɔ zo wɔ bɛ nyianu azua nee bɛ ɛzonlenlɛ azua mɔɔ wɔ Gyɛlusalɛm anu la a ɛnee bɛlɛtoa zo a. Ɛnee ɔle Nyamenle adwenle kɛ bɛbavɛlɛ ɛzonlenlɛsua ne “maanle maanle asɔneyɛlɛ sua.”​—Maake 11:17.

Saa Nyamenle azonvolɛ bɔ nu yɛ asɔne a, ɔyɛ gyima kpalɛ. Saa koyɛlɛ wɔ menli mɔɔ wɔ ekpunli ne anu la avinli na bɛ asɔneyɛlɛ ne gyi Baebolo ngyinlazo zo a, Nyamenle anye die nwo. Bɛ asɔneyɛlɛ ne bahola aha ye yeamaa yeayɛ ninyɛne mɔɔ bɛ nye ɛnla bɔbɔ la. (Hibuluma 13:18, 19) Gyihova Alasevolɛ yɛ asɔne wɔ bɛ ayia biala abo. Yɛto ɛsalɛ yɛavɛlɛ wɔ kɛ kɔ Belemgbunlililɛ Asalo mɔɔ bikye wɔ la anu amaa wɔade asɔneyɛlɛ ɛhye mɔ bie.

Noko akee, Baebolo ne ɛngile mekɛ nee ɛleka fɔɔnwo bie mɔɔ ɔwɔ kɛ yɛyɛ asɔne la. Nyamenle azonvolɛ mɔɔ bɛyɛle asɔne wɔ mekɛ nee ɛleka ngakyile la anwo edwɛkɛ wɔ Baebolo ne anu. Gyisɛse hanle kɛ: “Noko saa ɛyɛ asɔne a, kɔvea wɔ suakunlu, na ɛto wɔ anlenkɛ ne anu a, wɔazɛlɛ ɛ Ze ne mɔɔ wɔ fealeranu la. Na ɛ Ze ne mɔɔ nwu fealeranu debie la badua wɔ kakɛ.”​—Mateyu 6:6.

Asoo ɛhye ɛnyɛ anyelielɛ? Ɛbahola wɔayɛ asɔne wɔahile anwuma nee aze Belemgbunli ne mekɛ biala, bɔbɔ wɔ fealeranu. Na nyia anwodozo kɛ ɔbadie wɔ. Ɔnyɛ nwanwane kɛ ɛnee Gyisɛse ta kɔ ɛleka koonwu kɔyɛ asɔne la! Mekɛ bie, ɔyɛle asɔne nɔe ne amuala ɔkpondɛle adehilelɛ ɔzile kpɔkɛ mɔɔ anwo hyia la.​—Luku 6:​12, 13.

Baebolo ne ka mrenyia nee mraalɛ bie mɔ mɔɔ bɛyɛle asɔne wɔ mekɛ mɔɔ ɛnee ɔwɔ kɛ bɛsi kpɔkɛ mɔɔ anwo hyia anzɛɛ bɛlɛyia ngyegyelɛ mɔɔ anu yɛ se la anwo edwɛkɛ. Ɛnee ɔdwu mekɛ ne bie a bɛyɛ asɔne ne kpole anzɛɛ bɛyɛ ye wɔ bɛ ti anu; yɛɛ ɔyɛ noko a bɛ ngome bɛyɛ asɔne anzɛɛ bɛyia nu kɛ ekpunli bɛyɛ. Mɔɔ hyia kpalɛ la a le kɛ ɛnee bɛyɛ asɔne. Nyamenle to ɛsalɛ fɛlɛ ye azonvolɛ kɛ: “Bɛhɔ zo bɛyɛ asɔne.” (1 Tɛsalonaekama 5:17) Ɔlɛ ɛhulolɛ kɛ ɔbadie bɛdabɛ mɔɔ bɛyɛ ye ɛhulolɛdeɛ la asɔneyɛlɛ. Asoo ɛhye ɛnla Nyamenle ɛlɔlɛ ne ali ɔ?

Wɔ ewiade ɛhye mɔɔ menli ɛnlie bɛ nwo ɛnli la anu, bɛnlie bɛnli kɛ nvasoɛ wɔ asɔneyɛlɛ zo. Bie a ɛbabiza kɛ, ‘Asoo ɔbaboa me ɔ?’