Gyihova Ɛlɛtete Yɛ Amaa Gyima Ɛhye
1. Saa Gyihova fa gyima maa menli a, duzu a eza ɔyɛ a?
1 Mekɛ biala mɔɔ Gyihova kɛva gyima kɛmaa menli la, eza ɔfa moalɛ mɔɔ bɛhyia na bɛahola bɛayɛ gyima ne la ɔmaa bɛ. Kɛ neazo la, mekɛ mɔɔ Gyihova hanle hilele Nowa kɛ ɔbobɔ ɛlɛne, debie mɔɔ ɛnee Nowa ɛtɛyɛle bie ɛlɛ la, eza Ɔhilele kɛzi ɔbayɛ ye la. (Mɔl. 6:14-16) Mekɛ mɔɔ Gyihova hanle hilele Mosisi, mboaneneavolɛ mɔɔ bɛlɛ ɔ nwo aze la kɛ ɔhɔ Yizilayɛ mgbanyima nee Falo anyunlu la, ɔhanle ɔhilele ye kɛ: “Kɔ na mebade ɛ nloa na meahilehile wɔ mɔɔ ɛbaha la.” (Ade. 4:12) Edwɛkpa ne anwo nolobɔlɛ gyima ne mɔɔ yɛlɛyɛ la, Gyihova ɛhile yɛ kɛzi yɛbayɛ ye la. Ɔlɛdua Teokelase Ɛzonlenlɛ Sukulu nee Ɛzonlenlɛ Nyianu ne azo yeatete yɛ yeamaa yɛayɛ gyima ɛhye. Kɛ ɔkɛyɛ na yɛanyia ndetelɛ ɛhye azo nvasoɛ ɛ?
2. Kɛ ɔkɛyɛ na yɛanyia Teokelase Ɛzonlenlɛ Sukulu ne azo nvasoɛ ɛ?
2 Teokelase Ɛzonlenlɛ Sukulu Ne: Dumua suzu edwɛkɛ ne mɔɔ bɛhyehyɛ la anwo kolaa na wɔahɔ debiezukoalɛ ko biala abo. Akee saa ɛnwu kɛzi sukoavoma ne kilehile edwɛkɛ ɛhye anu wɔ bɛ ɛdendɛlɛ nu a, ɔbamaa wɔanwu kɛzi bɛkilehile la kpalɛ. (Mrɛ. 27:17) Fa wɔ Ministry School buluku ne kɔ debiezukoalɛ bo na nea nuhua. Saa sukoavo ko biala wie ye gyimalilɛ ne na sukulu zo neavolɛ ne twe adwenle kɔ Ministry School buluku ne azo a, pepɛ edwɛkɛtitile mɔɔ ɛkulo kɛ ɛfa ɛdi gyima la abo na kɛlɛ ninyɛne mɔɔ wɔyɛ bɛ nzonlɛ la wɔ ɔ nloa ɛkɛ. Noko akee, mɔɔ bamaa wɔanyia sukulu ɛhye azo nvasoɛ kpalɛ la a le kɛ ɛkɛva ɛ nwo ɛkɛwula nuhua. Wɔhɛlɛ wɔ duma wɔ sukulu ne anu ɔ? Saa ɛnyia gyimalilɛ a, siezie ɛ nwo kpalɛ na fa nwolɛ folɛdulɛ ne di gyima. Saa ɛwɔ daselɛlilɛ nu a, fa mɔɔ wɔzukoa la di gyima.
3. Duzu a baboa yɛ yeamaa yɛanyia Ɛzonlenlɛ Nyianu ne azo nvasoɛ a?
3 Ɛzonlenlɛ Nyianu: Saa yɛbahakye nzuzulɛ mɔɔ bɛbava bɛamaa wɔ debiezukoalɛ ɛhye abo la kpalɛ a, ɔwɔ kɛ yɛdumua yɛkenga nuhua fane dɔɔnwo na yɛsiezie yɛ nwo kɛ yɛbamaa mualɛ. Saa yɛmaa yɛ mualɛ ne yɛ ezinra a, ɔbamaa menli dɔɔnwo ahola amaa mualɛ. Nea yɛkile mɔɔ bɛbayɛ la boɛ, na fa nzuzulɛ biala mɔɔ ɛnea a ɔbaboa yeamaa wɔabɔ mɔdenle wɔ daselɛlilɛ nu la di gyima. Saa edwɛkɛ bie mɔɔ hyia la ba Yɛ Belemgbunlililɛ Gyima ne anu a, fa sie na wɔava wɔali gyima kenlebie.
4. Duzu ati a ɔwɔ kɛ yɛfa teokelase ndetelɛ yɛdi gyima kpalɛ ɛ?
4 Kɛmɔ gyima mɔɔ bɛvale bɛmanle Nowa nee Mosisi de la, zɔhane ala a edwɛkpa ɛhye mɔɔ yɛbɔ ye nolo wɔ aleɛabo amuala la yɛ se a. (Mat. 24:14) Saa yɛfa yɛ nwo yɛto Gyihova, yɛ Kilehilevolɛ Kpole ne anwo zo na yɛfa ndetelɛ mɔɔ ɔfa ɔmaa yɛ la yɛdi gyima kpalɛ a, yɛbahola yɛayɛ ye bɔkɔɔ.—Aye. 30:20.