Bɛmaa Yɛhile Yɛ Anyezɔlɛ Yɛbayɛ Ngakyelɛlilɛ Ne Wɔ April 17
1. Edwɛndolɛnli ne nganeɛdelɛ boni a baboa yɛ titile wɔ Ngakyelɛlilɛ mekɛ ne anu a?
1 Gyihova anwunvɔnezelɛ nee ye ngoanelielɛ dɔɔnwo ne hanle edwɛndolɛnli ne manle ɔbizale kɛ: “Duzu yɛɛ menva memaa [Gyihova], wɔ ye ahyɛlɛdeɛ ɛwolaa ye anwo a?” (Edw. 116:12) Ɛnɛ, Nyamenle menli lɛ ninyɛne dɔɔnwo mɔɔ bɛdua zo bɛkile bɛ anyezɔlɛ a. Bɛhɛlɛle edwɛkɛ ɛhye bɛwiele la ɔ nzi ɛvoyia dɔɔnwo anu, Gyihova vale ahyɛlɛdeɛ mɔɔ tɛla biala la—ɛkpɔnedeɛ ne, manle alesama. Mekɛ mɔɔ yɛlɛsiezie yɛ nwo yɛahakye Kelaese ewule ne wɔ April 17 la, yɛlɛ debie kpalɛ mɔɔ yɛbalua zo yɛahile yɛ anyezɔlɛ ne a.—Kɔl. 3:15.
2. Ninyɛne mɔɔ ɔti yɛkile ɛkpɔnedeɛ ne anwo anyezɔlɛ la bie mɔ a le boni?
2 Ɛkpɔnedeɛ Ne Azo Nyilalɛ: Ɔlua ɛkpɔnedeɛ ne azo, ‘bɛva yɛ ɛtane bɛhyɛ yɛ.’ (Kɔl. 1:13, 14) Ɛhye maa yɛfa adwenle mɔɔ anu te la yɛsonle Gyihova. (Hib. 9:13, 14) Yɛkola yɛbikye Gyihova wɔ asɔneyɛlɛ nu mɔɔ yɛnzulo a. (Hib. 4:14-16) Menli mɔɔ kɛnyia ɛkpɔnedeɛ ne anu diedi la banyia dahuu ngoane nwo anyelazo kɛnlɛma ne!—Dwɔn 3:16.
3. Kɛzi yɛbahola yɛamaa Gyihova anwu ɛkpɔnedeɛ ne anwo anyezɔlɛ mɔɔ yɛlɛ la ɛ?
3 Kɛzi Yɛkile Nwolɛ Anyezɔlɛ La: Adenle ko mɔɔ yɛdua zo yɛkile kɛ yɛ nye sɔ ɛkpɔnedeɛ ne la a le kɛ yɛbagenga Ngakyelɛlilɛ Baebolo ɛgengalɛ ne kenle biala na yɛadwenledwenle nwolɛ. Bɛzieziele February 1, 2011, Watchtower (Nrelenza ɛdeɛ) ne anu edwɛkɛ ne mɔɔ se, “Are You Prepared for the Most Important Day of the Year?” la kɛ ɔboa yɛ ɔmaa yɛyɛ ɛhye. Eza yɛbahola yɛavi ahonle nu yɛaha kɛzi ɛkpɔnedeɛ ne sonle bolɛ maa yɛ la anwo edwɛkɛ yɛahile Gyihova wɔ asɔneyɛlɛ nu. (1 Tɛs. 5:17, 18) Ngakyelɛlilɛ ne abo mɔɔ yɛbahɔ la kile kɛ yɛtie Gyisɛse edwɛkɛ na ɔkile anyezɔlɛ mɔɔ yɛlɛ la. (1 Kɔl. 11:24, 25) Bieko, yɛbahola yɛazukoa Gyihova ɛlɔlɛ kpole ne na yɛado ɛsalɛ yɛavɛlɛ menli dodo biala mɔɔ yɛkɛhola la yɛamaa bɛara Ngakyelɛlilɛ ne bie.—Aye. 55:1-3.
4. Duzu a ɔwɔ kɛ yɛbɔ kpɔkɛ kɛ yɛbayɛ a?
4 Gyihova menli mɔɔ anye sɔ mɔɔ yeyɛ la ɛnrɛbu Ngakyelɛlilɛ ne kɛ ɔle debiezukoalɛ ne bie ala. Ɔle nyianu mɔɔ sonle bolɛ tɛla biala wɔ ɛvolɛ ne anu! Mekɛ mɔɔ Ngakyelɛlilɛ ne ɛlɛbikye la, ɔrɛla ye kɛ yɛbabɔ kpɔkɛ kɛ edwɛndolɛnli ne mɔɔ hanle kɛ: “O me ɛkɛla, ye [Gyihova] ayɛlɛ, na mmamaa ɛ rɛle fi ye ahunlunyele ne mɔ” la.—Edw. 103:2.