Tete Ɛ Mra Maa Bɛyɛ Nolobɔlɛma
1. Duzu a Edwɛndolɛ 148:12, 13 ka kile Keleseɛne awovolɛ kɛ bɛyɛ a?
1 Gyihova to ɛsalɛ fɛlɛ ngakula kɛ bɛye ye ayɛlɛ. (Edw. 148:12, 13) Ɛhye ati, Keleseɛne awovolɛ ɛngilehile bɛ mra Baebolo ne anu nɔhalɛ ne nee Nyamenle mɛla mɔɔ fane ɛbɛlabɔlɛ kpalɛ nwo la angomekye. Eza bɛtete bɛ bɛmaa bɛyɛ edwɛkpa ne anwo nolobɔlɛma. Kɛ ɔkɛyɛ na bɛayɛ ɛhye bɛamaa yeanyia anyuhɔlɛ ɛ?
2. Kɛzi awovolɛ bie neazo kpalɛ bahola aha ɔ mra ɛ?
2 Neazo Kpalɛ: Ndɛnebuavolɛ Gidɛyɔn zele menli 300 ne kɛ: “Awie biala ɛnlea me.” (Maa. 7:17) Ngakula ta nea bɛ awovolɛ na bɛsukoa bɛ. Selɛ bie yɛ nɔɔzo gyima, noko saa ɔba sua nu Folɛ nwonlomɔ a, kɛ anrɛɛ ɔkɛla la, ɔ nee ɔ mra ne mɔ kɔ daselɛlilɛ wɔ mekɛ bɔbɔ mɔɔ yevɛ kpalɛ la. Ɔdua ɛhye azo ɔkilehile bɛ kɛ daselɛlilɛ hyia kpalɛ mɔɔ ɔmbuke ɔ nloa a. (Mat. 6:33) Asoo ɛ mra nwu kɛ ɛfi anyelielɛ nu ɛfa ɛ nwo ɛwula ɛzonlenlɛ ne afoa ngakyile mɔɔ le kɛ asɔneyɛlɛ, Baebolo ɛgengalɛ yɛɛ mualɛmanlɛ nu na ɛkɔ daselɛlilɛ ɔ? Nɔhalɛ nu, ɛnrɛhola ɛnrɛyɛ neazo mɔɔ di munli la ɛdeɛ. Noko saa ɛ mra ne mɔ nwu mɔdenlebɔlɛ mɔɔ ɛlɛfa wɔazonle la a, bɛbalie mɔdenle mɔɔ ɛlɛbɔ kɛ ɛkilehile bɛ wɔamaa bɛazonle Gyihova la bɛado nu.—Mɛla 6:6, 7; Wulo. 2:21, 22.
3. Sunsum nu bodane mɔɔ maa anyuhɔlɛ la boni a ɔwɔ kɛ awovolɛ boa bɛ mra maa bɛfa bɛsie bɛ nyunlu na bɛdwu nwo a?
3 Bodane Mɔɔ Maa Anyuhɔlɛ: Awovolɛ bɔ mɔdenle ɛsesebɛ kile bɛ mra ɛdialɛ, ɛdendɛlɛ, kɛzi bɛsiezie bɛ nwo nee mɔɔ bokɛboka nwo la. Mekɛ mɔɔ ngakula ɛlɛnyi na bɛkola bɛyɛ ninyɛne titile bie mɔ la, bɛfa bodane fofolɛ bɛsie bɛ nyunlu. Saa awovolɛ ne mɔ le Keleseɛnema a, eza bɛboa bɛ mra bɛmaa bɛfa sunsum nu bodane mɔɔ bɛ ɛvolɛ nee bɛ mɔdenlebɔlɛ bɛamaa bɛahola bɛadwu nwolɛ la bɛsie bɛ nyunlu. (1 Kɔl. 9:26) Asoo ɛlɛkilehile ɛ mra wɔamaa bɛava bɛdabɛ mumua ne bɛ edwɛkɛ bɛamaa mualɛ na bɛaziezie ɛdendɛlɛ mɔɔ bɛkɛnyia wɔ Teokelase Ɛzonlenlɛ Sukulu ne anu la ɔ? (Edw. 35:18) Ɛlɛboa bɛ wɔamaa bɛayɛ ɛzonlenlɛ gyima afoa ngakyile ne bie ɔ? Ɛlɛfa ɛzɔnenlɛ nee dahuu ɛzonlenlɛ gyima ne anwo bodane wɔazie bɛ nyunlu ɔ? Ɛlɛbɔ mɔdenle wɔamaa bɛava edwɛkpakavolɛma mɔɔ fa anyelielɛ yɛ bɛ gyima ne mɔɔ bɛamaa bɛ anwosesebɛ la agɔnwolɛ ɔ?—Mrɛ. 13:20.
4. Saa ngakula nyia awovolɛ tete bɛ wɔ daselɛlilɛ nu fi bɛ ngakula nu a kɛzi bɛnyia zolɛ nvasoɛ ɛ?
4 Edwɛndovo ne hanle kɛ: “O Nyamenle, ɔvi me mgbavolɛ nu yɛɛ ɛvale me ɛhilehilelɛ a, yɛɛ metɛbɔ wɔ nwanwane nyɛleɛ ne mɔ nolo.” (Edw. 71:17) Bɔ ɔ bo tete ɛ mra wɔ bɛ ngakula nu maa bɛyɛ nolobɔlɛma. Sunsum nu adiabo mɔɔ ɛbaboa bɛ wɔamaa bɛado la baboa bɛ kpalɛ wɔ mekɛ mɔɔ bɛkɛnyi la!—Mrɛ. 22:6.