Ɛbahola Wɔaboa Kunli Anzɛɛ Yelɛ Mɔɔ Ɔnle Adiema La Ɔ?
1. Duzu ati a tɛ Keleseɛnema mɔɔ wɔ abusua mɔɔ bɛ kɔsɔɔti bɛnle mediema la angomekye a kulo kɛ bɛboa bɛ hu anzɛɛ bɛ ye mɔɔ ɔnle adiema la bɛmaa ɔnwu nɔhalɛ ne ɛ?
1 Asoo nolobɔlɛma mɔɔ wɔ wɔ asafo ne anu la bie mɔ lɛ kunli anzɛɛ yelɛ mɔɔ ɔnle adiema ɔ? Saa ɔle zɔ a, ɛnee ɔda ali kɛ nolobɔlɛma ɛhye mɔ kulo kɛ bɛ hu anzɛɛ bɛ ye mɔ baboka bɛ nwo wɔ nɔhalɛ ɛzonlenlɛ nu. Noko tɛ bɛ ngomekye a bɛlɛ zɔhane ɛhulolɛ ne a. Asafo ne kɔsɔɔti lɛ ɛhulolɛ mɔɔ Nyamenle lɛ la bie kɛ “menli kɔsɔɔti nwu nɔhalɛ ne na bɛnyia ngoane.” (1 Tem. 2:4) Kɛ ɔkɛyɛ na yɛaboa nolobɔlɛma mɔɔ wɔ yɛ asafo ne anu mɔɔ bɛ hu anzɛɛ bɛ ye mɔ ɛnle mediema la ɛ?
2. Kɛzi yɛnyia ndelebɛbo a, ɔbamaa yɛaboa kunli anzɛɛ yelɛ mɔɔ ɔnle adiema la ɛ?
2 Mɔɔ lumua la, ɔwɔ kɛ yɛbɔ mɔdenle yɛnwu ahenle mɔɔ ɛnle adiema la adwenle. Kunlima anzɛɛ yelɛma dɔɔnwo kulo bɛ abusua na bɛbɔ mɔdenle kɛ bɛkɛyɛ kunli anzɛɛ yelɛ yɛɛ awovolɛ kpalɛ, noko bie a bɛlɛ diedi mɔɔ le ngakyile fi yɛ ɛdeɛ ne anwo a. Bie a bɛnze Gyihova Alasevolɛ anwo edwɛkɛ dɔɔnwo kɛ ekyi mɔɔ menli mɔɔ ɛngulo yɛ edwɛkɛ ɛha ɛhile bɛ la ala. Mekɛ mɔɔ bɛ hu anzɛɛ bɛ ye fa nea abusua ne mɔɔ ɛnɛ ɔfa ɔkɔ debiezukoalɛ la gyegye bie mɔ. Ndelebɛbo baboa yɛ yeamaa yɛavi atiakunlukɛnlɛma nu yɛali awie mɔɔ ɔnle adiema la eni, amaa saa yɛkɔ ɔ nwo ɛkɛ ne a, ye ahonle andu.—Mrɛ. 16:20-23.
3. Adenle kpalɛ boni a yɛbahola yɛalua zo yɛaboa awie mɔɔ ɔnle adiema la ɛ?
3 Kile Ɔ Nwo Anyelielɛ: Yɛ subane a le adenle kpalɛ mɔɔ lumua mɔɔ yɛdua zo yɛboa kunli anzɛɛ yelɛ mɔɔ ɔnle adiema la yɛmaa ɔnwu nɔhalɛ ne a, na tɛ Baebolo nu adwelielilɛ ɔ. (1 Pita 3:1, 2) Debie mɔɔ hyia wɔ ɛhye anwo la a le kɛ yɛkɛnyia ɔ nwo anyelielɛ. Mediema mraalɛ mɔɔ wɔ asafo ne anu la bahola amaa bɛ nye alie yelɛ mɔɔ ɔnle adiema la anwo yɛɛ mediema mrenya noko bahola amaa bɛ nye alie kunli mɔɔ ɔnle adiema la anwo. Wɔ adenle boni azo?
4. Kɛ ɔkɛyɛ na yɛahile awie anwo anyelielɛ ɛ?
4 Saa ɛtɛnwunle kunli anzɛɛ yelɛ ne a, ɛbahola ɛ nee kunli anzɛɛ yelɛ ne mɔɔ le adiema la alumua azuzu nwolɛ. Saa mɔlebɛbo ne kunli anzɛɛ yelɛ ne mɔɔ ɔnle adiema la anye anlie nwo a, mmamaa ɔgyegye wɔ. Ye agɔnwolɛ mɔɔ yɛbava na yɛahile ɔ nwo anyelielɛ la baha ye yeamaa yeanyia Gyihova Alasevolɛ anwo adwenle kpalɛ. (Wulo. 12:20) Keleseɛnema mɔɔ ɛnyi wɔ sunsum nu la bie mɔ ɛdo ɛsalɛ ɛvɛlɛ awie mɔɔ ɔnle adiema la na bɛ nee ye abusua ne ɛli debie, mɔɔ adwenle ne a le kɛ bɛmaa yeanwu bɛ kpalɛ amaa bɛaye adwenle ɛtane biala mɔɔ ɔlɛ la bɛavi ɛkɛ. Bɛ nee bɛ ta ka ninyɛne mɔɔ bɛ nye die nwolɛ la anwo edwɛkɛ tɛla kɛ bɛkɛha sunsum nu ninyɛne nwo edwɛkɛ. Nzinlii, saa ahenle mɔɔ ɔnle adiema la ahonle tɔ ye azule nu a, akee bɛ nee ye ka Ngɛlɛlera ne anu edwɛkɛ. Anzɛɛ bie a ɔbalie yeado nu kɛ ɔbara yɛ debiezukoalɛ ne ko amaa yeanwu debie mɔɔ ɔ ye ɛlɛsukoa la, ɔluakɛ yelumua yenwu menli mɔɔ wɔ asafo ne anu la bie mɔ. Saa bɔbɔ ɔ nye ɛnlie kɛ ɔbazukoa nɔhalɛ ne a, yɛbahola yɛahanvo ye kɛ ɔlɛboa ɔ ye ne mɔɔ le adiema raalɛ ne la.
5. Kɛzi mgbanyima bahola aboa awie mɔɔ ɔnle adiema la ɛ?
5 Ɔwɔ kɛ mgbanyima ne mɔ titile yɛɛ boa kunli anzɛɛ yelɛ mɔɔ ɔnle adiema la na bɛfa nwolɛ adenle ne bɛdi ye daselɛ a. Awie mɔɔ ɔnle adiema mɔɔ ɔndie Baebolo ne anu edwɛkɛ la bahola adie Ngɛlɛlera ne anu anwosesebɛmanlɛ wɔ mekɛ mɔɔ ɔla asopiti anzɛɛ ɔ nwo kɛdo ye kpole la. Saa abusua mɔɔ bɛ kɔsɔɔti bɛnle mediema la yia ngyegyelɛ na abusua ne anu sonla bie wu a, mgbanyima ne mɔ bɛahola amaa ahenle mɔɔ ɔnle adiema la aboka abusua ne anwo wɔ mekɛ mɔɔ bɛlɛkyekye bɛ rɛle la.
6. Adwenle boni mɔ ati a ɔwɔ kɛ yɛboa kunli anzɛɛ yelɛ mɔɔ ɔnle adiema la ɛ?
6 Nea anyelielɛ mɔɔ Keleseɛnenli bie mɔɔ wɔ yɛ asafo ne anu la kɛnyia wɔ mekɛ mɔɔ ɔ ye anzɛɛ ɔ hu kɛra nɔhalɛ ne anu la! Anyelielɛ edwɛkɛ ɛhye bamaa Gyihova, anwumabɔvolɛma nee menli mɔɔ wɔ asafo ne anu la ali fɛlɛko kpole. (Luku 15:7, 10) Noko akee, mɔlebɛbo ne saa ahenle mɔɔ ɔnle adiema la andie yɛ a, yɛbahɔ zo yɛamaa yɛ nye alie kɛ mɔdenle mɔɔ yɛlɛbɔ la sɔ Gyihova anye, “ɔluakɛ ɔngulo kɛ bɛsɛkye awie biala. Ɔkpondɛ kɛ awie biala nu ɔ nwo na ɔtwe ɔ nwo ɔfi ye ɛtane ne mɔ anwo.”—2 Pita 3:9.
[Edwɛkɛ mɔɔ bɛkpa wɔ mukelɛ 6]
Yɛ subane a le adenle kpalɛ mɔɔ lumua mɔɔ yɛdua zo yɛboa kunli anzɛɛ yelɛ mɔɔ ɔnle adiema la yɛmaa ɔnwu nɔhalɛ ne a, na tɛ Baebolo nu adwelielilɛ ɔ