“Aleɛ Wɔ Mekɛ Ne Anloa”
1. Kɛzi kenle ko nyianu titile ngyehyɛleɛ ne boale wɔ nee awie mɔ ɛ?
1 Saa yɛkɔ kenle ko nyianu titile yɛba a, yɛta yɛka kɛ, “Debie mɔɔ ɛnee yɛhyia nwolɛ ala ɛne!” Maanzinli zo neavolɛ ko bɔle amaneɛ kɛ, mekɛ mɔɔ menli mɔɔ wɔ ye maanzinli ne anu dele ngyehyɛleɛ ne mɔɔ bɛyɛ anwo edwɛkɛ la, bie mɔ hanle kɛ bɛkulo kɛ bɛyɛ dɔɔnwo wɔ ɛzonlenlɛ gyima ne anu. Neavolɛ adenduvo ko hanle kɛ, “Mekɛ mɔɔ yɛzuzule ninyɛne mɔɔ yɛlɛyɛ wɔ yɛ ɛbɛlabɔlɛ nu anwo la, ɔboale yɛ ɔmanle yɛnwunle ɛleka wienyi mɔɔ kɛkala yɛdwu la.” Ko noko hanle kɛ, “Nolobɔlɛma dɔɔnwo lale ye ali kɛ ɛhye hakyele bɛ manle bɛnwunle debie mɔɔ hyia kɛ bɛfa bɛ adwenle bɛkɔ zo, mɔɔ le bɛ ɛzonlenlɛ gyima ne la.” Kɛzi kenle ko nyianu titile ne boale wɔ ɛ?
2. Ɛdendɛlɛ boni mɔ a bɛbahilehile nu wɔ ɛzonlenlɛ ɛvolɛ fofolɛ nyianu ngyehyɛleɛ ne anu a?
2 Ɛvolɛ ne mɔɔ ɛlɛba la ngyehyɛleɛ ne noko bayɛ debie mɔɔ yɛhyia la. Edwɛkɛtile ne se, “Bɛvea Gyihova Akɛnra Anu,” mɔɔ bɛyele bɛvile Edwɛndolɛ 118:8, 9 la. Ɛdendɛlɛ mɔɔ bɛbahilehile nu la bie mɔ a wɔ ɛke la: “Kɛzi Gyihova Le Ɛvealeka Wɔ Ngyegyelɛ Mekɛ Nu,” “Boa Awie Mɔ Maa Bɛvea Gyihova Andɛba Abo,” “Sukoa Gyihova Na Maa Menli Ɛnyia Feabelɛ,” “Ngakula, Bɛva Bɛ Rɛle Bɛwula Gyihova Anu!” yɛɛ “Yɛ Sunsum Nu Paladaese Ne—Feabelɛ Mɔɔ Gyihova Ɛyɛ La.”
3. Kɛ ɔkɛyɛ na yɛanyia nvasoɛ dɔɔnwo yɛavi nyianu ne mɔɔ yɛbahɔ la anu ɛ?
3 Kɛzi Yɛbanyia Nuhua Nvasoɛ La: Saa bɛkile kenle ne ala a, bɔ ɔ bo yɛ ngyehyɛleɛ mɔɔ bamaa wɔahɔ bie la na to ɛsalɛ fɛlɛ wɔ Baebolo sukoavoma maa bɛhɔ bie. Amaa ‘yɛava abotane yɛazo ma’ la, ɔwɔ kɛ yɛsɔ mɔɔ yɛkɛde la anu kpundii. (Luku 8:15) Yemɔti, tie edwɛkɛ ne boɛ na kɛlɛ nuhua edwɛkɛtitile nee adehilelɛ sikalɛ mɔɔ ɛbava wɔali gyima wɔ wɔ ɛbɛlabɔlɛ nee ɛzonlenlɛ gyima ne anu la. Bɛwie nyianu ne a bɛdɔ alagye bɛzuzu nwolɛ kɛ abusua la na bɛzuzu ndenle fɔɔnwo mɔɔ bɛ nee bɛ abusua ne dua zo a bɛbahola bɛava edwɛkɛ ne bɛali gyima la anwo.
4. Kɛmɔti a ɔwɔ kɛ yɛmaa yɛ nye da kenle ko nyianu titile ne mɔɔ ɛlɛba la ade ɛ?
4 Bɛvi ɛlɔlɛ nu bɛva mekɛ tendenle bɛziezie ɛvolɛ bieko kenle ko nyianu titile ne kɛ aleɛ kpalɛ mɔɔ ɔyɛ fɛ la. Ɔrɛla ye kɛ Gyihova bayila mɔdenle mɔɔ ɛlɛbɔ kɛ ɛbahɔ nyianu ne bie na wɔanyia nvasoɛ wɔavi “aleɛ wɔ mekɛ ne anloa” ɛhye mɔɔ bɛyɛ kɛ bɛfa bɛamaa Keleseɛne azonvolɛ anwosesebɛ la anu.—Mat. 24:45.