Ngyehyɛleɛ Mɔɔ Bɛyɛ Bɛmaa Keleseɛne Azonvolɛ La
1. Duzu ngyehyɛleɛ fofolɛ a bɔle ɔ bo wɔ 1938 ne anu a, na duzu ati a bɛyɛle a?
1 Wɔ 1938 ne anu, Gyihova ahyehyɛdeɛ ne bɔle ngyehyɛleɛ fofolɛ bie abo. Bɛmanle asafo ngakyile dɔɔnwo rayiale nu, wɔ mɔɔ ɛnɛ bɛfɛlɛ bɛ maanzinli nyianu la abo. Duzu ati a bɛyɛle zɔ a? January 1939 Informant ne (mɔɔ ɛnɛ bɛfɛlɛ ye Yɛ Belemgbunlililɛ Gyima) la ye ɔ nloa kɛ: “Nyianu ɛhye mɔ le Gyihova Teokelase Ahyehyɛdeɛ ne foa, mɔɔ bamaa yɛayɛ yɛ Belemgbunlililɛ gyima ne la. Adehilelɛ mɔɔ bɛvale bɛmanle wɔ ɛkɛ la anwo hyia, amaa yɛ nuhua ko biala ahola ayɛ ye gyima mɔɔ bɛvale bɛwulale ɔ sa nu la kpalɛ.” Saa yɛsuzu Belemgbunlililɛ nolobɔlɛma mɔɔ ɛnee bɛ dodo ne le 58,000 wɔ 1938 anu, na bɛbole 7,000,000 wɔ 2009 anu la anyuhɔlɛ ne anwo a, ɔda ali kɛ maanzinli nyianu ɛhye mɔ ɛlɛdi bodane mɔɔ bɛlɛ kɛ bɛboa Keleseɛne azonvolɛ bɛamaa ‘bɛayɛ bɛ gyima mɔɔ bɛva bɛmaa bɛ la’!
2. Wɔ ɛzonlenlɛ ɛvolɛ fofolɛ ne anu, duzu edwɛkɛ a bɛbahilehile nu wɔ maanzinli nyianu ne anu a?
2 Ɛvolɛ Mɔɔ Ɛlɛba La Edwɛkɛtile: Yɛ nye la ɛvolɛ fofolɛ maanzinli nyianu ne nee anwosesebɛ mɔɔ ɔbamaa yɛ la ade. Bɛyele ye edwɛkɛtile ne mɔɔ se, “Bɛnle Ɛtane Ewiade Ɛdeɛ” la bɛvile Dwɔn 15:19. Ɛdendɛlɛ mɔɔ wɔ nu mɔɔ baboa Keleseɛne azonvolɛ la bie mɔ a le boni? Wɔ Folɛ, yɛbade ɛdendɛlɛ ne mɔɔ se, “Dahuu Ɛzonlenlɛ Gyima Ne Bɔ Yɛ Nwo Bane—Adenle Boni Azo?” Eza yɛ nye balie ɛdendɛlɛ mɔɔ bɛhyehyɛ nu mɔɔ le foa nsa mɔɔ se, “Mmamaa Bɛsɛkye Wɔ Adwenle . . .” “Nane Ne,” “Tuutuunli Ne Mɔɔ Ɛlie Duma,” yɛɛ “Gualilɛma” ne la anwo. Wɔ Molɛ, yɛbadie ɛdendɛlɛ mɔɔ bɛhyehyɛ nu mɔɔ ati se, “Bɛhulo Gyihova, Bɛmmakulo Ewiade” la. Ɛdendɛlɛ bieko mɔɔ bɛbahilehile nu la bie mɔ a le, “Bɛbɔ Bɛ Ɛbɛla Kɛ ‘Nyɛvolɛ Nee Adendulɛma’” yɛɛ “Bɛgyinla Kpundii! Bɛbahola Bɛali Ewiade Ɛhye Azo Konim.”
3. Saa yɛkɔ maanzinli nyianu ne bie a, duzu nvasoɛ a yɛbanyia yeavi nu a?
3 Mekɛ mɔɔ adiema raalɛ ko mɔɔ ye ɛzonlenlɛ gyima ne ɛha aze hɔle kenlensa ye maanzinli nyianu bie la, ɔhɛlɛle kɛ, ngyehyɛleɛ ne boale ye manle ɔziale ɔnleɛnleanle ye tɛnlabelɛ nu na ɔbɔle kpɔkɛ kɛ “ɔbahɔ daselɛlilɛ na yeagyakyi kɛ ɔkɛva edwɛkɛ ɔkɛye ɔ nloa!” Kpolerazulɛ biala ɛnle nwolɛ kɛ ɛzonlenlɛ ɛvolɛ fofolɛ maanzinli nyianu ngyehyɛleɛ ne baboa yɛ muala yeamaa yɛahulo Gyihova yɛadɛla ewiade ye. (1 Dwɔn 2:15-17) Bɔ mɔdenle kɛ ɛbahɔ bie na wɔadie edwɛkɛ ne kpalɛ, amaa wɔanyia nvasoɛ wɔavi ngyehyɛleɛ mɔɔ bɛvi ɛlɔlɛ nu bɛyɛ bɛmaa Keleseɛne azonvolɛ la anu!