‘Nrɛlɛbɛ Nyɛleɛ Maa Bɛnwu Kɛ Ɔle Nɔhalɛ’
1. Kɛzi suamenle bie mɔ bu gyima mɔɔ yɛyɛ la ɛ?
1 Ɔdwu mekɛ ne bie a yɛ nee suamenle bie mɔ mɔɔ bɛha Gyihova Alasevolɛ anwo edwɛkɛ ɛtane bɛhile bɛ anzɛɛ bɛnde yɛ edwɛkɛ bo la yia. Bie a yɛ nwo edwɛkɛ ɛtane mɔɔ menli kɛha la a maa bɛnyia adwenle zɔhane a. Wɔ ɛleka ne bie mɔ bɔbɔ, bɛbu yɛ kɛ “eku bie mɔɔ anwo yɛ ɛzulolɛ” la. Saa yɛyia tendɛtia zɛhae mɔ a, kɛzi ɔwɔ kɛ yɛyɛ yɛ nyɛleɛ wɔ nwolɛ ɛ?
2. Saa bɛtendɛ bɛtia yɛ a duzu a baboa yɛ na yɛ sa nu ando a?
2 Nyia Subane Kpalɛ: Wɔ ɛvoya ne mɔɔ lumua la anu, menli mɔɔ ande edwɛkɛ ne abo la dendɛle tiale Gyisɛse nee Gyihova azonvolɛ mɔɔ ɛnee wɔ ɛkɛ la fane dɔɔnwo. (Gyi. 28:22) Noko, bɛammaa tendɛtia ammaa bɛanze nyiane kɛ bɛkɛyɛ bɛ ɛzonlenlɛ gyima ne. Gyisɛse hanle kɛ: ‘Nrɛlɛbɛ Nyɛleɛ Maa Bɛnwu Kɛ Ɔle Nɔhalɛ.’ (Mat. 11:18, 19) Ɔhɔle zolɛ ɔvale mɔdenlebɔlɛ ɔyɛle ɔ Ze ɛhulolɛdeɛ, na ɔnyianle anwodozo kɛ menli mɔɔ kulo nɔhalɛ ne la banwu kɛzi edwɛkpa ne sonle bolɛ la. Saa yɛkakye kɛ Nyamenle Ara ne bɔbɔ bɛdendɛle bɛtiale ye a, ɔnrɛmaa yɛ sa nu ɛnrɛdo.
3. Duzu ati a ɔnle kɛ tendɛtia nee dwazotia si yɛ nwo ɛ?
3 Gyisɛse hilele kɛ ɛtane ewiade ɛhye bakpɔ ye ɛdoavolɛma kɛmɔ ɔkpɔle ye la. (Dwɔn 15:18-20) Ɛhye ati, ɔnle kɛ tendɛtia nee dwazotia mɔɔ ɛlɛkɔ zo ɛnɛ la si yɛ nwo. Kɛmɔ awieleɛ mekɛ ne ɛlɛkɔ ɔ nyunlu yɛɛ Seetan ɛva ɛya kpole la ati yɛ nye la kɛ ninyɛne ɛhye mɔ dɔɔnwo bara. (Yek. 12:12) Yɛ nye bahola alie, ɔluakɛ ninyɛne ɛhye mɔ kile kɛ ɔnrɛhyɛ bɛbazɛkye Seetan ewiade ne.
4. Saa bɛka edwɛkpa ne anwo edwɛkɛ ɛtane bɛkile yɛ a, duzu a ɔwɔ kɛ yɛyɛ ye wɔ nwo a?
4 Fa Nyelebɛnloa Kpalɛ Maa: Saa bɛka edwɛkɛ ɛtane bɛkile yɛ a, ɔwɔ kɛ dahuu yɛfa nyelebɛnloa kpalɛ mɔɔ le bɛtɛɛ la yɛmaa. (Mrɛ. 15:1; Kɔl. 4:5, 6) Saa ɔkɛyɛ boɛ a, yɛbahola yɛahilehile nuhua yɛahile suamenle mɔɔ lɛ ahonle kpalɛ la kɛ, menli ɛha Gyihova Alasevolɛ anwo edwɛkɛ dɔɔnwo mɔɔ ɛnle nɔhalɛ la anzɛɛ yɛabiza ye deɛmɔti ɔte nganeɛ zɔhane la. Nyelebɛnloa bɛtɛɛ mɔɔ yɛbava yɛamaa la baha ye yeamaa yeabiza mɔɔ yede wɔ Gyihova Alasevolɛ anwo la anu boɛ na kenle fofolɛ mɔɔ Dasevolɛ bie kɛhɔ ɛkɛ la yeadie ye. Noko akee saa suamenle ne ɛva ɛya kpole a, ɔkɛyɛ kpalɛ kɛ yɛbazɛlɛ adenle na yɛahɔ. Yɛbahola yɛalie yɛali kɛ ɔnvane nwolɛ kɛzi awie mɔ bu yɛ biala la, yɛ ɛzonlenlɛ gyima ne sonle bolɛ maa Gyihova.—Aye. 52:7.