‘Bɛbabɔ Edwɛkpa Ɛhye Nolo’!
1. Kɛzi yɛkola yɛnwu kɛ debie biala ɛnrɛhola ɛnrɛzi daselɛlilɛ gyima ne adenle ɛ?
1 Debie biala ɛnle ɛkɛ mɔɔ bahola azi Gyihova adenle mɔɔ ɔnrɛmaa ye ɛhulolɛdeɛ ɛnrɛyɛ ɛkɛ a. (Aye. 14:24) Ɛnee ɔle kɛ asɛɛ Ndɛnebuavolɛ Gedɛyɔn nee ye menli 300 ne ɛnrɛhola ɛnrɛli Medeanema 135,000 anwo zo konim ɛdeɛ, noko Gyihova hanle hilele ye kɛ: “Kɔ kɔlie Yizilayɛma fi Medeanema asa anu. Mame medame a mezoa wɔ a.” (Maa. 6:14) Gyima boni a Gyihova gyi ɔ nzi ɛnɛ a? Gyisɛse hanle kɛ: “Bɛbabɔ Edwɛkpa ɛhye mɔɔ fane Anwuma Belemgbunlililɛ ne anwo la nolo wɔ aleɛabo amuala.” (Mat. 24:14) Awie biala ɛnle ɛkɛ mɔɔ bahola azi gyima ɛhye adenle kɛ ɔnrɛmaa bɛnrɛyɛ a!
2. Kɛzi yɛ nye bahola ala kɛ Gyihova baboa yɛ nuhua ko biala wɔ ɛzonlenlɛ gyima ne anu ɛ?
2 Gyihova Boa Yɛ Nuhua Ko Biala: Yɛlɛ anwodozo kɛ, Gyihova bamaa ye Alasevolɛ kɛ ekpunli la ali munli ɛdeɛ, noko asoo yɛ nye bahola ala kɛ Gyihova baboa yɛ nuhua ko biala ɔ? Wɔ ehyianlɛ mekɛ nu, ɛzoanvolɛ Pɔɔlo dele nganeɛ kɛ Gyihova ɛlua ɔ Ra Gyisɛse anwo zo ɛboa ye. (2 Tem. 4:17) Yɛbahola yɛanyia anwodozo ko ne ala bie kɛ Gyihova bayila yɛ nuhua ko biala mɔdenlebɔlɛ ne azo yeamaa yɛayɛ ye ɛhulolɛdeɛ.—1 Dwɔn 5:14.
3. Gyinlabelɛ boni mɔ anu a Gyihova boa yɛ a?
3 Asoo alehyenlɛ biala ɛbɛlabɔlɛ nu adwenledwenle ɛmmaa ɛnnyia anwosesebɛ mɔɔ ɛbava wɔahɔ daselɛlilɛ ɔ? “Ɔmaa mɔɔ ɛnlɛ anwosesebɛ la anwosesebɛ.” (Aye. 40:29-31) Bɛlɛyɛ wɔ kpɔdekpɔde, anzɛɛ bɛdwazo bɛtia wɔ ɔ? ‘Fa wɔ adesoa ne maa Gyihova, na ɔbazɔ wɔ nu.’ (Edw. 55:22) Ɔyɛ a ɛnnyia anwodozo ɔ? “Kɔ na mebade ɛ nloa.” (Ade. 4:11, 12) Asoo kpɔkɛdelɛ ɛmmaa ɛngola dɔɔnwo yɛ wɔ daselɛlilɛ nu ɔ? Gyihova anye sɔ mɔdenle mɔɔ ɛfi ahonle muala anu ɛbɔ la, ɔnva nwo kɛzi ɔle ekyi la.—1 Kɔl. 3:6, 9.
4. Kɛzi anwodozo mɔɔ yɛbanyia ye wɔ Gyihova anu la baha yɛ ɛ?
4 Gyihova “ɛdenrɛ ɔ sa, nwane a kɛhola kɛkpɔla ɔ sa a?” (Aye. 14:27) Kɛmɔ yɛlɛ anwodozo kɛ Gyihova bayila yɛ ɛzonlenlɛ gyima ne azo la ati, bɛmaa yɛva ‘akɛnrasesebɛ nee tumi’ mɔɔ Gyihova ɛva ɛmaa yɛ la yɛbɔ edwɛkpa ne nolo.—Gyi. 14:3.