Bɛziezie Me Kɛ Membɔ Nolo Ɔ?
1. Kɛmɔti a ɔnle kɛ yɛte nganeɛ kɛ bɛtɛsieziele yɛ kpalɛ kɛ yɛha edwɛkɛ ne ɛ?
1 Saa wɔbiza ɛ nwo kpuyia ɛhye ɛlɛ a, mmamaa ɔgyegye wɔ! Tɛ sukulu ɛhɔlɛ, anzɛɛ mɔdenlebɔlɛ titile bie a maa yɛfɛta kɛ azonvolɛ a. Bɛhanle ɛdoavolɛma mɔɔ ɛnee lumua la bie mɔ anwo edwɛkɛ kɛ “bɛle menli mɔɔ ɛnze nwoma” la. Noko akee, bɛbɔle mɔdenle bɛbɔle edwɛkpa ne nolo, ɔluakɛ bɛzile kpɔkɛ kɛ bɛdi Gyisɛse neazo ne anzi.—Gyi. 4:13; 1 Pita 2:21.
2. Ndenle mɔɔ Gyisɛse luale zo hilehilele la bie mɔ a le boni?
2 Kɛzi Gyisɛse Hilehilele La: Ɛnee ye ngilehilelɛ ne le sikalɛ, nuhua la ɛkɛ maa menli ne na bɛte ɔ bo. Ye kpuyia, fatonwo nee mukenye ne mɔ mɔɔ ɔ bo ɛdelɛ ɛnyɛ se la manle menli diele ye. (Mat. 6:26) Ɔ nye liele menli nwo kpole. (Mat. 14:14) Bieko, Gyisɛse vale anwodozo nee tumi dendɛle, ɔluakɛ ɛnee ɔze kɛ Gyihova ɛzoa ye na yemaa ye tumi kɛ ɔva ɔyɛ ye gyima ne.—Luku 4:18.
3. Kɛzi Gyihova boa yɛ maa yɛkola yɛyɛ yɛ ɛzonlenlɛ gyima ne ɛ?
3 Gyihova Boa Yɛ: Yɛ Kilehilevolɛ Kpole ne dua ye Edwɛkɛ ne nee ye ahyehyɛdeɛ ne azo maa yɛnyia ndetelɛ mɔɔ yɛhyia na yɛabɔ edwɛkpa ne nolo kpalɛ la. (Aye. 54:13) Kɛmɔ Gyihova manle bɛhɛlɛle adenle mɔɔ Gyisɛse luale zo hilehilele la dole ɛkɛ la ati, yɛkola yɛsuzu na yɛsukoa zɔhane ndenle ne mɔ. Gyihova fa ye sunsum nwuanzanwuanza ne maa yɛ na ɔdua asafo debiezukoalɛ zo ɔtete yɛ. (Dwɔn 14:26) Bieko, ɔmaa yɛnyia nolobɔlɛma mɔɔ bɔ mɔdenle kola boa yɛ maa yɛdi daselɛ kpalɛ la.
4. Kɛmɔti a ɔwɔ kɛ yɛte nganeɛ kɛ bɛziezie yɛ kɛ yɛbɔ edwɛkpa ne nolo yɛhile awie mɔ ɛ?
4 Ɔwɔ kɛ yɛte nganeɛ kɛ bɛziezie yɛ kɛ yɛbɔ nolo, ɔluakɛ “yɛ munlililɛ vi Nyamenle ɛkɛ.” (2 Kɔl. 3:5) Mekɛ mɔɔ yɛlɛnyia Gyihova anu anwodozo na nɔhalɛ nu yɛava ngyehyɛleɛ mɔɔ ɔvi ɛlɔlɛ nu yeyɛ yɛali gyima kpalɛ la, yɛbayɛ ‘menli mɔɔ bɛziezie yɛ bɛmaa gyima kpalɛ biala la.’—2 Tem. 3:17.