Mɔɔ Yɛbaha ye Magazine ne Anwo

The Watchtower December 1

“Mekɛ ɛhye wɔ ɛvolɛ ne anu, menli dɔɔnwo yɛ Gyisɛse awolɛ ne anwo ninyɛne fa kile edwɛkɛ ɛhye mɔɔ wɔ Baebolo ne anu la. [Kenga Mateyu 2:1, 11.] Asoo wɔyɛ ye nzonlɛ kɛ ngakyile wɔ mɔɔ Baebolo ne ka nee mɔɔ bɛta bɛyɛ la anu? [Maa ɔbua.] Edwɛkɛ ɛhye ka mɔɔ amgba ɔzile la anwo edwɛkɛ.” Fa edwɛkɛ ne mɔɔ wɔ mukelɛ 31 la kile ye.

Awake! December

“Mekulo kɛ menwu wɔ adwenle wɔ edwɛkɛ bie mɔɔ Gyisɛse hanle la anwo. [Kenga Mateyu 5:3.] Kɛmɔ ɛzonlenlɛ dɔɔnwo wɔ ɛkɛ la ati, ɛsuzu kɛ kɛzi yɛkpa kɛ yɛkɛli yɛ sunsum nu ngyianlɛ nwo gyima la hyia ɔ? [Maa ɔbua.] Edwɛkɛ ɛhye kile mɔɔ Baebolo ne ka wɔ kɛzi yɛbahola yɛanyia nɔhalɛ sunsum nu ahunlundwolɛ la anwo.” Fa edwɛkɛ ne mɔɔ wɔ mukelɛ 12 la kile ye.

The Watchtower January 1

“Ɛzonlenlɛ dɔɔnwo nu amra ka nzanlonlɛ nwo edwɛkɛ ngakyile. Kɛzi ɛdwenle kɛ Nyamenle bu awie mɔɔ no nza la ɛ? [Maa ɔbua.] Baebolo ne ka kɛ Gyisɛse manle nzule hakyile nwanye wɔ nwanwane adenle zo ɛdeɛ, noko eza ɔka ɛhye. [Kenga Mrɛlɛbulɛ 23:20a.] Magazine ɛhye kile adwenle kpalɛ mɔɔ Baebolo ne lɛ ye wɔ nwolɛ la.”

Awake! January

“Wɔ anwongyelelɛ mekɛ ɛhye anu, menli dɔɔnwo te nganeɛ kɛ gyima mɔɔ bɛyɛ la bo bɛ nwo zo. Asoo kɛ ɛte nganeɛ la ɛ? [Maa ɔbua.] Tie folɛdulɛ kpalɛ ɛhye. [Kenga Nolobɔvo ne 4:6.] Magazine ɛhye ka kɛzi yɛbahola yɛava gyima, abusua yɛɛ ɛnwomenlelielɛ yɛawula ɛleka mɔɔ ɔfɛta la. Eza ɔmaa menli mɔɔ ɛlɛkpondɛ gyima la nzuzulɛ.”