Daselɛlilɛ Nyianu
1. Duzu ati a daselɛlilɛ mɔɔ bɛyɛ nwolɛ ngyehyɛleɛ na yɛahɔ la hyia ɛ?
1 Gyisɛse yɛle Belemgbunlililɛ nolobɔlɛ gyima ne mɔɔ bɛyɛ nwolɛ ngyehyɛleɛ na bɛyɛ ye kpalɛ la anwo neazo kɛnlɛma. Ɛnɛ noko, menli mɔɔ nea ewiade amuala Belemgbunlililɛ nolobɔlɛ gyima ne azo la kulo kɛ bɛnwu kɛ bɛlɛyɛ zɔhane ala. Ɔlua ɛhye ati, asafo mɔɔ wɔ ewiade amuala la dua daselɛlilɛ nyianu zo kyehyɛ Belemgbunlililɛ nolobɔlɛma ekpunli ngakyile maa bɛkɔ daselɛlilɛ.—Mat. 24:45-47; 25:21; Luku 10:1-7.
2. Duzu a ɔwɔ kɛ bɛyɛ wɔ daselɛlilɛ nyianu bo a?
2 Ngyehyɛleɛ Kɛnlɛma: Bɛyɛ daselɛlilɛ nyianu kɛ bɛfa bɛamaa yɛ anwosesebɛ, bɛahilehile yɛ kpalɛ na bɛamaa menli mɔɔ bahɔ daselɛlilɛ la adehilelɛ. Saa alehyenlɛ ne anu tɛkese ne fane daselɛlilɛ ne anwo a, bɛbava mekɛ ekyi bɛazuzu nwolɛ. Ɔdwu mekɛ ne bie a, bɛfa Yɛ Belemgbunlililɛ Gyima, Reasoning buluku anzɛɛ Ministry School buluku ne anu edwɛkɛ bɛkakyehakye yɛ, amaa bɛaziezie menli mɔɔ wɔ ɛkɛ la kɔsɔɔti bɛamaa daselɛlilɛ wɔ kenle zɔhane anu. Bɛbahola noko bɛayɛ buluku mɔɔ bɛlɛfa bɛamaa la anwo yɛkile sikalɛ. Kolaa na bɛayɛ asɔne bɛava bɛakpɔne la, ɔwɔ kɛ bɛ kɔsɔɔti bɛnwu menli mɔɔ bɛ nee bɛ bahɔ daselɛlilɛ nee azɛlɛsinli mɔɔ bɛbayɛ gyima wɔ nu la. Saa bɛwie nyianu ɛhye mɔɔ ɔnle kɛ ɔbo mitini 15 la ala a, ɔwɔ kɛ bɛ muala bɛkɔ azɛlɛsinli ne anu.
3. Nwane mɔ a ɔwɔ kɛ nea yɛ daselɛlilɛ nyianu nwo ngyehyɛleɛ a?
3 Kɛzi Bɛyɛ Nwolɛ Ngyehyɛleɛ Ɛ? Daselɛlilɛ zo neavolɛ ne di asafo ne anyunlu yɛ daselɛlilɛ nyianu nwo ngyehyɛleɛ. Ekpunli zo neavolɛma anzɛɛ bɛ boavolɛma ɔwɔ kɛ boka menli mɔɔ wɔ bɛ ekpunli ne anu la anwo kɔ daselɛlilɛ wɔ dapɛne awieleɛ. Neavolɛma anzɛɛ azonvolɛ bie mɔ bahola aboka daselɛlilɛ ekpunli ne mɔ anwo wɔ dapɛne ne anu. Ekpunli zo neavolɛma nee ɛzonlenlɛ gyima zo neavolɛ ne yɛ gyima bɔ nu amaa bɛanyia azɛlɛsinli dɔɔnwo bɛamaa bɛ ekpunli ne mɔ ayɛ azua nu gyima wɔ nu wɔ dapɛne awieleɛ. Wɔ dapɛne ne anu, ɛzonlenlɛ gyima zo neavolɛ ne banlea kɛ ngyehyɛleɛ mɔɔ menli mɔɔ bali ekpunli ne anyunlu ɛyɛ la kɛhɔ zo.
4-6. (a) Bodane boni ati a bɛyɛ daselɛlilɛ nyianu wɔ asafo ne azɛlɛsinli nu a? (b) Duzu a bɛbahola bɛazuzu nwo amaa bɛanwu ɛleka mɔɔ ɔhyia kɛ bɛyɛ daselɛlilɛ nyianu la ɛ?
4 Nienwu Nee Mekɛ Boni A Ɔwɔ Kɛ Bɛyɛ Nyianu Ɛhye Mɔ A? Kɛ anrɛɛ bɛbamaa asafo ne amuala ayia ɛleka ko la, mekɛ dɔɔnwo ne ala ɔwɔ kɛ bɛyɛ nyianu ɛhye mɔ wɔ ɛleka ngakyile mɔɔ fɛta, titile wɔ mediema azua nu wɔ azɛlɛsinli ne anu amaa bɛahola bɛayɛ asafo ne azɛlɛsinli ne anu gyima kpalɛ. Bɛbahola bɛayɛ bie noko wɔ Belemgbunlililɛ Asalo. Asafo dɔɔnwo yɛ daselɛlilɛ nyianu ne wɔ Molɛ bagua nu ɛdendɛlɛ ne nee Watchtower Ɛzukoalɛ ne anzi mekɛ ekyi bie anu wɔ Belemgbunlililɛ Asalo ɛkɛ. Ɔwɔ kɛ bɛbɔ mɔdenle bɛmaa ɛleka mɔɔ bɛyɛ ye la bikye azɛlɛsinli ne. Ɛhye ati, ɔwɔ kɛ bɛkɔ zo bɛyɛ nzenzaleɛ wɔ ɛleka mɔɔ bɛyɛ nyianu ne la, amaa ɛleka fofolɛ mɔɔ bɛkɛnyia la ayɛ mɔɔ fɛta mɔɔ bamaa bɛahola bɛayɛ azɛlɛsinli ne anu gyima bɛawie la.
5 Mekɛ kpalɛ mɔɔ ɔwɔ kɛ bɛfa bɛyɛ nyianu ɛhye mɔ nee fane dodo mɔɔ ɔwɔ kɛ bɛfa bɛyɛ wɔ dapɛne ne anu la gyi kɛzi azɛlɛsinli ne de la azo. Bɛbahola bɛava kpuyia ɛhye mɔ bɛazuzu ɛleka nee mekɛ kpalɛ mɔɔ ɔwɔ kɛ bɛyɛ daselɛlilɛ nyianu ɛhye mɔ la anwo.
6 Azɛlɛsinli boni a ɔhyia kɛ bɛyɛ nuhua gyima dɔɔnwo a? Mekɛ kpalɛ boni a bɛbahola bɛava bɛayɛ azua nu gyima wɔ nu a? Ɔwɔ kɛ bɛyɛ azua nu gyima anzɛɛ sia kɔnlea nwo ngyehyɛleɛ wɔ nɔsolɛ nu ɔ? Ɔwɔ kɛ bɛfa daselɛlilɛ nwo ngyehyɛleɛ kɔsɔɔti bɛbɔ asafo nolobɔlɛ ɛleka ne. Belemgbunlililɛ nolobɔlɛma kɔsɔɔti kulo kɛ bɛyɛ bɛ azɛlɛsinli ne anu gyima bɔkɔɔ, amaa bɛahola bɛaha ye kɛmɔ ɛzoanvolɛ Pɔɔlo hanle la kɛ: “Mewie me gyima di” wɔ azɛlɛsinli ne anu.—Wulo. 15:23.
7. Ahenle mɔɔ bɛye ye kɛ ɔnlea daselɛlilɛ ekpunli ne azo la gyima a le boni?
7 Kɛzi Bɛyɛ Daselɛlilɛ Nyianu La: Ahenle mɔɔ bɛye ye kɛ ɔnlea nyianu ɛhye azo la ɔwɔ kɛ siezie ɔ nwo kpalɛ fa kile kɛ ɔbu teokelase ngyehyɛleɛ ɛhye kpole. Ɔwɔ kɛ nyianu ɛhye bɔ ɔ bo wɔ mekɛ nloa, ɔyɛ mɔɔ bɛkola bɛsukoa debie bɛfi nu na eza ɔyɛ sikalɛ wɔ kɛyɛ mitini 10 nee 15 anu. Ɔwɔ kɛ ahenle mɔɔ banlea nyianu ne azo la nwu azɛlɛsinli mɔɔ bɛbayɛ gyima wɔ nu la kolaa na nyianu ne abɔ ɔ bo. Ɔngyia kɛ bɛkɛhendɛ menli mɔɔ kɛha amozi wɔ mekɛ mɔɔ bɛkɛwie daselɛlilɛ nyianu ne la ɛdeɛ, noko saa ɔkile ɛleka mɔɔ ekpunli ne bayɛ gyima la a, ɔbayɛ moalɛ. Saa bɛwie ala a, ɔwɔ kɛ awie biala kɔ azɛlɛsinli ne anu. Daselɛlilɛ nyianu mɔɔ bɛyɛ nwolɛ ngyehyɛleɛ kpalɛ na bɛkilehile kpalɛ wɔ ɔ bo la, bamaa awie biala mɔɔ wɔ ɛkɛ la anyia adehilelɛ mɔɔ hyia mɔɔ ɔbava yeali daselɛ wɔ kenle zɔhane anu la.—Mrɛ. 11:14.
8. Ndenle boni azo a menli mɔɔ kɔ daselɛlilɛ nyianu la kola nee menli mɔɔ nea zo la yɛ ko a?
8 Ɔwɔ Kɛ Yɛkɔ Daselɛlilɛ Nyianu: Koyɛlɛ nwo hyia. (Hib. 13:17) Saa ɔkɛyɛ boɛ a, ahenle mɔɔ bali ekpunli ne anyunlu la banlea kɛ awie biala mɔɔ wɔ ɛkɛ ne la banyia awie mɔɔ ɔ nee ye bahɔ daselɛlilɛ la. Ɔle kpalɛ kɛ nolobɔlɛma mɔɔ bɔ mɔdenle la ba, amaa bɛahola bɛaboa nolobɔlɛma mɔɔ bɛle fofolɛ anzɛɛ bɛnlɛ anwubielɛ la. Bɛdabɛ mɔɔ bɛkulo kɛ bɛ nee awie gyɛne kɛlua la bahola ayɛ dɔɔnwo wɔ mekɛ ne bie anu. (Mrɛ. 27:17; Wulo. 15:1, 2) Ɔwɔ kɛ awie biala bɔ mɔdenle kɔ nyianu ne abo ndɛ. Saa yɛbu teokelase ngyehyɛleɛ ɛhye na yɛsuzu yɛ gɔnwo mɔ Keleseɛnema anwo a, ɔbamaa yɛayɛ nzenzaleɛ na yɛahola yɛali ɛhye anwo gyima.—2 Kɔl. 6:3, 4; Fel. 2:4.
9. Adenle mɔɔ nvasoɛ wɔ zo la boni a adekpakyelɛma bahola alua zo aboa ngyehyɛleɛ ɛhye a?
9 Adekpakyelɛma Moalɛ: Adekpakyelɛma moalɛ nwo hyia wɔ daselɛlilɛ nyianu bo, na ɔmaa yɛ kɔsɔɔti anwosesebɛ. Yɛte ɔ bo kɛ adekpakyelɛma lɛ gyima dɔɔnwo yɛ. Saa yɛye Baebolo ɛzukoalɛ nee sia kɔkpɔla yɛsie ahane a, eza bɛyɛ gyima yɛɛ bɛnea bɛ abusua. Ɛhye ati, ɔnle kɛ adekpakyelɛma te nganeɛ kɛ ɔwɔ kɛ bɛkɔ asafo daselɛlilɛ nyianu biala bie, titile saa bɛyɛ ye alehyenlɛ biala a. Noko akee, adekpakyelɛma bahola aboa daselɛlilɛ nyianu bie mɔ dapɛne biala. Wɔ adenle bie azo, daselɛlilɛ nyianu boa maa bɛtete asafo ne anu amra, na bɛhyia adekpakyelɛma mɔɔ lɛ Baebolo ne anu ndelebɛbo nee daselɛlilɛ nu anwubielɛ la moalɛ nwo kpole kpalɛ. Daselɛlilɛ mɔɔ bɛta bɛkɔ la ɛmaa bɛnyia anwubielɛ dɔɔnwo. Bɛbahola bɛava ɛhye bɛaboa awie mɔ. Mɔdenle mɔɔ bɛbɔ bɛkɔ daselɛlilɛ nee daselɛlilɛ nyianu la le neazo mɔɔ ɔwɔ kɛ mediema sukoa a. Na mediema anye die daselɛlilɛ nyianu mɔɔ bɛkɔ la anwo kpalɛ.
10. Duzu ati a ɔfɛta kɛ Belemgbunlililɛ nolobɔlɛma kɔsɔɔti boa ngyehyɛleɛ ɛhye ɛ?
10 Kɛmɔ ɛnee ɔde wɔ Gyisɛse nee ye ɛdoavolɛma ne mɔ afoa nu la, azua nu daselɛlilɛ a yɛdua zo yɛyɛ yɛ Belemgbunlililɛ nolobɔlɛ gyima ne dɔɔnwo a. Daselɛlilɛ nyianu maa yɛmaa yɛ nwo anwosesebɛ na yɛkola yɛyɛ daselɛlilɛ gyima ne kpalɛ. Ɔwɔ kɛ nolobɔlɛma kɔsɔɔti bɔ mɔdenle boa ngyehyɛleɛ ɛhye kɛmɔ bɛkɛhola biala la. (Gyi. 5:42; 20:20) Ɔrɛla ye kɛ, yɛ muala yɛbali yɛaboa daselɛlilɛ nyianu ne. Saa yɛyɛ zɔhane a, Gyihova bayila yɛ dɔɔnwo, na ɔbamaa Gyisɛse Kelaese mɔɔ le yɛ Adekilevolɛ la anye alie wɔ mekɛ mɔɔ yɛlɛbɔ Nyamenle Belemgbunlililɛ ne anwo edwɛkpa ne nolo la.—Mat. 25:34-40; 28:19, 20.