Fa Yɛ Mbuluku Ne Di
Gyima Kpalɛ
1 Gyisɛse manle menli dɔɔnwo aleɛ wɔ nwanwane adenle zo wiele la, ɔmanle bɛboɔboale aleɛ ne mɔɔ hale la anloa. (Mat. 14:19-21) Gyihova nziezielɛ nwo anyezɔlɛ zɛhae le neazo kɛnlɛma maa yɛ kɛ ‘yɛkɛnwu nyele’ ɔlua nziezielɛ kɔsɔɔti mɔɔ Gyihova dua ‘akɛlɛ nɔhavo’ ne azo fa maa yɛ mɔɔ yɛbava yɛali gyima kpalɛ la azo.—Kɔl. 3:15; Luku 12:42; Mat. 24:45-47.
1. Kɛzi yɛbahola yɛazukoa Gyihova nziezielɛ nwo anyezɔlɛ mɔɔ Gyisɛse yɛle nwolɛ neazo la ɛ?
2 Magazine: Ɔnyɛ se kɛ magazine kɛzo yɛ ninyɛne nu. Saa dahuu yɛlɛ magazine dɔɔnwo a, ɔwɔ kɛ yɛte dodo mɔɔ yɛdie la azo. Na magazine mɔɔ bɛyɛ dɛba la noko ɛ? Ɛhye mɔ ɛmkpa nwo. Saa yɛlɛ magazine dɛba dɔɔnwo a, bie a ɛzonlenlɛ gyima zo neavolɛ anzɛɛ kpanyinli gyɛne baboa yɛ yeamaa yɛalua ndenle kpalɛ zo yɛava yɛamaa.
2. Kɛzi yɛbahola yɛade magazine mɔɔ yɛdie la azo ɛ?
3 Mbuluku Gyɛne: Saa bɛka kɛ yɛva buluku gyɛne bie yɛhɔ daselɛlilɛ a, dumua nea kɛ ɛlɛ bie kolaa na wɔalie bie wɔ Belemgbunlililɛ Asalo ɛkɛ. Nea kɛ ɛbalie mɔɔ ɛbava wɔahɔ daselɛlilɛ wɔ dapɛne ne anu la ala.
4 Saa ɛ ti anwo mbuluku ɛdeɛ a, die mɔɔ ɛhyia nwolɛ ala la. Kɛlɛ wɔ duma nee wɔ asafo wɔ ɛleka mɔɔ bɛhile la. Ɛhye baboa yeamaa wɔanwu mbuluku mɔɔ ɛlɛ la. Saa ɛlɛ Watchtower Library mɔɔ wɔ CD-ROM zo na wɔva wɔ magazine ɛdeɛ mɔɔ ɛlɛ la wɔzie a, ɛnee ɔngyia kɛ ɛbahɛla Watchtower nee Awake! bound volume.
3, 4. Duzu a ɔwɔ kɛ yɛkakye wɔ mbuluku mɔɔ yɛdie wɔ Belemgbunlililɛ Asalo ɛkɛ ne la anwo a?
5 Mbuluku Mɔɔ Yɛfa Yɛmaa: Yɛbɔ mɔdenle yɛfa yɛ mbuluku yɛmaa menli mɔɔ anye die nwolɛ la angomekye. Kakye kɛ yɛdayɛ a mbuluku mɔɔ sonle bolɛ mɔɔ yɛfa yɛkɔ daselɛlilɛ la anwo kakɛ la yɛ nwo zo titile a. Noko akee, mmatwehwenle ɛ bo aze kɛ ɛkɛmaa suamenle ne mɔ kɛnwu nwolɛ adenle mɔɔ bɛlɛ kɛ bɛkɛye ndoboa bɛkɛboa ewiade amuala gyima ne la. Kɛ neazo la, saa ɛlɛfa buluku bie wɔamaa anyelielɛma a, ɛbahola wɔaha kɛ: “Saa ɛ nye die nwo kɛ ɛbagenga yɛ buluku ne a, yɛbagyakyi yeamaa wɔ. Ɔwɔ nuhua kɛ yɛndɔne yɛ mbuluku ne ɛdeɛ, noko yɛdie ndoboa ekyi yɛfa yɛboa ewiade amuala gyima ne.”
5. Saa yɛlɛfa yɛ mbuluku ne yɛamaa a, duzu a ɔwɔ kɛ yɛkakye a, na ndenle boni azo a yɛbahola yɛaha ndoboa nwo edwɛkɛ a?
6 Gyisɛse luale nwanwane adenle zo manle menli nwonane afoa nu aleɛ, noko fane dɔɔnwo ne ala ɔmanle bɛ sunsum nu aleɛ. Gyisɛse zele kɛ: ‘Tɛ aleɛ ngome a sonla di a ɔnyia ngoane a, na Gyihova anloa edwɛkɛ biala maa ngoane.’ (Mat. 4:4) Yɛ mbuluku ne kilehile Baebolo ne anu nɔhalɛ mɔɔ hyia na awie anyia dahuu ngoane la. (Dwɔn 17:3) Bɛ bolɛ yɛ se somaa kɛ yɛkɛzɛkye bɛ!
6. Duzu ati a yɛ nye die yɛ mbuluku ne anwo somaa a, na duzu a ɛhye baha yɛ yeamaa yɛayɛ a?