Wɔziezie Ɛ Nwo Wɔmaa Sunsum Nu Ɛkponledolɛ Ɔ?
1. Anwoziezielɛ boni a bɛyɛ wɔ ɛkponledolɛ nwo a?
1 Ɛkponledolɛ hyia kɛ bɛboɔboa ninyɛne dɔɔnwo anloa. Ɔwɔ kɛ bɛnyia aleɛ ngakyile, bɛto bɛmaa ɔyɛ fɛ na bɛfa bɛmaa wɔ ɔ bo. Ɔwɔ kɛ bɛyɛ ngyehyɛleɛ kpalɛ bɛfa bɛyeye aleɛ ne. Bieko, ɔwɔ kɛ bɛsiezie ɛleka mɔɔ bɛbali aleɛ ne la. Ɔwɔ kɛ nyɛvolɛ siezie bɛ nwo, titile saa bɛbadu adenle tendenle na bɛadwu ɛkɛ a. Gyima dɔɔnwo wɔ nu ɛdeɛ, noko aleɛ mɔɔ yɛ fɛ na ɔmaa anwosesebɛ mɔɔ bɛ nee agɔnwolɛma nee mbusua bɔ nu di la maa mɔdenlebɔlɛ ne kɔsɔɔti fɛta. Ɔvi May wɔ ɛvolɛ ɛhye anu, Gyihova Alasevolɛ mɔɔ wɔ ewiade amuala la ɛlɛbɔ nuhua ayɛ nyianu mgbole nee ngyikyi na bɛava bɛali sunsum nu aleɛ mɔɔ bɛ nye ɛla ye ɛsesebɛ mɔɔ le “Bɛhɔ Zo Bɛnzinza!” Maangyeba Nyianu ne la. Bɛyɛ gyima dɔɔnwo bɛva bɛziezie ngyehyɛleɛ ne na bɛyɛ nwolɛ debie biala bɛwie. Bɛdo ɛsalɛ bɛvɛlɛ yɛ kɔsɔɔti. Amaa yɛahɔ bie na yɛanyia nvasoɛ kpole yɛavi nu la, ɔwɔ kɛ yɛdayɛ noko yɛsiezie yɛ nwo.—Mrɛ. 21:5.
2. Duzu a ɔhyia kɛ yɛyɛ na yɛahola yɛahɔ yɛ sunsum nu ɛkponledolɛ ne ko biala abo a?
2 Nyia Nvasoɛ Dɔɔnwo: Wɔyɛ wɔ ngyehyɛleɛ mɔɔ bamaa wɔahɔ sunsum nu ɛkponledolɛ ne ko biala abo la wɔwie ɔ? Saa ɔkɛyɛ boɛ a, ka nwolɛ edwɛkɛ kile wɔ gyimamenle kɛ ɛbahɔ nyianu ne foa biala bie mɔɔ kenle ne mɔɔ lumua la boka nwo a. Asoo wɔyɛ kale nee dabelɛ nwo ngyehyɛleɛ wɔwie? Ɔwɔ kɛ asafo nu mgbanyima nea nwu ye kɛ bɛli menli mɔɔ bɛyɛ mgbanyinli nee bɛdabɛ mɔɔ bɛnlɛ anwosesebɛ yɛɛ awie mɔ mɔɔ bɛbahyia moalɛ la ngyianlɛ nwo gyima.—Gyɛ. 23:4; Gal. 6:10.
3. Duzu ati a ɔnle kɛ yɛkɔ maanle maanle avinli nyianu mɔɔ bɛando ɛsalɛ bɛanvɛlɛ yɛ la bie ɛ?
3 Bɛbayɛ maanle maanle avinli nyianu wɔ ɛleka bie mɔ. Kakye kɛ bɛdo ɛsalɛ bɛvɛlɛ asafo nee mediema mɔɔ wɔ maanɔne la bie mɔ kɛ bɛhɔ nyianu ɛhye mɔ bie. Ɔfese ne ɛva menli dodo mɔɔ ɔwɔ kɛ ɔto ɛsalɛ ɔfɛlɛ bɛ la ɛboka nwo ɛyɛ ye ngyehyɛleɛ, ɔlua mbia dodo mɔɔ ɔbanyia la ati. Saa nolobɔlɛma kɔ maanle maanle avinli nyianu mɔɔ bɛando ɛsalɛ bɛanvɛlɛ bɛ la bie a, ɔbamaa menli ne azo somaa.
4. Ngakyelɛ boni a baboa yeamaa yɛaziezie yɛ nwo yɛamaa alehyenlɛ biala ngyehyɛleɛ ne mɔɔ bɛbabɔ ɔ bo la ɛ?
4 Siezie ɛ nwo kɔ nyianu ne abo ndɛ alehyenlɛ biala na kpondɛ ebia kolaa na ngyehyɛleɛ ne abɔ ɔ bo. Fa mekɛ ekyi neɛnlea ngyehyɛleɛ ne anwo kɛlata mɔɔ bɛyɛ la anu kolaa na foa ne abɔ ɔ bo. Ɛhye baboa wɔ yeamaa wɔaziezie wɔ ahonle wɔamaa edwɛkɛ ne mɔɔ bɛbaha la. (Ezl. 7:10) Saa foa ne ebianutɛnlavolɛ ne kile mgbɛnu edwɛne mɔɔ bɛbado la a, tie na siezie ɛ nwo kɛ ɛbanyia edwɛne nee asɔneyɛlɛ mɔɔ bɛbava bɛabuke la anu kyɛfoa.
5. Kɛzi wɔ abusua ne bahola anyia nvasoɛ dɔɔnwo avi nyianu ne anu ɛ?
5 Saa mbusua tɛnla bɔ nuhua wɔ nyianu ne abo a, awovolɛ bahola anlea anwu kɛ bɛ mra ne mɔ ɛlɛtie edwɛkɛ ne kpalɛ. (Mɛla. 31:12) Bɛlɛmaa awie biala anwosesebɛ kɛ ɔbuke ye Baebolo ne na ɔli bɛ nzi wɔ mekɛ mɔɔ bɛlɛkenga ngɛlɛlera la. Ɛkɛlɛ ninyɛne ekyi a ɔbaboa wɔ yeamaa wɔadie edwɛkɛ ne kpalɛ. Amozii, mɔɔ ɛhɛlɛle la baboa wɔ yeamaa wɔahakye ɛdendɛlɛ ne anu edwɛkɛtitile ne mɔ. Ko tia kɛ ɛkɛdendɛ dɔɔnwo anzɛɛ ɛkɛdwazo ɛkɛvi wɔ ebia ne azo. Saa ɛlɛ mobile a, mmamaa ɔtwehwe wɔ nee awie mɔ adwenle wɔ nyianu ne abo. Bɛkpɔne foa biala a, duzu ati a ɛ nee awie mɔ ɛnga mɔɔ ɛ nye liele nwolɛ la anwo edwɛkɛ ɛ?
6. Debie mɔɔ yɛ anyelielɛ wɔ yɛ nyianu ne abo la a le boni, na kɛzi yɛbahola yɛayɛ ye kpalɛ ɛ?
6 Wɔ nyianu ne abo yɛbanyia adenle yɛ nee yɛ mediema mrenya nee mraalɛ anyia agɔnwolɛvalɛ kpalɛ mɔɔ bie ɛnle ewiade ne anu la. (Edw. 133:1-3; Mak. 10:29, 30) Ɛbahola wɔamaa menli mɔɔ ɛ nee bɛ de nwolɛ la anwu wɔ na ɛ nee bɛ abɔ adawu wɔ ewiazo ɛnwomenlelielɛ mekɛ ne anu. Ɛhye ati a nvasoɛ wɔ zo kɛ yɛbava ewiazo aleɛ mɔɔ nuhua ɛnyɛ ɛnlomboɛ la yɛara na yɛali ye wɔ nyianu ne abo tɛla kɛ yɛbahɔ alie nwo yɛahɔli debie la. Nea kɛ ɛnrɛmaa nwolɛ adenle kɛnlɛma ɛhye mɔɔ yɛnyia kɛ yɛbamaa yɛ nwo ngoko anwosesebɛ la ɛnrɛkpa ɛ ti.—Wulo. 1:11, 12.
7. Anwoziezielɛ boni a ɔwɔ kɛ yɛyɛ wɔ tɛladeɛ mɔɔ yɛbawula la anwo a?
7 Tɛladeɛ: Ɔwɔ kɛ yɛkakye kɛ Gyihova hanle hilele Yizilayɛma kɛ, bɛnwo nyɛma fufutuu na bɛva nyɛma buluwu bɛkyekye ɔ ti nee ɔ ti bɛmaa ɔyɛ kɛ asɛɛ bɔlo la na bɛva bɛsosɔ bɛ adɛladeɛ ne ayiazo ne mɔ azo. (Ɛdi. 15:37-41) Ɛnee ɛhye kakye bɛ kɛ bɛle menli mɔɔ bɛdu bɛ bɛzie ahane kɛ bɛzonle Gyihova a. Ɛnɛ, yɛ tɛladeɛ kɛnlɛma mɔɔ yɛwula ye wɔ nyianu bo la maa yɛyɛ ngakyile yɛfi ewiade ne anwo. Ɔmaa menli mɔɔ kɛnwu yɛ wɔ mekɛ mɔɔ yɛkpɔne na yɛkɛhɔ aleɛlilɛ ɛleka la di yɛ nwo daselɛ kɛnlɛma. Ɛhye ati, suzu tɛladeɛ mɔɔ ɛbawula la anwo kpalɛ.
8, 9. Yɛ ɛzonlenlɛ ne foa boni mɔ a ɔnle kɛ yɛbu yɛ nye yɛgua zo wɔ nyianu bo a, na kɛzi yɛbahola yɛahile kɛ yɛbu ninyɛne ɛhye mɔ ɛ?
8 Asɔneyɛlɛ Nee Edwɛne: Yɛ Nyamenle ɛzonlenlɛ kpalɛ ne debie ko mɔɔ le kɛnlɛma wɔ nu la a le ayɛlɛyelɛ edwɛne mɔɔ yɛto yɛmaa Gyihova Nyamenle la. Ɔda ali kɛ ɛnee edwɛne mɔɔ bɛto la le debie mɔɔ kɔ zo dahuu wɔ nɔhalɛ Keleseɛnema ɛzonlenlɛ nu wɔ ɛvoya ne mɔɔ lumua la anu. (1 Kɔl. 14:15) Noko bie mɔ ɛngile yɛ ɛzonlenlɛ ne foa ɛhye mɔɔ hyia la anwo anyezɔlɛ. Adenle boni azo? Saa yɛkadwu nyianu ne abo la bɛlɛto edwɛne anzɛɛ bɛdo edwɛne na bɛyɛ asɔne bɛwie a. Bie mɔ fi nyianu ne abo yɛɛ bie mɔ noko bɔ ɔ bo tendɛ mgbole wɔ mekɛ mɔɔ bɛlɛto edwɛne na bɛayɛ asɔne bɛava bɛakpɔne la. Kɛmɔti ɛ?
9 Ɔdwu mekɛ ne bie a ndelebɛbo kpalɛ bie ati a ɔba ye zɔ a. Noko akee bie mɔ bahola agyakyi nwolɛ adenle mɔɔ bɛlɛ bɛto edwɛne na bɛyɛ asɔne la amaa bɛahola bɛabɔ adawu, bɛahɔ bɛ ahale ne mɔ anwo ndɛndɛ, anzɛɛ amaa bɛaboka menli mɔɔ bɛalumua alie mbuluku mɔɔ bɛkɛye la anwo. Ɔwɔ kɛ yɛnea boɛ na anwodɔlɛ ti yeammaa ewiade subane mɔɔ maa menli kulo kɛ bɛdumua anzɛɛ subane ɛtane mɔɔ le kɛ anyebolo nee angomedi la anzɛkye yɛ sunsum nu anyuhɔlɛ. Kɛ menli mɔɔ yɛbɔ Nyamenle ɛzonlenlɛ kpalɛ nwo mɔdenle la, yɛbɔ mɔdenle yɛkile ɛbulɛ yɛmaa ninyɛne mɔɔ sonle bolɛ wɔ yɛ ɛzonlenlɛ nu, mɔɔ bie a le asɔne nee edwɛne mɔɔ yɛto yɛmaa Gyihova la.
10, 11. Duzu a ɔnle kɛ awovolɛ yɛ a, na kɛ ɔkɛyɛ na bɛahola bɛaziezie ngakula na bɛanyia nvasoɛ dɔɔnwo wɔ nyianu ne anu ɛ?
10 Awovolɛ Nee Ngakula: Wɔ ewiade mɔɔ ngakula dɔɔnwo ɛnla subane kpalɛ ali la anu, yɛ mra ne mɔ le ngakyile, na ɛhye maa bɛye Gyihova nee ye ahyehyɛdeɛ ne ayɛlɛ. Noko akee, mekɛ bie mɔ anu, kɛmɔ bɛnnea ngakula ne mɔ boɛ la ati ɔfa ngyegyelɛ ɔba. (Mrɛ. 29:15) Ɔnle kɛ awovolɛ gyakyi bɛ mra mɔɔ bɛnnea bɛ nwo zo wɔ ɛleka mɔɔ bɛda la anzɛɛ wɔ nyianu ne abo.
11 Awovolɛ bie mɔ dumua nee bɛ mra suzu subane mɔɔ ɔwɔ kɛ bɛda ye ali la anwo kolaa na nyianu ne adwu zo. (Ɛfɛ. 6:4) Bɛboa bɛ mra bɛmaa bɛte ɔ bo kɛ nɔhalɛ Keleseɛnema ɛlɔlɛ “ɛnyɛ ninyɛne mgbane mgbane” anzɛɛ “ɔnle angomedi.” (1 Kɔl. 13:5) Maangyeba nyianu ne le mekɛ mɔɔ bɛye bɛzie ɛkɛ mɔɔ Gyihova bava ahilehile yɛ a, na mgbanyinli nee ngakula bahola ahile kɛ bɛbu ngyehyɛleɛ ɛhye ɔlua kɛzi bɛbabɔ bɛ ɛbɛla wɔ nyianu ne abo yɛɛ ɛleka gyɛne la.—Aye. 54:13.
12. Kɛzi yɛbahola yɛali awie mɔ daselɛ wɔ nyianu sua ne azo ɛ?
12 Di Daselɛ: Saa yɛyɛ ngyehyɛleɛ kpalɛ a, yɛbahola yɛali menli mɔɔ wɔ nyianu sua ne azo la daselɛ. Adiema ko mɔɔ nee ɔ ye hɔle ɛleka mɔɔ bɛdi aleɛ wɔ mekɛ mɔɔ bɛkpɔne la hwenle adwenle hɔle ye baagye ne azo na ɔbizale ahenle mɔɔ yeye aleɛ ne la kɛ: “Wɔnwu menli dɔɔnwo kɛ bɛbɔ baagye ɛhye bie ɔ?” Ɔhanle kɛ yenwu kɛ menli dɔɔnwo bɔ bie na ɔnnwu debie mɔɔ ɔfane nwo a. Ɛhye manle bɛ nee ye bɔle adawu, na adiema ne dole ɛsalɛ vɛlɛle ye kɛ ɔrɛla nyianu ne bie.
13. Kɛzi yɛbahola yɛhile anyezɔlɛ yɛamaa Gyihova mɔɔ ɛdo yɛ ɛkponle la ɛ?
13 Ɔwɔ nuhua kɛ yɛ mediema a bamaa ɛdendɛlɛ, abizebiza edwɛkɛ na bɛayɛ yɛkile ne mɔ a ɛdeɛ, noko yɛ anwuma Selɛ Gyihova a ɛvi ɛlɔlɛ nu Ɛdo yɛ sunsum nu ɛkponle ɛvolɛ ɛhye a. (Aye. 65:13, 14) Saa yɛkɔ kenle ko biala na yɛdi sunsum nu aleɛ mɔɔ bɛbava bɛamaa yɛ la a, ɔkile kɛ yɛ nye sɔ Ahenle mɔɔ dole yɛ ɛkponle ne la. Asoo wɔyɛ wɔ nziezielɛ wɔwie kɛ ɛbayɛ zɔ?
[Ɛlɛka wɔ mukelɛ 4]
Maangyeba Nyianu Ngakyelɛ
◼ Gyimalilɛ Mekɛ: Kenle nsa ne amuala, bɛbabɔ gyimalilɛ ne abo nwonlomɔ 9:20. Saa mukenye edwɛne ne bɔ ɔ bo a, ɔwɔ kɛ yɛ kɔsɔɔti yɛtɛnla aze, amaa bɛahola bɛabɔ gyimalilɛ ne abo wɔ enililɛ nu. Wɔ Yalɛ nee Folɛ, yɛbakpɔne nɔsolɛ 4:55 na Molɛ noko yɛakpɔne nɔsolɛ 4:00. Maanle maanle avinli nyianu ne babɔ ɔ bo Kule ewiazo 1:20 na bɛakpɔne nɔsolɛ 4:45. Bɛlɛmaa mediema kɔsɔɔti anwosesebɛ kɛ bɛdo edwɛne ne kɔsɔɔti, mɔɔ alehyenlɛ biala ɛdeɛ mɔɔ bɛbava bɛakpɔne boka nwolɛ la bie.
◼ Ɛleka Mɔɔ Bɛfa Kale Bɛsie: Kyesɛ awie ɛnde kpɔkɛ anzɛɛ arɛlevilɛ nu edwɛkɛ bie si, tɛ ye zɔhane a dahuu ɔle kpalɛ kɛ yɛkɛdɛnla ɛleka mɔɔ yɛbahola yɛadie gyimalilɛ ne la tɛla kɛ yɛkɛdɛnla kale nu ɛleka mɔɔ maa yɛ adwenle kola fi edwɛkɛ ne azo anzɛɛ yɛdafe la. Saa yɛtɛnla menli ne anu yɛtie edwɛkɛ ne mɔɔ debie ɛndwehwe yɛ adwenle la a, ɔle adenle mɔɔ yɛdua zo yɛkile anyezɔlɛ yɛmaa sunsum nu nziezielɛ mɔɔ vi Gyihova ɛkɛ ne la. Kɛmɔ ɛleka kpole ɛnle ɛkɛ la ati, ɔwɔ kɛ menli dɔɔnwo bɔ mɔdenle fo kale ko.
◼ Ebia Mɔɔ Bɛkpondɛ Bɛsie Awie: Ɛbahola wɔakpondɛ mbia wɔamaa menli mɔɔ ɛ nee bɛ vole kale anzɛɛ ɛ nee bɛ a wɔ sua ko anu la ala.
◼ Ewiazo Aleɛ: Yɛsɛlɛ wɔ fa ewiazo aleɛ bɛla tɛla kɛ ɛkɛvi nyianu ɛleka ne kɛ ɛkadɔ aleɛ wɔ ewiazo ɛnwomenlelielɛ mekɛ ne anu. Bɛmmaa awie adenle kɛ ɔva debie kpole mɔɔ bɛfa menli dɔɔnwo aleɛ bɛgua nu nee debie mɔɔ kola bɔ la ɔrɛla nyianu ne abo. Menli mɔɔ bahɔ nyianu ne wɔ nwɔhoalilɛ ɛleka ne mɔ la ɛnrɛhola ɛnrɛva ninyɛne mɔɔ bɛfa aleɛ bɛgua nu la ɛnrɛwula bɛ mbia ne mɔ abo.
◼ Buluku Fofolɛ Mɔɔ Bɛkɛye: Nyamenle Edwɛkɛ ne tu yɛ folɛ kɛ ‘yɛva ɛhulolɛ yɛyɛ debie biala mɔɔ yɛyɛ la.’ (1 Kɔl. 16:14) Saa bɛye buluku bie wɔ nyianu ne abo a, ɛlɔlɛ nee awie mɔ mɔɔ yɛsuzu bɛ nwo la ɛnrɛmaa yɛnrɛnriandi yɛnrɛzuhuzuhu awie mɔ kɛ yɛdumua yɛalie buluku ne mɔɔ bɛye la bie. Ɔnle kɛ yɛgyakyi yɛ mbia ne mɔ ɛkɛ kɛ yɛkasolo kolaa na edwɛne nee asɔneyɛlɛ ne mɔɔ li awieleɛ la abɔ ɔ bo. Saa bɛyɛ asɔne bɛwie a, ɔwɔ kɛ yɛ kɔsɔɔti yɛyɛ yɛ ninyɛne pɛpɛɛpɛ na yɛto ɛlɔnwɔne yɛdie buluku ne mɔɔ bɛye la bie. Saa yɛto yɛ rɛle aze na yɛsi abotane zɛhae a, ɔkile kɛ yɛle Keleseɛnema mɔɔ yɛnyi, na ɔda yɛ mediemalɔlɛ mɔɔ yɛlɛ yɛmaa awie ko biala la ali.—Dwɔn 13:35.
◼ Ndoboa: Yɛbahola yɛaye ndoboa wɔ yɛ Belemgbunlililɛ Asalo ɛkɛ anzɛɛ nyianu ne abo yɛava yɛaboa ewiade amuala gyima ne yɛava yɛahile kɛzi yɛ nye sɔ nyianu ngyehyɛleɛ ne la. Ɔwɔ kɛ bɛtua kyɛɛke biala mɔɔ bɛye wɔ nyianu ne abo la bɛmaa “Watch Tower.”
◼ Esiane Nee Edwɛkɛ Mɔɔ Hyia Ndɛndɛ: Saa awie hyia ayileyɛlɛ ndɛndɛ wɔ nyianu ne abo a, yɛsɛlɛ kɛ bɛnwu menli mɔɔ die nyɛvolɛ ne mɔ anu ko mɔɔ bikye bɛ la na ɔbamaa Ayilelielɛ Ɛleka ne anzo ade ye ndɛndɛ amaa yɛ menli mɔɔ bɔ mɔdenle mɔɔ bɛwɔ ɛkɛ la ahola anlea kɛzi ye gyinlabelɛ ne de la na bɛava nwolɛ moalɛ mɔɔ fɛta la bɛamaa ye.
◼ Bɔkɔbɔkɔyɛlɛ: Ɔwɔ kɛ menli mɔɔ bahɔ nyianu ne kɔsɔɔti la siezie mbia mɔɔ bɛkɛli debie wɔ zo la azo. Kɛmɔ bɛfa ninyɛne mɔɔ bɛgua ewula nu bɛsiezie nyianu biala abo la ati, bɛnlea kɛ bɛkɛva ngɛlata, aleɛ, nzule wolɔba nee ninyɛne gyɛne bɛkɛgua nu. Saa yɛyɛ ɛhye a ɔkile kɛ yɛle menli mɔɔ yɛyɛ yɛ nwo bɔkɔbɔkɔ la.
◼ Nvoninli Ɛpɛlɛ: Saa nyianu ne ɛlɛkɔ zo na ɛpɛ nvoninli a, mmafa flash ɛdi gyima. Kɛmɔ yɛmkpondɛ kɛ yɛsi kongo wɔ teokelase nyianu bo la ati, yɛngulo kɛ yɛpɛ nvoninli yɛdie ezukoa. Eza noko yɛngulo kɛ yɛka yɛkile menli mɔɔ pɛ nvoninli die ezukoa la kɛ bɛrapɛ mediema nvoninli wɔ nyianu ne abo bɛva bɛkpondɛ ezukoa.—w84-E 7/1 m. 25; eza nea Organized, mukelɛ 142, ɛdendɛkpunli 3.
◼ Bɛbɔ nu Bɛdɛnla kɛ Abusua: Ɔwɔ kɛ awovolɛ nee bɛ mra tɛnla ɛleka ko wɔ nyianu ne abo tɛla kɛ bɛkɛgyakyi bɛ mra, mɔɔ bɛdabɛ mɔɔ bɛtɛnyianle ɛvolɛ abulanwiɔ boka nwo la bɛkɛmaa bɛ nee bɛ gɔnwo mɔ ngakula gyɛne kɛdɛnla. Saa bɛ nee bɛ tɛnla a, bɛbahola bɛamaa bɛ anwosesebɛ bɛamaa bɛahɛlɛ nyianu ne anu debie mɔɔ bɛ nye die nwo la.
◼ Mgbɔlaboa: Ɛvolɛ biala menli dɔɔnwo mgbɔlaboa maa bɛboda. Ɔle kpalɛ kɛ ɛwula mgbɔlaboa mɔɔ saa ɛfo debie zo a ɔnrɛmaa ɛnrɛdɔ aze la.
◼ Edwɛkɛ Mɔɔ Bɛkye: Ɔnle kɛ bɛfa debie mɔɔ bɛlɛfa bɛahye edwɛkɛ la bɛsɔ nyianu ne abo lateleke anzɛɛ debie mɔɔ bɛtendɛ nuhua la, na bɛbahola bɛava bɛali gyima wɔ adenle mɔɔ ɔngyegye awie mɔ la azo ala.
◼ Please Follow Up Kɛlata: Saa bɛdi awie mgbemgbɛnenu daselɛ wɔ nyianu mekɛ ne anu na ɔkile nwolɛ anyelielɛ a, bɛva Please Follow Up (S-43) ne na bɛli nwolɛ gyima bɛmaa ye. Ɔwɔ kɛ nolobɔlɛma fa Please Follow Up kɛlata ko anzɛɛ nwiɔ kɔ nyianu ne abo. Bɛbahola bɛava ngɛlata ne mɔɔ bɛhɛlɛ zolɛ bɛwie la bɛahɔ Bulukulielɛ Ɛleka ne anzɛɛ bɛava bɛamaa bɛ asafo ne anu kɛlɛhɛlɛvolɛ ne wɔ mekɛ mɔɔ bɛkɛzia bɛkɛhɔ la.—Bɛnlea March 2005 Our Kingdom Ministry, mukelɛ 4.
◼ Dabelɛ: (1) Saa ɛwɔ sua mɔɔ ɛbadua nwolɛ kakɛ la anu a, ɛ nee menli dodo mɔɔ bo zolɛ la mmada nu. (2) Saa ɛwɔ awie mɔ sua nu a, suzu ninyɛne nwo ɔlua ɛ nwo mɔɔ ɛbayɛ ye bɔkɔbɔkɔ, wɔayɛ wɔ ninyɛne pɛpɛɛpɛ na wɔahile nwolɛ anyezɔlɛ la azo. (3) Ɔnle kɛ mediema mrenya nee mraalɛ da sua ko anu kyesɛ bɛle abusua ko. (4) Mmato aleɛ wɔ sua mɔɔ bɛndo aleɛ wɔ nu la anu. (5) Amaa wɔali ɛ nwo eni la, ɔnle kɛ ɛbia alie nwo. Saa ɔkɛyɛ boɛ a ɔwɔ kɛ ɛfa ɛkpa anzɛɛ ɛdanlɛ ɛyɛ abialeɛ. (6) Kɛmɔ yɛle Keleseɛnema la ati, yɛngulo kɛ yɛfa ngyehyɛleɛ biala mɔɔ bɛyɛ bɛmaa nyɛvolɛ la yɛdi gyima wɔ adenle ɛtane zo. (7) Da sunsum ma ne ali wɔ kɛzi ɛ nee menli mɔɔ yɛ gyima wɔ hotɛle anzɛɛ mbusua mɔɔ ɛ nee bɛ de la yɛ la anu. (8) Saa edwɛkɛ ba wɔ dabelɛ anzɛɛ hotɛle sua ne anwo a, nea kɛ ɛkɛbɔ “Room Department” ne amaneɛ wɔ nyianu ne abo.