Daselɛlilɛ Maa Yɛnyia Anwosesebɛ wɔ Sunsum Nu
1. Nvasoɛ boni a yɛnyia wɔ daselɛlilɛ gyima ne anu a?
1 Saa yɛbɔ mɔdenle yɛfa yɛ nwo yɛwula daselɛlilɛ gyima ne anu kpalɛ a, ɔmaa yɛnyia anwosesebɛ wɔ sunsum nu na yɛ nye die kpole. Nɔhalɛ nu, yɛkɔ daselɛlilɛ kɛ yɛfa yɛazɔ Gyihova anye titile. Noko akee, saa yɛtie mɛla ne mɔɔ se “bɔ edwɛkɛ ne nolo” la a, yɛnyia nyilalɛ yɛfi Gyihova ɛkɛ na eza ɔboa yɛ wɔ ndenle gyɛne zo. (2 Tem. 4:2; Aye. 48:17, 18) Kɛzi daselɛlilɛ kola maa yɛ anwosesebɛ na ɔmaa yɛ nye die ɛ?
2. Kɛzi daselɛlilɛ maa yɛnyia anwosesebɛ ɛ?
2 Yɛnyia Anwosesebɛ nee Nyilalɛ: Daselɛlilɛ maa yɛ anwosesebɛ maa yɛfa yɛ adwenle yɛsie Belemgbunlililɛ ne anu nyilalɛ ne azo, na tɛ ngyegyelɛ mɔɔ wɔ ɛkɛ ne ɛnɛ la. (2 Kɔl. 4:18) Baebolo ne anu nɔhalɛ ne mɔɔ yɛkilehile nuhua la maa diedi mɔɔ yɛlɛ wɔ Gyihova ɛwɔkɛ ne mɔ anu la yɛ kpole, na ɔmaa yɛnyia nɔhalɛ ne anwo anyezɔlɛ kpalɛ. (Aye. 65:13, 14) Mekɛ mɔɔ yɛlɛboa awie mɔ yɛamaa bɛanyi wɔ sunsum nu amaa ‘bɛanyɛ ɛtane ewiade ye ɛdeɛ’ la, ɔmaa kpɔkɛ mɔɔ yɛbɔ kɛ yɛtwe yɛ nwo yɛavi ewiade ne anwo la anu mia.—Dwɔn 17:14, 16; Wulo. 12:2.
3. Kɛzi yɛ daselɛlilɛ ne boa maa yɛnyia Keleseɛnema subane ngakyile ɛ?
3 Daselɛlilɛ mɔɔ yɛkɔ la boa maa yɛnyia Keleseɛnema subane ngakyile. Kɛ neazo la, saa yɛbɔ mɔdenle ‘yɛ nee menli muala yɛ ko a,’ ɔboa ɔmaa yɛnyia mɛlɛbɛnwoaze subane kpole. (1 Kɔl. 9:19-23) Mekɛ mɔɔ yɛlɛtendɛ yɛahile menli mɔɔ ‘bɛluolua nu kɛ mboane mɔɔ ɛnlɛ neavolɛ la’ ɔmaa yɛbɔ mɔdenle yɛse bɛ anwunvɔne na yɛte bɛ edwɛkɛ bo. (Mat. 9:36) Saa yɛkɔ zo yɛdi daselɛ ɔnva nwo kɛ bɛ nye ɛnlie nwo anzɛɛ bɛdwazo bɛtia a, ɔmaa yɛnyia abotane. Saa yɛtu yɛ nwo yɛsie ɛkɛ yɛfa yɛboa awie mɔ a, ɔmaa yɛ nye die kpole.—Gyi. 20:35.
4. Kɛzi ɛte nganeɛ wɔ wɔ daselɛlilɛ gyima ne anwo ɛ?
4 Nea nyilalɛ mɔɔ yɛnyia kɛ yɛlɛyɛ gyima mɔɔ maa yɛye Nuhua ne mɔɔ fɛta kɛ yɛsonle ɔ ngomekye la ayɛlɛ a! Daselɛlilɛ maa yɛ anwosesebɛ. Ɔmaa bɛdabɛ mɔɔ bɛfa bɛ nwo bɛwula nuhua kpalɛ na bɛdi ‘edwɛkpa ne anwo daselɛ’ bɔkɔɔ la nyia nyilalɛ dɔɔnwo.—Gyi. 20:24.