Yɛlɛ Ninyɛne Kpalɛ Yɛfa Yɛmaa
1 Sunsum nu ninyɛne kpalɛ mɔɔ yɛ nye die nwo la ɛyi Nyamenle Edwɛkɛ ne anu. (Edw. 12:6; 119:11, 14) Mekɛ bie anu, Gyisɛse yɛle Belemgbunlililɛ ne anwo neazo ngakyile na akee ɔbizale ye ɛdoavolɛma ne kɛ: “Asoo bɛte ɛhye mɔ amuala abo?” Mekɛ mɔɔ bɛbuale kɛ ɛhɛe la, ɔzele bɛ kɛ: “Zɔhane ati mɛla kilehilevolɛ biala mɔɔ bɛtete ye wɔ Anwuma Belemgbunlililɛ ne anwo la le kɛ awuke zo neavolɛ mɔɔ ye ninyɛne fofolɛ nee dɛba fi ye gya nu finde la.”—Mat. 13:1-52.
2 Yɛkola yɛbu Baebolo ne anu nɔhalɛ ne mɔɔ yɛbɔle ɔ bo yɛzukoale la kɛ ninyɛne dɛba. Baebolo ne anu ninyɛne fofolɛ mɔɔ yɛlua Nyamenle Edwɛkɛ ne azo yɛzukoa yɛhɔ moa la, ɛmaa yɛnwu Baebolo ne anu nɔhalɛ gyɛne mɔɔ le ninyɛne fofolɛ la. (1 Kɔl. 2:7) Bieko, ɔlua “akɛlɛ nɔhavo nee nrɛlɛbɛvolɛ” ne moalɛ zo, yɛde edwɛkɛ fofolɛ abo.—Mat. 24:45.
3 Yɛ nye die sunsum nu ninyɛne kpalɛ ɛhye mɔ mɔɔ le dɛba nee fofolɛ la anwo kpole. Ɛhye ka yɛ maa yɛnyia ɛhulolɛ kɛ bɛkɛtete yɛ na yɛkɛnyia anwubielɛ kɛ Nyamenle Edwɛkɛ ne anwo kilehilevolɛma, na yɛkɛvi atiakunlukɛnlɛma nu yɛkɛhilehile awie mɔ nɔhalɛ ɛhye mɔ mɔɔ sonle bolɛ la.
4 Sukoa Debie Fi Gyisɛse Neazo ne Anu: Gyisɛse bɔle mɔdenle hilehilele awie mɔ vale hilele kɛzi ɔ nye die ninyɛne ɛhye mɔ anwo la. Mekɛ bɔbɔ mɔɔ ɛnee yevɛ la yeangyakyi kɛ ɔkɛye ninyɛne kpalɛ ɔkɛvi ye “gya” ne anu.—Dwɔn 4:6-14.
5 Ɛhulolɛ mɔɔ Gyisɛse nyianle manle menli mɔɔ ɛnde Nyamenle edwɛkɛ ne abo la hanle ye maanle ɔhanle Nyamenle edwɛkɛ ne anu nɔhalɛ mɔɔ maa ngoane la ɔhilele bɛ. (Edw. 72:13) Ɔzele menli mɔɔ sunsum nu ɛhɔne ɛlɛku bɛ la anwunvɔne na “ɔhilehilele bɛ ninyɛne dɔɔnwo.”—Mak. 6:34.
6 Sukoa Gyisɛse: Saa yɛ nye die ninyɛne kpalɛ mɔɔ yɛlɛ la anwo kpole a, ɔbamaa yɛ nye abolo kɛ Gyisɛse la kɛ yɛkile menli sunsum nu ninyɛne kpalɛ mɔɔ wɔ Baebolo ne anu la. (Mrɛ. 2:1-5) Ɔdwu mekɛ ne bie a yɛbahola yɛavɛ ɛdeɛ, noko yɛbahola yɛava anyelielɛ yɛaha Baebolo ne anu nɔhalɛ ne anwo edwɛkɛ. (Mak. 6:34) Ninyɛne kpalɛ nwo anyezɔlɛ mɔɔ yɛlɛ la baha yɛ yeamaa yɛayɛ dɔɔnwo wɔ daselɛlilɛ nu na dahuu yɛahulo kɛ yɛkɛhɔ daselɛlilɛ.