Nolobɔlɛ

◼ Buluku mɔɔ yɛbava yɛamaa wɔ July nee August: Bɛva brochure biala mɔɔ lɛ mukelɛ 32 mɔɔ bɛlɛ la bɛmaa. Yɛ nye kɛlie nwo kɛ asafo ne mɔ kɛyɛ ngyehyɛleɛ na bɛkɛva brochure biala mɔɔ bɛlɛ ye dɔɔnwo wɔ bɛ ɛkɛ la bɛkɛmaa. September: Duzu A Baebolo ne Kilehile Amgba A? Bɛbɔ mɔdenle kpalɛ bɛbɔ Baebolo ɛzukoalɛ bo wɔ mekɛ mɔɔ lumua la anu. Saa suamenle ne mɔ lɛ buluku ɛhye bie a, bɛyɛ Baebolo ɛzukoalɛ nwo yɛkile sikalɛ bɛva bɛhile kɛzi bɛbahola bɛanyia nvasoɛ bɛavi zolɛ la. October: Yɛbava Watchtower nee Awake! magazine yɛamaa. Ɛleka mɔɔ bɛkɛhile nwolɛ anyelielɛ la, bɛva Ɛbahulo kɛ Ɛbanwu Dɔɔnwo Wɔavale Baebolo ne Anwo? tract ne bɛmaa na bɛzuzu nwolɛ kɛ bɛfa bɛabɔ Baebolo ɛzukoalɛ bo.

◼ Kɛmɔ Folɛ nee Molɛ nnu a wɔ August anu la ati, ɔbayɛ siane kɛnlɛma yeamaa adekpakyelɛ boavolɛ gyimayɛlɛ.

◼ Ɔvi September mɔɔ kɔ la, maanzinli zo neavolɛma bamaa bagua nu ɛdendɛlɛ mɔɔ ati se “Dua Nɔhalɛlilɛ Nu.”

◼ Ɔfese ne ɛnli nolobɔlɛnli ko biala mɔɔ kɛbiza buluku la ngɛlata nwo gyima. Ɔwɔ kɛ ebianutɛnlavolɛ ne yɛ ngyehyɛleɛ siane biala kolaa na bɛava mbuluku mɔɔ asafo ne die ye siane biala la bɛanwa ɔfese ne, amaa awie biala mɔɔ kulo kɛ ɔdie mbuluku la ahola anwu adiema ne mɔɔ nea mbuluku zo la. Yɛsɛlɛ wɔ yɛ mbuluku mɔɔ bɛkɛla bɛmaa mediema la nzonlɛ.

◼ Saa ɔkɛyɛ boɛ a bɛdia mbuluku nee magazine kɔsɔɔti mɔɔ bɛlɛ la wɔ August 31, 2008 anzɛɛ mɔɔ bikye la. Mbuluku ɛdianlɛ ɛhye nee mɔɔ mbuluku ɛlielɛ ekpunli zo neavolɛ ne tia ye siane biala la le ko na ɔwɔ kɛ bɛkɛlɛ dodo ne wɔ Literature Inventory (S-18) kɛlata ne azo. Bɛbiza azonvolɛ mɔɔ nea mbuluku zo la na bɛnwu magazine dodo mɔɔ wɔ ɛkɛ la. Ɔwɔ kɛ kɛlɛhɛlɛvolɛ ne mɔɔ wɔ asafo ne mɔɔ nea kyehyɛ mbuluku ne anu la nea mbuluku ɛdianlɛ ne azo. Ɔ nee asafo mɔɔ kyehyɛ mbuluku ne la ebianutɛnlavolɛ ne bava bɛ sa awula kɛlata ne abo. Asafo biala mɔɔ kyehyɛ mbuluku la asa baha Literature Inventory kɛlata nsa. Yɛsɛlɛ bɛ bɛva kpalɛ ne bɛnwa ɔfese ne kolaa na September 6 adwu. Bɛva kɛlata ne ko bɛzie. Bɛbahola bɛanlea kɛlata ne mɔɔ tɔ zo nsa la azo bɛava bɛayɛ gyima ne.

◼ Ɔwɔ kɛ bɛfa Baebolo ne Kilehile buluku ne emomu bɛbɔ Baebolo ɛzukoalɛ bo na tɛ Kpondɛ brochure ne. Bɛbahola bɛahɔ zo bɛava Kpondɛ brochure ne bɛamaa wɔ daselɛlilɛ nu kɔkpula kɛ mɔɔ bɛlɛ la kɛwie.