Nolobɔlɛ
◼ Buluku mɔɔ yɛbava yɛamaa wɔ June: Yɛbava Duzu A Baebolo ne Kilehile Amgba A? yɛamaa. Bɛbɔ mɔdenle bɛbɔ Baebolo ɛzukoalɛ bo. July nee August: Bɛva brochure biala mɔɔ lɛ mukelɛ 32 mɔɔ bɛlɛ la bɛmaa. Yɛ nye kɛlie nwo kɛ asafo ne mɔ kɛyɛ ngyehyɛleɛ na bɛkɛva brochure biala mɔɔ bɛlɛ ye dɔɔnwo wɔ bɛ ɛkɛ la bɛkɛmaa. September: Duzu A Baebolo ne Kilehile Amgba A? Bɛbɔ mɔdenle kpalɛ bɛbɔ Baebolo ɛzukoalɛ bo wɔ mekɛ mɔɔ lumua la anu.
◼ Kɛmɔ Folɛ nee Molɛ nnu a wɔ August anu la ati, ɔbayɛ siane kɛnlɛma yeamaa adekpakyelɛ boavolɛ gyimayɛlɛ.
◼ Ɔwɔ kɛ awie mɔɔ ebianutɛnlavolɛ ne ɛkpa ye la neɛnlea asafo ne March, April yɛɛ May siane ne mɔ ezukoa mgbondabulɛ ne anu. Saa bɛyɛ ɛhye a, ɔwɔ kɛ bɛbɔ asafo ne amaneɛ wɔ mekɛ mɔɔ bɛgenga mgbondabulɛ bieko mɔɔ doa zo bɛwie la.—Bɛnlea Instructions for Congregation Accounting (S-27).
◼ Ɔle kpalɛ kɛ bɛkɛva dahuu adekpakyelɛ gyima nwo ademizalɛ kɛlata bɛkɛnwa ɔfese ne, yeanyɛ boɛ fee la kenle 30 anu kolaa na mekɛ mɔɔ ɔkɛbɔ ɔ bo la adwu. Ɔwɔ kɛ asafo kɛlɛhɛlɛvolɛ ne neɛnlea ngɛlata ne mɔ anu na ɔnea kɛ bɛli nwolɛ gyima bɛwie. Saa menli mɔɔ biza adenle ne la ɛngakye kenle fɔɔnwo mɔɔ bɛzɔnenle bɛ a, bɛva bɛ nye bɛzu kenle ne na bɛyɛ nwolɛ kɛlɛtokɛ. Ɔwɔ kɛ kɛlɛhɛlɛvolɛ ne kɛlɛ kenle ɛhye wɔ Congregation’s Publisher Record (S-21) kɛlata ne azo.
◼ Bɛyɛ ye nzonlɛ kɛ yɛnrɛva ɛsalɛdolɛ kɛlata titile biala yɛnrɛbɔ 2008 maangyeba nyianu ne anwo nolo. Noko akee, yɛlɛyɛ ngyehyɛleɛ yɛava yɛabɔ ewiade amuala nolo mɔɔ hyia la wɔ kenle bie. Yɛbava zɔhane ngyehyɛleɛ ne anwo edwɛkɛ dɔɔnwo yɛarɛlɛ bɛ nzinlii.
◼ Ɔvi January 2008 mɔɔ ba la, bɛva Watchtower nee Awake! mɔɔ bɛbɔ bɛtie wɔ Nrelenza nee aneɛ titile bie mɔ anu la bɛgua Intanɛte address ɛleka www.jw.org. Menli dɔɔnwo kulo magazine ɛhye mɔ mɔɔ bɛ sa ka bɛ kolaa na CD anzɛɛ MP3 ne mɔ ara bɛ asafo ne anu la. Mekɛ biala mɔɔ awie baye magazine ne mɔ avi Intanɛte ne azo la ahyehyɛdeɛ ne tua nwolɛ kakɛ. Noko akee, yɛfa yɛgua ɛkɛ a ɔte kakɛ ne azo ɔtɛla kɛ yɛbayɛ bɛ wɔ apawa zo na yɛava yɛanwa la. Ɛhye ati, bɛlɛmaa nolobɔlɛma mɔɔ ye magazine ne mɔ fi Intanɛte ne azo la anwosesebɛ kɛ bɛpɛ CD anzɛɛ MP3 mɔɔ bɛdie bɛfi magazine sonvolɛ ne ɛkɛ la anu.