Ɛbahola Wɔanyia Ɛ Nwo!
1. Duzu ati a ɔwɔ kɛ ɛsuzu adekpakyelɛ gyima ne anwo ɛ?
1 Ɛkpondɛ kɛ ɛ nye die kpole na ɛ nwo tɔ wɔ wɔ ɛbɛlabɔlɛ nu ɔ? Ɛnyia ahomeka nee ahunlundwolɛ kɛ ɛkɛboa awie mɔ ɔ? Asoo ɛkulo kɛ ɛyɛ dɔɔnwo wɔ Gyihova ɛzonlenlɛ nu? Saa ɛbua kpuyia ɛhye mɔ bie kɛ ɛhɛe a, ɛnee ɔwɔ kɛ ɛsuzu dahuu adekpakyelɛ gyima ne anwo. Nɔhalɛ nu, ɔwɔ kɛ ɛsuzu abusua nee Ngɛlɛlera ne anu ɛzonlelilɛ ngakyile, kpɔkɛdelɛ nee anwodolɛ gyɛne mɔɔ ɛlɛ la anwo.
2. Ka sunsum nu anwonyia mɔɔ dahuu adekpakyelɛma nyia la bie mɔ anwo edwɛkɛ.
2 Sɔlɔmɔn edwɛkɛ ne mɔɔ Nyamenle Sunsum ne hanle ye manle ɔhɛlɛle la kile kɛ Gyihova nyilalɛ maa sonla nyia ɔ nwo. (Mrɛ. 10:22) Ɛnɛ, Gyihova nyilalɛ maa sonla nyia ɔ nwo wɔ sunsum nu. Dahuu adekpakyelɛma nyia anwonyia ɛhye dɔɔnwo. Kɛ neazo la, bɛnyia anyelielɛ kpole wɔ ɛmanlɛ nu wɔ “mekɛ biala mɔɔ bɛkɛnyia nuhua adenle” bɛkɛvi bɛ gyima nwo la. (Kɔlɔ. 4:5; Gyi. 20:35) Gyihova nwu gyima mɔɔ bɛfi ɛlɔlɛ nu bɛyɛ la na ɔ nye die nwolɛ. “Anwonyia” zɛhae mɔɔ wɔ anwuma la azo ɛnrɛde ɛlɛ. (Mat. 6:20; Hib. 6:10) Bieko, saa adekpakyelɛma maa bɛ nye yɛ kpalɛ na bɛnyia Gyihova anu diedi kɛ ɔbamaa bɛ sa aha mɔɔ bɛhyia la a, bɛ nee ye agɔnwolɛvalɛ ne bayɛ kpole.—Mat. 6:22, 25, 32; Hib. 13:5, 6.
3. Ngakyile boni a wɔ nwonane nee sunsum afoa nu anwonyia ɛkpondɛlɛ nu ɛ?
3 Nwonane afoa nu ninyɛne ɛkpondɛlɛ maa awie “tɔ ngyegyelɛ nee munzule atiakunluwɔzo mgbane mgbane mɔɔ sɛkye menli” la anu. (1 Tem. 6:9, 10; Gye. 5:1-3) Gyihova nyilalɛ ɛnva ɛhye biala ɛmba. Kɛmɔ dahuu adekpakyelɛma fa mekɛ dɔɔnwo kɔ daselɛlilɛ la ati, ɔboa bɛ ɔmaa bɛnyia sunsum nu gyinlabelɛ kpalɛ na bɛfa bɛ adwenle bɛsie ninyɛne mɔɔ hyia la azo. (Fel. 1:10) Adiema nrenya ko gyakyile ye gyima mɔɔ ɛnee ɔyɛ kɛ engyinia mɔɔ die ye mekɛ la na ɔyɛle adekpakyelɛ gyima. Ɔhanle kɛ: “Ɛnee me gyima ne ɛmmaa menyia mekɛ. Noko adekpakyelɛ gyima ne ɛnle zɔ. Kɛkala mekola meboa menli na mekilehile bɛ nɔhalɛ ne. Ɛhye yɛ anyelielɛ nee ahunlundwolɛ.”
4. Kɛzi dahuu adekpakyelɛma nyia nyilalɛ wɔ mekɛ mɔɔ bɛlɛmaa awie mɔ anyia nyilalɛ la ɛ?
4 Ɔle Nyilalɛ Ɔmaa Awie Mɔ: Ɛnɛ, “anwongyelelɛ dɔɔnwo ka awie biala.” (2 Tem. 3:1) Ɛleka biala mɔɔ menli wɔ la bɛhyia anyelazo. Saa Belemgbunlililɛ nolobɔlɛma boa menli mɔɔ bɛnlɛ anyelazo la maa bɛnwu nɔhalɛ ne na bɛnyia anyelazo a, bɛ nye die. Nea kɛzi dahuu adekpakyelɛma mɔɔ fa dɔnehwele mɔɔ bo 800 yɛ ngoanelielɛ gyima ɛhye la anye die kpole a!—1 Tem. 4:16.
5, 6. Duzu a baboa wɔ yeamaa wɔahola wɔayɛ dahuu adekpakyelɛnli a?
5 Asoo wɔzuzu nwo kpalɛ kɛ ɛyɛ adekpakyelɛ gyima ne bie? Ɔbahyia kɛ ɛnyia mekɛ ɛfa “ɛbɔ ɛbɛla kpalɛ wɔ adenle biala anu” ɛfi ninyɛne mɔɔ anwo ɛngyia la anwo. (Ɛfɛ. 5:15, 16) Menli dɔɔnwo ɛyɛ zɔ na bɛde bɛ mekɛ mɔɔ bɛfa bɛyɛ gyima la azo amaa bɛahola bɛava mekɛ dɔɔnwo bɛayɛ Belemgbunlililɛ gyima ne. Ɛbahola wɔayɛ wɔ ngyehyɛleɛ na wɔaboka bɛ nwo ɔ?
6 Sɛlɛ Gyihova ɛkɛ ne nrɛlɛbɛ na yɛ wɔ ngyehyɛleɛ ne kpalɛ. (Gye. 1:5) Nyilalɛ boni a ɛbanyia wɔ nwolɛ a? Ɛbanyia sunsum nu anwonyia dɔɔnwo! Gyihova bamaa ɛ sa aha nwonane afoa nu ninyɛne mɔɔ ɛhyia la noko. (Mat. 6:33) Menli mɔɔ sɔ Gyihova nea wɔ ɛhye anwo la nyia “nyilalɛ dɔɔnwo.”—Mal. 3:10.