Kyekye Menli Mɔɔ Ɛlɛdi Nyane La Arɛle
1. Duzu ati a menli mɔɔ ɛlɛdi nyane la hyia arɛlekyekyelɛ ɛ?
1 Awie dɔvolɛ bie wu a ɔdi nyane kpole, titile bɛdabɛ mɔɔ bɛnlɛ Belemgbunlililɛ ne anwo anyelazo la. (1 Tɛs. 4:13) Menli dɔɔnwo ta suzu kɛ: ‘Duzu ati a menli wu a? Bɛwu a bɛkɔ ni? Asoo mebanwu me dɔvolɛ ne mɔɔ ɛwu la bieko?’ Nzuzulɛ bie mɔ mɔɔ yɛbahola yɛava yɛakyekye menli mɔɔ yɛ nee bɛ yia wɔ daselɛlilɛ nu mɔɔ bɛlɛdi nyane ɔluakɛ bɛ nwo sonla anzɛɛ bɛ gɔnwo bie ɛwu arɛle la a wɔ ɛke la.—Aye. 61:2.
2. Saa suamenle bie ka kile yɛ kɛ ɔlɛdi nyane a, ɔwɔ kɛ yɛbɔ mɔdenle kɛ yɛkɛli daselɛ tendenle ɔ?
2 Sua nu nee Sua Nu: Bie a suamenle bie baha ahile yɛ kɛ awie wule ye abusua ne anu la ɛtɛkyɛle. Ɔlɛsu ɔ? Ɔ nwo amra mɔɔ ɛlɛdi nyane la ɛyi sua nu ɛkɛ ɔ? Ɔba ye zɛhae a, ɔkɛyɛ kpalɛ kɛ yɛnrɛdendɛ dɔɔnwo. (Nolo. 3:1, 7) Bie a yɛbahola yɛakyekye ɔ rɛle, yɛamaa ye nwolɛ tract, magazine anzɛɛ brochure mɔɔ fɛta la, na yɛazɛlɛ adenle. Akee yɛbahola yɛazia yɛahɔ ɛkɛ wɔ mekɛ kpalɛ nu na yɛava Baebolo ne anu edwɛkɛ dɔɔnwo yɛakyekye ɔ rɛle.
3. Saa mekɛ wɔ nu a, ngɛlɛlera boni mɔ a yɛbahola yɛazuzu nwolɛ yɛahile suamenle bie mɔɔ ɛlɛdi nyane la ɛ?
3 Wɔ mekɛ gyɛne nu, yɛbanwu kɛ yɛbahola yɛali daselɛ dɔɔnwo wɔ mekɛ mɔɔ lumua la anu. Tɛ mekɛ ɛhye anu a yɛbahile kɛ adwenle bie ɛnle kpalɛ a ɛdeɛ, noko yɛbahola yɛ nee bɛ agenga Baebolo ne anu ɛwɔkɛ mɔɔ fane ewudwazo ne anwo la. (Dwɔn 5:28, 29) Anzɛɛ yɛbahola yɛahile bɛ mɔɔ Baebolo ne ka wɔ mɔwuamra anwo la. (Nolo. 9:5, 10) Baebolo ne anu ewudwazo nwo edwɛkɛ ne noko bahola akyekye bɛ rɛle. (Dwɔn 11:39-44) Adenle bieko noko a le kɛ ɛkɛzuzu Gyihova anu anyelazo edwɛkɛ mɔɔ Dwobu nɔhavo ne hanle la anwo. (Dwo. 14:14, 15) Yɛlɛfi ɛkɛ ne a, yɛbahola yɛava What Happens to Us When We Die?, When Someone You Love Dies, anzɛɛ brochure nee tract gyɛne mɔɔ fɛta la yɛamaa. Anzɛɛ yɛbahola yɛava Baebolo ne Kilehile buluku ne yɛamaa ye, yɛahwe ye adwenle yɛahɔ tile 6 ne azo, na yɛayɛ ngyehyɛleɛ kɛ yɛbazia yɛara na yɛaha nwolɛ edwɛkɛ dɔɔnwo.
4. Mekɛ gyɛne boni a yɛbahola yɛakyekye menli rɛle a?
4 Mekɛ Gyɛne Nu: Saa bɛlɛmaa awie mɔɔ ɛwu la ɛzɛne nu ɛdendɛlɛ wɔ Belemgbunlililɛ Asalo a, yɛbahola yɛazuzu nwo kɛ, menli mɔɔ bɛnle diedima la bara bie ɔ? Yɛbahola yɛava mbuluku mɔɔ kyekye menli rɛle la yɛamaa bɛ. Dahuu ɛlɛkɔ ɛzɛne a, fa Baebolo nee mbuluku bie mɔ na siezie ɛ nwo kɛ ɛbaha edwɛkɛ mɔɔ maa anwosesebɛ la wɔahile menli mɔɔ ɛlɛdi nyane la. (1 Pit. 3:15) Menli mɔɔ bɛ awie ɛwu la bie mɔ anye ɛlie nwo kɛ bɛkɛva mbuluku mɔɔ fɛta la bɛkɛmaa bɛdabɛ mɔɔ bɛlɛdi nyane la. Ɔdwu mekɛ ne bie a, ɛzɛne nwo nolobɔlɛ mɔɔ bɛfa bɛba adwelielilɛ ngɛlata nu la ɛmaa nolobɔlɛma ɛhɛlɛ kɛlata ekyi ɛva ɛkyekye abusua mɔɔ nuhua menli ɛlɛdi nyane la arɛle. Wɔ edwɛkɛ zɛhae ko anu, mɔɔ kunlavolɛ nrenya ne nee ɔ ra raalɛ ne asa hanle kɛlata bie mɔɔ tract boka nwolɛ la, bɛhɔle nolobɔlɛnli ne sua nu na bɛbizale ye kɛ: “Ɛdawɔ a ɛvale kɛlata ɛhye ɛrɛlɛle yɛ a? Yɛkulo kɛ yɛsukoa Baebolo ne anu edwɛkɛ dɔɔnwo!” Nrenya ne nee ɔ ra raalɛ ne manle adenle kɛ bɛ nee bɛ ɛzukoa Baebolo ne na bɛbɔle ɔ bo kɛ bɛkɔ debiezukoalɛ.
5. Duzu ati a ɔwɔ kɛ yɛkpondɛ ndenle kpalɛ yɛdua zo yɛkyekye menli mɔɔ ɛlɛdi nyane la arɛle a?
5 Nolobɔvo ne 7:2 ka kɛ: “Ɔle kpalɛ kɛ ɛkɛhɔ awuke mɔɔ bɛlɛdi nyane nu la anu tɛla kɛ ɛkɛhɔ awuke mɔɔ bɛlɛto ɛkponle wɔ nu la anu.” Ɛhye ati, saa yɛlɛkɔ ɛzɛne a, bɛmaa yɛva bodane bie yɛzie yɛ nye zo. Ɔrɛla ye kɛ yɛ muala yɛkɛkpondɛ ndenle kpalɛ yɛkɛlua zo yɛkɛkyekye menli mɔɔ ɛlɛdi nyane la arɛle.