Kɛlata Mɔɔ Vi Neazo Eku Ne Ɛkɛ
Mediema Gyihova Alasevolɛ:
Ɛzoanvolɛ Pɔɔlo luale adenle biala mɔɔ ɔnyianle la azo lale ye ɛlɔlɛ nee anyezɔlɛ mɔɔ ɔlɛ ɔmaa ɔ gɔnwo mɔ diedima la ali. Ɔhɛlɛle Keleseɛnema mɔɔ wɔ Wulomu la kɛ: “[Medua] Gyisɛse Kelaese anwo zo meayɛ Nyamenle mo wɔ bɛ kɔsɔɔti bɛ ti, ɔluakɛ bɛ diedi nganeɛ ɛdwu ewiade amra amuala anzo nu.” (Wulo. 1:8) Nɔhalɛ nu, wɔ Wulomu maanle ne anu amuala, ɛnee bɛze zɔhane ɛvoyia ne mɔɔ lumua la anu Keleseɛnema kɛ bɛlɛ diedi kpole yɛɛ bɛbɔ mɔdenle wɔ daselɛlilɛ gyima ne anu. (1 Tɛs. 1:8) Ɔnyɛ ɛzulolɛ kɛ Pɔɔlo nyianle ɔ mediema ne mɔ anwo ɛlɔlɛ kpole zɛhae a!
Mekɛ biala mɔɔ bɛ adwenle kɛra yɛ ti anu la yɛda Gyihova ase kɛ mɔɔ Pɔɔlo yɛle la. Yɛlɛ bɛ kɔsɔɔti anwo ɛlɔlɛ kpole! Na bɛbahola bɛanyia anwodozo kɛ Gyihova kulo bɛ nuhua ko biala. Bɛ nuhua dɔɔnwo ɛlɛyia dwazotia mɔɔ anu yɛ se, noko bɛkɔ zo bɛka edwɛkɛ ne. Nea kɛzi akɛnrazilɛ mɔɔ bɛfa bɛka edwɛkɛ ne la maa Gyihova anye die ɛ!—Mrɛ. 27:11.
Yearbook ne maa yɛnwu daselɛ dɔɔnwo mɔɔ kile kɛ Awulae Gyisɛse Kelaese ɛlɛkɔ “yeahɔho yeali konim” na akodeɛ biala mɔɔ bɛyɛ bɛtia Kelaese ɛdoavolɛma ɛnrɛyɛ kpalɛ ɛlɛ la.—Yek. 6:2; Aye. 54:17.
Pɔɔlo hɛlɛle Keleseɛnema mɔɔ wɔ Felepae la kɛ: “Meyɛ Nyamenle mo kɛ . . . bɛboa me wɔ Edwɛkpa ne anwo gyimalilɛ nu” la. (Fel. 1:3-5) Yɛdayɛ Neazo Eku ne anu amra noko yɛte nganeɛ ko ne ala yɛmaa bɛ. Wɔ 2007 ɛzonlenlɛ ɛvolɛ ne anu, nolobɔlɛma 6,691,790 vale dɔnehwele 1,431,761,554 hanle edwɛkpa ne wɔ maanle 236 anu wɔ ewiade amuala. Nea moalɛ kpole mɔɔ bɛlɛyɛ bɛava bɛadɛlɛ edwɛkpa ne anu a! Nea menli apenle apenle dɔɔnwo mɔɔ bɛnyia nvasoɛ bɛvi mɔdenle mɔɔ yɛbɔ yɛva yɛye Gyihova ayɛlɛ la azo a!
Wɔ mekɛ bie anu, Pɔɔlo hilele kɛ ɔdwenle ɔ mediema ne mɔ anwo kpalɛ. Ɔhɛlɛle bɛdabɛ mɔɔ bɛwɔ Tɛsalonaeka la kɛ: “Saa yɛkɔ yɛ Nyamenle ne nee yɛ Ze ne anyunlu a, yɛkakye kɛ . . . bɛ anyelazo mɔɔ wɔ yɛ Awulae Gyisɛse Kelaese anu la si gyi kpundii la.” (1 Tɛs. 1:2, 3) Ɔle zɔ, ngyegyelɛ dɔɔnwo wɔ ɛbɛlabɔlɛ nu. Ngyegyelɛ ba na ɔhyia kɛ yɛkɔ zo yɛgyinla ɔ nloa. Ngyegyelɛ boni mɔ a ɛgyi nwolɛ a? Ɛlɛdi nyane ɔluakɛ anwodolɛ mɔɔ anu yɛ se la ɛmmaa ɛngola dɔɔnwo yɛ wɔ Gyihova ɛzonlenlɛ nu ɔ? Wɔ bokavolɛ mɔɔ ɛ nye ɛlie ɔ nwo wɔ mekɛ dɔɔnwo anu la ɛwu ɔ? (Mrɛ. 30:15, 16) Ɛlɛkpondɛ agyalɛ nu bokavolɛ mɔɔ lɛ Gyihova anwo ɛlɔlɛ kɛ ɛdawɔ na ɔlua kɛ ɛlɛdi Ngɛlɛlera ne anu folɛdulɛ ne mɔɔ se yɛgya wɔ Awulae anu azo la ati ɛnnyia bie ɔ? (1 Kɔl. 7:39) Ɛlɛbɔ mɔdenle wɔatete ɛ mra, ɔnva nwo kɛ ɛnlɛ ezukoa la ɔ? Kɛzi wɔ gyinlabelɛ ne de ye biala la, ɛbahola wɔava Belemgbunlililɛ ne wɔalumua, bɛbahola bɛalie bɛali kɛ Gyihova ‘arɛle ɛnrɛvi gyima mɔɔ bɛyɛle nee ɛhulolɛ mɔɔ bɛhilele wɔ ye duma nwo la.’—Hib. 6:10; Gal. 6:9.
Duzu a baboa wɔ yeamaa wɔahɔ zo wɔagyinla a? “Anyelazo mɔɔ wɔ yɛ Awulae Gyisɛse anu la” ɔ, kɛ mɔɔ ɛnee ɔde wɔ Tɛsalonaekama afoa nu la. Adwenle kpalɛ bie ati, nzinlii Pɔɔlo vale ngoane “ɛnyianlɛ nwo anyelazo” dole bulalɛ kyɛlɛ mɔɔ bahɔ zo abɔ Keleseɛnenli nwo bane avi adwenle ɛtane nee debie mɔɔ maa adwenle nu yɛ kesee la anwo.—1 Tɛs. 5:8.
Nɔhalɛ nu, saa bɛfa anyelielɛ bɛgyinla ngyegyelɛ nloa a, ɛnee bɛlɛmaa bɛanyia bie bɛabua Seetan aholoba mɔɔ ɔbɔle wɔ maanzaleɛ tumililɛ edwɛkɛ ne anu la anwo. Seetan kile kɛ, Nyamenle azonvolɛ le angomedi, na mekɛ mɔɔ bɛlɛ ɛhulolɛ kɛ bɛkɛzonle ye wɔ mekɛ ekyi bie anu la, saa bɛnwu kɛ sɔnea dɔɔnwo ɛlɛba anzɛɛ ewiade ɛtane ɛhye ɛhyɛ somaa a, bɛbado bɛ ɛzonlenlɛ ne anu. Bɛlɛ nwolɛ adenle kɛnlɛma bɛkpa Abɔnsam anwo ɛdanlɛ kɛ ɔle adalɛ nabalaba! Alehyenlɛ biala maa bɛbikye nyilalɛ mɔɔ bɛ nye la kɛ bɛbanyia la.
Kɛ mɔɔ Pɔɔlo luale adenle biala azo hanvole mediema wɔ diedi kpole mɔɔ ɛnee bɛlɛ, bɛ ahonle nu mɔɔ bɛfi bɛboa daselɛlilɛ gyima ne, nee ngyegyelɛ nloa mɔɔ bɛgyinla anwo la, ɔyɛ fɛ kɛ yɛbalua adenle ɛhye azo yɛahanvo bɛ, na yɛamaa bɛanwu ɛlɔlɛ mɔɔ yɛlɛ yɛmaa bɛ la. Bɛdoa bɛ gyima kpalɛ ne azo!
Ɔrɛla ye kɛ sunsum nu nyilalɛ dɔɔnwo bara wɔ ɛvolɛ ne mɔɔ ɛlɛba la anu. Yɛbiza bɛ
Bɛ mediema,
Gyihova Alasevolɛ Neazo Ɛku