Kɛzi Asafo Buluku Debiezukoalɛ Ngyehyɛleɛ ne Boa Yɛ La
1 Asolo kɛzi bɛyɛ debiezukoalɛ nnu mɔɔ yɛlɛ ye dapɛne ne anu la biala, nee ye atiakunlukpɔkɛ. Noko, biala anwo hyia na ɔboa ɔmaa “yɛdwenle yɛkpondɛ adenle mɔɔ yɛdua zolɛ a yɛkɛhulo yɛ nwo ngoko ngoko, na yɛkɛyɛ gyima kpalɛ la.” (Hib. 10:24, 25) Ninyɛne titile nee nvasoɛ boni mɔ a wɔ Asafo Buluku Debiezukoalɛ ngyehyɛleɛ ne azo a?
2 Boa Maa Yɛnyi Sunsum Nu: Fane dɔɔnwo ne ala menli mɔɔ kɔ buluku debiezukoalɛ ne la anzo kɛ menli mɔɔ kɔ asafo ayia mɔɔ ɛha la. Ɛhye ati ɔnyɛ se kɛ yɛkɛnyia agɔnwolɛma mɔɔ boa maa yɛnyi sunsum nu la wɔ ɛkɛ. (Mrɛ. 18:24) Asoo ɛbɔ mɔdenle kɛ ɛkɛnwu bɛdabɛ mɔɔ bɛwɔ wɔ buluku debiezukoalɛ ekpunli ne anu la kpalɛ, bɔbɔ ɛyɛ ngyehyɛleɛ ɛ nee bɛ nuhua ko biala kɔ daselɛlilɛ ɔ? Buluku debiezukoalɛ ngyehyɛleɛ ne eza boa buluku debiezukoalɛ zo neavolɛ ne maa ɔnwu awie biala mɔɔ wɔ ekpunli ne anu la ngyegyelɛ, na ɔboa ye.—Mrɛ. 27:23.
3 Asoo wɔdo ɛsalɛ wɔvɛlɛ wɔ Baebolo ɛzukoalɛma kɛ bɛrɛla buluku debiezukoalɛ? Ɔnyɛ se ɔmaa anyelielɛma mɔɔ se nyiane kɛ bɛkɛhɔ yɛ ayia mgbole ne mɔ abo la kɛ bɛkɛhɔ ayia ekyi bie abo, titile ne saa bɛyɛ ye wɔ awuke bie anu a. Ekpunli ne ze bɛ nwo kpalɛ yemɔti ngakula nee anyelielɛma kola maa mualɛ. Kɛmɔ ekpunli ne le ekyi la ati, ɔmaa yɛnyia adenle yɛmaa mualɛ dɔɔnwo yɛfa yɛye Gyihova ayɛlɛ.—Edw. 111:1.
4 Bɛta bɛyɛ buluku debiezukoalɛ ne mɔ wɔ azɛlɛsinli ne anu ɛleka mɔɔ bikye nolobɔlɛma la. Ɔwɔ nuhua kɛ bɛnrɛhola bɛnrɛva yɛ muala bɛnrɛhɔ ɛleka mɔɔ bikye yɛ la, noko yɛnrɛpɛ adenle tendenle dɔɔnwo na yɛahɔ kɛmɔ yɛyɛ wɔ mekɛ mɔɔ yɛlɛkɔ asafo ayia gyɛne mɔɔ ɛha la. Ɛleka mɔɔ yɛyia yɛyɛ buluku debiezukoalɛ la bahola ayɛ ɛleka mɔɔ fɛta mɔɔ yɛyia yɛkɔ daselɛlilɛ a.
5 Boa Maa Yɛyɛ Ɛzonlenlɛ Gyima Ne: Buluku debiezukoalɛ zo neavolɛ ne anye die kɛ ɔbaboa awie ko biala yeamaa yeava ɔ nwo yeawula daselɛlilɛ nu dahuu, yeayɛ ye kpalɛ na ɔ nye alie ye ɛyɛlɛ nwo. Ɛhye ati, ɔbɔ mɔdenle kɛ ɔ nee sonla ko biala mɔɔ wɔ ekpunli ne anu la balua daselɛlilɛ nu na yeaboa ye wɔ edwɛkɛhanlɛ gyima ne afoa ngakyile ne mɔ anu. Saa edwɛkɛhanlɛ gyima ne afoa bie mɔɔ le kɛ siakɔkpɔla ɛyɛlɛ, yɛ se maa wɔ a, maa wɔ buluku debiezukoalɛ zo neavolɛ ne anzo ɛde. Ɔbahola yeayɛ ngyehyɛleɛ yeamaa nolobɔlɛnli mɔɔ bɔ mɔdenle wɔ daselɛlilɛ nu wɔ ekpunli ne anu la aboa wɔ. Ɛbanyia anyuhɔlɛ wɔ Baebolo ɛzukoalɛ ɛyɛlɛ nu saa ɛnea na ɛsukoa ndenle kpalɛ mɔɔ wɔ buluku debiezukoalɛ zo neavolɛ ne dua zo kilehile wɔ buluku debiezukoalɛ ne abo a.—1 Kɔl. 4:17.
6 Asafo Buluku Debiezukoalɛ ne le nziezielɛ mɔɔ ɛlɔlɛ wɔ nu. Nziezielɛ ɛhye vi Gyihova na ɔboa ɔmaa yɛgyinla kpundii wɔ sunsum nu wɔ ngyegyelɛ mekɛ ɛhye mɔ yɛde nu la anu.—Edw. 26:12.
[Debiezukoalɛ kpuyia ne mɔ]
1. Kɛ debiezukoalɛ nnu mɔɔ yɛlɛ ye dapɛne biala la si boa yɛ ɛ?
2. Duzu nvasoɛ a menli ekyi mɔɔ yia buluku debiezukoalɛ ne abo la maa yɛnyia a?
3. Adenle boni azo a buluku debiezukoalɛ ngyehyɛleɛ ne wula anwosesebɛ maa yɛmaa mualɛ na ɔboa ɔmaa Baebolo ɛzukoalɛma ba debiezukoalɛ ɛ?
4. Ndenle boni azo a buluku debiezukoalɛ ngyehyɛleɛ ne di boa yɛ a?
5. Adenle boni azo a buluku debiezukoalɛ zo neavolɛ ne bahola aboa yɛ wɔ edwɛkɛhanlɛ gyima ne anu a?
6. Duzu ati a ɔwɔ kɛ yɛbɔ mɔdenle kɛ yɛbanyia buluku debiezukoalɛ ngyehyɛleɛ ne anu nvasoɛ kpalɛ a?