Mɔɔ Ɔti Yɛsia Yɛkɔ Fane Dɔɔnwo
1 Wɔ ɛleka dɔɔnwo, yɛta yɛwie yɛ azɛlɛsinli ne anu gyima yɛ fane dɔɔnwo. Bie a ɛnee suamenle bie ɛha ɛhile yɛ kɛ ɔ nye ɛnlie nwolɛ, noko yɛsia yɛkɔ awuke ne anu bieko. Duzu ati a yɛsia yɛkɔkpɔla menli mɔɔ ɛngile edwɛkɛ ne anwo anyelielɛ la ɛ?
2 Gyihova nee Menli nwo Ɛlɔlɛ: Debie titile mɔɔ maa yɛkɔ zo yɛka edwɛkɛ ne la a le ɛlɔlɛ mɔɔ yɛlɛ yɛmaa Gyihova la. Yɛ ahonle ka yɛ maa yɛkɔ zo yɛka yɛ Nyamenle bedevinli ne anwo edwɛkɛ yɛkile awie mɔ. (Luk. 6:45) Ɛlɔlɛ mɔɔ yɛlɛ yɛmaa Gyihova la ka yɛ maa yɛdi ye mɛla zo na yɛboa yɛmaa menli gyɛne yɛ zɔ. (Mrɛ. 27:11; 1 Dw. 5:3) Tɛ mɔɔ menli yɛ ye edwɛkɛ ne anwo la a maa yɛkɔ zo yɛfa nɔhalɛlilɛ yɛyɛ gyima ɛhye a. Mekɛ mɔɔ bɛyɛle ɛvoya mɔɔ lumua la anu Keleseɛnema ne kpɔdekpɔde bɔbɔ la, bɛhɔle zo bɛbɔle edwɛkpa ne nolo “dahuu.” (Gyi. 5:42) Saa menli andie edwɛkɛ ne a yɛmmaa yɛ sa nu ɛndo, emomu, yɛkɔ zo yɛgyinla kpundii yɛdi nɔhalɛ yɛkile kɛ yɛkulo Gyihova.
3 Eza yɛkɔ zo yɛka edwɛkɛ ne ɔluakɛ yɛkulo yɛ gɔnwo mɔ. (Luk. 10:27) Gyihova ɛngulo kɛ ɔsɛkye awie biala. (2 Pit. 3:9) Wɔ azɛlɛsinli mɔɔ yɛta yɛyɛ nu gyima bɔbɔ la anu, yɛtɛyia menli mɔɔ kulo kɛ sonle Gyihova la. Kɛ neazo la, wɔ Guadeloupe mɔɔ ɛye menli 56 biala a nuhua 1 le Gyihova Dasevolɛ la, bɛzɔnenle menli 214 ɛkenle ɛvolɛ ne. Menli kɛyɛ 20,000 hɔle Ngakyelɛlilɛ ne, asɛɛ menli 22 biala mɔɔ wɔ Guadeloupe la anu 1!
4 Azɛlɛsinli ne Kakyi: Menli ngakyile ba yɛ azɛlɛsinli ne anu dahuu. Saa yɛsia yɛkɔ awuke bie mɔɔ bɛandie yɛ kpalɛ la anu a, bie a busuanli fofolɛ—awie mɔɔ bie a ɛtɛtele edwɛkɛ ne ɛlɛ la—balie yɛ na yeadie. Anzɛɛ yɛbayia awie fofolɛ mɔɔ ɛradɛnla ɛkɛ ne mɔɔ anye die nwolɛ a. Ngakula mɔɔ bɛ awovolɛ dwazo tia bɛ la nyi na bɛfi sua nu. Bie a menli zɛhae mɔ bahulo kɛ bɛkɛdie Belemgbunlililɛ edwɛkɛ ne.
5 Menli noko kakyi. Ɛzoanvolɛ Pɔɔlo ‘hanle munzule edwɛkɛ, ɔdendɛle ɔtiale menli, ɔyɛle bɛ kpɔdekpɔde.’ (1 Tem. 1:13) Zɔhane ala a menli dɔɔnwo mɔɔ ɛnɛ ɛlɛsonle Gyihova la ɛnee de a, ɛnee bɛ nye ɛnlie nɔhalɛ ne anwo. Bie mɔ bɔbɔ dwazole tiale edwɛkpa ne mekɛ bie. Ewiade ne tɛnlabelɛ mɔɔ ɛlɛkakyi la maa dwazotiama anzɛɛ menli mɔɔ ɛndie edwɛkɛ ne la bie mɔ tie. Saa esiane mɔɔ le kɛ busuanli bie ewule, gyima mɔɔ sɛkye, ezukoa afoa nu anwongyelelɛ, anzɛɛ anwodolɛ to bie mɔ noko a ɔkola ɔmaa bɛtie.
6 Ewiade ɛhye ɛlɛkɔ ye awieleɛ, noko yɛ edwɛkɛhanlɛ nee ngilehilelɛ gyima ne ɛlɛnyia anyuhɔlɛ ndɛndɛ. (Aye. 60:22) Ɛhye ati, yɛkɔ zo yɛfa anyelielɛ yɛka edwɛkɛ ne na yɛbɔ mɔdenle yɛnyia adwenle kpalɛ. Bie a awie fofolɛ mɔɔ yɛbayia ye la badie. Ɔwɔ kɛ yɛkɔ zo yɛka! ‘Saa yɛyɛ ye zɔhane a yɛkɛlie yɛ nwo nee bɛdabɛ mɔɔ bɛkɛdie yɛ la.’—1 Tem. 4:16.
[Debiezukoalɛ kpuyia ne mɔ]
1. Yɛ edwɛkɛhanlɛ gyima ne anwo kpuyia boni a yɛbahola yɛabiza a?
2. Duzu titile a maa yɛkɔ zo yɛka edwɛkɛ ne a?
3. Kɛzi menli nwo ɛlɔlɛ ka yɛ maa yɛkɔ zo yɛka edwɛkɛ ne ɛ?
4. Ndenle boni azo a azɛlɛsinli ne mɔ kakyi a?
5. Duzu a kola maa menli tie edwɛkɛ ne a?
6. Duzu ati a ɔwɔ kɛ yɛfa anyelielɛ yɛkɔ zo yɛka edwɛkɛ ne a?