Kpuyia Ɛleka
◼ Esiane boni mɔ a wɔ Intanɛte mɔɔ yɛdua zo yɛ nee awie mɔɔ yɛnze ye di ngitanwo la anu a?
Bɛyɛ Intanɛte zo gyimalilɛ ɛleka dɔɔnwo mɔɔ maa menli kola nee bɛ nwo yia na bɛdi ngitanwo a. Gyimalilɛ ɛleka ɛhye mɔ anu dɔɔnwo maa menli kola ka bɛ nwo edwɛkɛ mɔɔ bɛ nvoninli boka nwo la wɔ ɛkɛ. Menli mɔɔ kɛnwu edwɛkɛ ɛhye mɔ la akee kola kpo menli ne abo zo. Ngakula dɔɔnwo ta kɔ Gyimalilɛ ɛleka ɛhye mɔ, na asafo ne anu mbɛlɛra nee mgbavolɛ bie mɔ ɛlua zo bɛ nee awie mɔ ɛli adwelie anzɛɛ bɛkpondɛ agyalɛ bokavolɛma mɔɔ kile kɛ bɛle Gyihova Alasevolɛ la.
Ɔnyɛ se ɔmmaa awie mɔɔ yɛ nee ye kɛyia Intanɛte ne azo la kɛ, ɔkɛva kɛzi ɔde, ye sunsum nu gyinlabelɛ, anzɛɛ ye adwenle ɔkɛbɛlɛbɛla yɛ. (Edw. 26:4) Awie mɔɔ kɛha kɛ ɔle Gyihova Dasevolɛ la bahola ayɛ awie mɔɔ ɔnle diedinli, awie mɔɔ bɛdu ye, anzɛɛ awie mɔɔ ɛkpɔkye ɛvi nɔhalɛ ne anwo na ɔkpondɛ awie yeahwe ye la. (Gal. 2:4) Amaneɛbɔlɛ kile kɛ menli dɔɔnwo mɔɔ sɛkye ngakula la dua gyimalilɛ ɛleka ɛhye azo nyia bɛ.
Saa yɛdie yɛdi kɛ menli mɔɔ yɛ nee bɛ ɛlɛdi ngitanwo la lɛ gyinlabelɛ kpalɛ wɔ asafo ne anu bɔbɔ a, ɔnyɛ se kɛ adwelie wɔ ɛleka zɛhae kola yɛ mɔɔ ɔnfɛta a. Ɛhye le zɔ, ɔluakɛ saa awie nee sonla mɔɔ ɔnnwu ye la ɛlɛtendɛ a, ɔnze nyiane. Eza bɛkola bɛbu adenle ɛhye mɔɔ bɛdua zo bɛdi ngitanwo la kɛ ɔle fealera nu debie, na bɛte nganeɛ kɛ edwɛkɛ biala mɔɔ bɛkɛha la bɛ awovolɛ anzɛɛ asafo nu mgbanyima ɛnrɛde. Ɔyɛ alɔbɔlɛ kɛ, gyimalilɛ ɛhye ɛmaa mgbavolɛ dɔɔnwo mɔɔ wɔ Keleseɛnema awuke nu la ɛdɔ esiane nu, na yemaa bɛva bɛ nwo bɛwula ɛdendɛlɛ ɛtane nu. (Ɛfɛ. 5:3, 4; Kɔlɔ. 3:8) Bie mɔ ɛva bɛ nwo nvoninli mɔɔ twehwe adwenle kɔ nla zo, mgbayelɛ mgbane mgbane anzɛɛ ɛleka mɔɔ maa awie kɔfinde video nu edwɛne mɔɔ ka nla nwo edwɛkɛ wienyi la ɛboka ɛleka mɔɔ bɛ nwo edwɛkɛ wɔ wɔ kɔmputa zo la anwo.
Ɔlua edwɛkɛ ɛhye mɔɔ yɛha la ati, ɔwɔ kɛ awovolɛ nea gyimalilɛ mɔɔ bɛ mra di wɔ kɔmputa zo la boɛ. (Mrɛ. 29:15) Ɔkɛyɛ esiane kɛ, yɛkɛdo ɛsalɛ yɛkɛvɛlɛ ɛyɛvolɛ, na yɛkɛgyakyi yɛ mra ne mɔ yɛkɛmaa ɔ ngomekye. Zɔhane ala a ɔle esiane ɔmaa yɛ anzɛɛ yɛ mra kɛ bɛ nee menli mɔ kile kɛ bɛle Gyihova Alasevolɛ la kɛva agɔnwolɛ wɔ Intanɛte zo a.—Mrɛ. 22:3.