Mmamaa “Ewiade Ɛhye Anu Nrɛlɛbɛ” Yɛ Wɔ Koasea

1. Kɛzi Nyamenle Edwɛkɛ ne boa yɛ ɛ?

KƐ MƆƆ Gyihova a le yɛ Kilehilevolɛ Kpole la ati, yɛbahola yɛagyinla ngyegyelɛ biala anloa. (Aye. 30:20, 21) Ye Edwɛkɛ ne maa yɛnyia debie biala mɔɔ yɛhyia la amaa ‘yɛafɛta bɔkɔɔ, mɔɔ bɛziezie yɛ bɛmaa gyima kpalɛ biala a.’ (2 Tim. 3:17) Saa yɛfa mɔɔ Baebolo ne kilehile la yɛyɛ gyima a, ɔmaa yɛnwu nrɛlɛbɛ yɛtɛla menli mɔɔ fa “ewiade ɛhye anu nrɛlɛbɛ” bɔ bɛ ɛbɛla la.​—1 Kɔl. 3:19; Edw. 119:97-100.

2. Duzu a yɛbazuzu nwo wɔ edwɛkɛ ɛhye anu a?

² Kɛ mɔɔ yɛbanwu ye la, ewiade nrɛlɛbɛ maa sonla di ye nwonane nu atiakunluwɔzo nzi. Yemɔti ɔnla aze kɛ yɛbakpo ewiade adwenle nee subane mɔɔ menli mɔɔ wɔ nu da ye ali la. Ndelebɛbo kpalɛ bie ati, Baebolo ne ka kɛ: “Bɛnlea boɛ na awie anva ewiade nrɛlɛbɛ nee mɛlɛbɛla mɔɔ gyi sonla amaamuo . . . zo la anyɛ bɛ ngɛkɛlɛ.” (Kɔl. 2:8) Wɔ edwɛkɛ ɛhye anu, yɛbanwu kɛzi ewiade nrɛlɛbɛ anzɛɛ adalɛ edwɛkɛ nwiɔ bie ɛlie duma la. Wɔ ko biala anu, yɛbanwu deɛmɔti ewiade nrɛlɛbɛ le ngoaseasɛm yɛɛ kɛzi Nyamenle Edwɛkɛ ne anu nrɛlɛbɛ sonle bolɛ tɛla debie biala mɔɔ ewiade ne kanvo kile la.

EWIADE NE ADWENLE WƆ NLA NWO ƐHAKYI

3-4. Wɔ ɛvoya 20 ne anu wɔ United States, kɛzi adwenle mɔɔ menli lɛ wɔ nla nwo la hakyile ɛ?

³ Wɔ ɛvoya 20 ne anu wɔ United States, nzenzaleɛ kpole rale wɔ adwenle mɔɔ menli lɛ ye wɔ nla nwo la anu. Mɔlebɛbo ne, ɛnee menli die to nu kɛ menli mɔɔ ɛgya la ala a lɛ adenle nyia nla nu ngitanwolilɛ a, na ɛnee bɛnga nla nwo edwɛkɛ bɔbɔ wɔ bagua nu. Noko adwenle ɛhye minlinle na adwenle mɔɔ ɛndenrɛ la liele duma.

⁴ Bɛhanle ɛvolɛ 1920 badwu 1929 anwo edwɛkɛ kɛ, ewiade kpudwule ɔluakɛ, adwenle mɔɔ menli lɛ ye wɔ anyelielɛ ninyɛne yɛɛ ezukoa nwo la hakyile bɔkɔɔ. Abɔlɔba ko hanle kɛ: “Bɛlale nla nwo adwenle ali wɔ nvoninli mɔɔ bɛkeha bɛ nwo, nwɔhoalilɛ, edwɛne, vidio nee nolobɔlɛ ninyɛne nu. Wɔ ɛvolɛ zɔhane mɔ anu, ɛnee menli agolezilɛ maa bɛnyia nla nwo nganeɛdelɛ yɛɛ ɛnee nyianezelɛ ɛnle bɛ anwoziezielɛ nu. Baebolo ne hanle mekɛ mɔɔ li awieleɛ la anwo edwɛkɛ kɛ, ‘menli bahulo anyelielɛ’ kpalɛ.​—2 Tim. 3:4.

5. Ɔvi 1960 too mɔɔ ba la, kɛzi ewiade ne adwenle wɔ nla nwo ɛhakyi ɛ?

⁵ Wɔ ɛvolɛ 1960 ne anu, ninyɛne le kɛ menli nwiɔ mɔɔ bɛtɛgyale mɔɔ bɛtɛnla, mrenyia mɔɔ bɛfa bɛ nwo yɛɛ ewolebɔlɛ mɔɔ ɛngyi kpɔkɛ zo la liele duma. Anyelielɛ ninyɛne dɔɔnwo yele nla nwo nvoninli hilele. Duzu a ɛvi ɛhye mɔ amuala anu ɛra a? Abɔlɔba ko hɛlɛle kɛ, ngyegyelɛ le kɛ, abusua nu ɛtetelɛ mɔɔ ɛbu zo, awovolɛ ko abusua, adwenleadwenle, nla nwo nvoninli ɛnleanlɛ mɔɔ ka bɛ nwo nee mɔɔ bokɛboka nwo la amuala vi “adwenle mɔɔ menli lɛ ye wɔ nla nwo mɔɔ ɛhakyi la.” Nla nu ewule le kɛ AIDS mɔɔ ɛbu zo la le neazo ko mɔɔ maa yɛnwu kɛ, ewiade nrɛlɛbɛ le ngoaseasɛm amgba.​—2 Pita 2:19.

6. Kɛzi adwenle mɔɔ ewiade ne lɛ wɔ nla nwo la di Seetan bodane nwo gyima ɛ?

⁶ Kɛ Seetan kulo kɛ ewiade ne bu nla la ɛne. Saa ɔnwu kɛ menli ɛlɛfa ahyɛlɛdeɛ mɔɔ Nyamenle ɛva ɛmaa agyalɛma la ali gyima wɔ adenle ɛtane zo a, ɔ nye die kpole! (Ɛfɛ. 2:2) Nla nu ɛbɛlatane gua ahyɛlɛdeɛ mɔɔ Gyihova ɛva ɛmaa kɛ bɛlua zo bɛwo la anwo evinli, eza menli mɔɔ fa bɛ nwo wula nu la ɛnrɛnyia dahuu ngoane.​—1 Kɔl. 6:9, 10.

MƆƆ BAEBOLO NE KA YE WƆ NLA NWO LA

7-8. Nla nwo adwenle kpalɛ mɔɔ enililɛ wɔ nu la boni a wɔ Baebolo ne anu a?

⁷ Menli mɔɔ lɛ ewiade nrɛlɛbɛ la tendɛ tia ɛbɛlabɔlɛ nwo ngyinlazo mɔɔ wɔ Baebolo ne anu la, na bɛka kɛ, nvasoɛ ɛnle zo. Bie a menli zɛhae mɔ babiza kɛ, ‘Duzu ati a Nyamenle bava nla nu nganeɛdelɛ awula sonla nu na akee yeaha kɛ ɔhomo ɔ nwo zo ɛ?’ Kpuya zɔhane gyi adwenle mɔɔ menli lɛ kɛ, ɔwɔ kɛ sonla biala di ye nganeɛdelɛ nzi la azo. Noko Baebolo ne ɛnga ye zɔ. Ɔkilehile kɛ, yɛbahola yɛahomo nganeɛdelɛ ɛtane zo. (Kɔl. 3:5) Bieko, Gyihova ɛyɛ agyalɛ ngyehyɛleɛ mɔɔ nuhua ala a nrenyia nee raalɛ bahola anyia nla nu ngitanwolilɛ mɔɔ enililɛ wɔ nu na bɛ nye alie a. (1 Kɔl. 7:8, 9) Menli mɔɔ bɔ nla nu ɛbɛlatane la sulo ɔ nzi, noko wɔ ngyehyɛleɛ ɛhye anu, kunli nee yelɛ bahola ava adwenle mɔɔ anu la ɛkɛ la anyia nla nu ngitanwolilɛ mɔɔ bɛnzulo a.

⁸ Mɔɔ nee ewiade adwenle ne le ngakyile la, Baebolo ne maa yɛnyia nla nwo adwenle mɔɔ tenrɛ. Ɔmaa yɛnwu kɛ nla nu ngitanwolilɛ kola fa anyelielɛ ba. (Mrɛ. 5:18, 19) Noko Baebolo ne ka kɛ: “Ɔwɔ kɛ bɛ nuhua ko biala nwu kɛzi ɔbahomo ɔdaye ye sonlabaka ne azo wɔ anwodelɛ nee enililɛ nu la, tɛ wɔ nla nwo atiakunluwɔzo ɛtane nu kɛ mɔɔ maanle maanle ne mɔ mɔɔ bɛnze Nyamenle yɛ ye la.”​—1 Tɛs. 4:4, 5.

9. (a) Kɛzi bɛmaanle Gyihova menli anwosesebɛ wɔ ɛvoya 20 ne mɔlebɛbo kɛ bɛva nrɛlɛbɛ mɔɔ wɔ Nyamenle Edwɛkɛ ne anu la bɛbɔ bɛ ɛbɛla ɛ? (b) Folɛdulɛ kpalɛ boni a wɔ 1 Dwɔn 2:15, 16 a? (d) Kɛ mɔɔ bɛha ye wɔ Wulomuma 1:24-27 la, nla nu ɛbɛlatane boni mɔ a ɔwɔ kɛ yɛkpo a?

⁹ Wɔ ɛvoya 20 ne mɔlebɛbo, Gyihova menli anva bɛ nwo anwula evinli ɛbɛla biala mɔɔ menli mɔɔ “nyiane ɛnle bɛ nye zo” bɔle la anu. (Ɛfɛ. 4:19) Bɛbɔle mɔdenle kɛ bɛbava Gyihova ngyinlazo bɛayɛ gyima kpalɛ. May 15, 1926, Watch Tower ne hanle kɛ, ɔwɔ kɛ “nrenyia anzɛɛ raalɛ biala maa ɔ nwo te bɔkɔɔ wɔ adwenle nee nyɛleɛ nu, titili saa ɔba ye wɔ ɔ nee awie mɔɔ asolo ye awodeɛ la afoa nu a.” Ɔnva nwo mɔɔ ɛnee ɛlɛkɔ zo wɔ bɛ mekɛ zo la, Gyihova menli vale nrɛlɛbɛ mɔɔ wɔ Nyamenle Edwɛkɛ ne anu la bɔle bɛ ɛbɛla. (Kenga 1 Dwɔn 2:15, 16.) Yɛ nye die Nyamenle Edwɛkɛ ne anwo kpole! Eza ɔyɛ yɛ fɛ kɛ Gyihova fa sunsum nu aleɛ mɔɔ le ye mekɛ nu ɛdeɛ la maa yɛ amaa yɛahola yɛakpo adwenle mɔɔ ewiade ne lɛ ye wɔ nla nwo la.b​—Kenga Wulomuma 1:24-27.

AKEE MENLI KULO BƐ NWO SOMAA

10-11. Duzu a Baebolo ne bɔle kɔkɔ kɛ ɔbazi wɔ mekɛ mɔɔ li awieleɛ la anu a?

¹⁰ Baebolo ne bɔle kɔkɔ kɛ, wɔ mekɛ mɔɔ li awieleɛ la anu, “menli bayɛ angomedi.” (2 Tim. 3:1, 2) Ɔnyɛ azibɛnwo kɛ ewiade ne si angomedi subane adua la. Neɛnleanu buluku ko hanle kɛ wɔ ɛvolɛ 1970 ne anu, “bɛyɛle mbuluku mɔɔ ka kɛzi awie banyia ɔ nwo anwo edwɛkɛ dɔɔnwo.” Mbuluku bie mɔ “maanle kengavolɛma anwosesebɛ kɛ, ɔwɔ kɛ bɛ nye die kɛzi bɛde la anwo, ɔnle kɛ bɛmaa awie kakyi bɛ.” Kɛ neazo la, suzu edwɛkɛ mɔɔ mbuluku zɛhae mɔ ko hanle la anwo: “Ɛ nwo yɛ fɛ yɛɛ ɛ nwo hyia tɛla awie biala mɔɔ wɔ ewiade la, kulo ɛ nwo.” Buluku ne ka kɛ, ɔwɔ kɛ awie si mɔɔ ɔbayɛ la anwo kpɔkɛ na ɔyɛ mɔɔ ɔsuzu kɛ ɔle kpalɛ na ɔbamaa ɔ nwo adɔ ye la.

¹¹ Wɔnwu adwenle ɛhye bie wɔ ɛleka mɔɔ ɛwɔ la ɔ? Seetan maanle Yive anwosesebɛ kɛ ɔyɛ ɛhye bie. Ɔhanle kɛ Yive ‘bayɛ kɛ Nyamenle la, na yeanwu mɔɔ le kpalɛ nee mɔɔ le ɛtane la.’ (Mɔl. 3:5) Ɛnɛ menli dɔɔnwo dwenle bɛ nwo somaa, na bɛka kɛ, awie biala, bɔbɔ Nyamenle ɛnrɛhola ɛnrɛhile bɛ mɔɔ le kpalɛ nee mɔɔ le ɛtane la. Zɔhane adwenle ne ɛla ali wienyi wɔ kɛzi menli bu agyalɛ la anu.

12. Adwenle boni a ewiade ne lɛ ye wɔ agyalɛ nwo a?

¹² Baebolo ne ka kile kunli nee yelɛ kɛ, bɛli bɛ nwo eni na bɛbu bɛ agyalɛ ndane ne. Ɔmaa agyalɛma anwosesebɛ kɛ bɛnyia ɛhulolɛ kpole kɛ bɛbali nɔhalɛ bɛamaa bɛ nwo, ɔhanle kɛ: “Nrenyia fi ɔ ze nee ɔ nli anwo na ɔfa ɔ nwo ɔbɔ ɔ ye anwo kyengye, na bɛ mu nwiɔ bɛbɔ nu bɛyɛ nwonane ko.” (Mɔl. 2:24) Noko menli mɔɔ fa ewiade nrɛlɛbɛ yɛ gyima la si adwenle gyɛne adua na bɛka kɛ, ɔwɔ kɛ agyalɛ ne anu sonla ko biala dwenle ɔ ngomekye ɔ nwo. Ewolebɔlɛ nwo buluku bie hanle kɛ, “wɔ atɔfolɛlielɛ bie mɔ abo, bɛvale ndane, ‘mekɛ tendenle ala mɔɔ yɛbahulo yɛ nwo,’ la bɛziele agyalɛ ndane mɔɔ se ‘mekɛ tendenle ala mɔɔ yɛ mu nwiɔ yɛbadɛnla aze’ la agyakɛ anu.” Ɛbulɛ mɔɔ menli ɛnlɛ ɛmmaa agyalɛ la ɛmaa agyalɛ dɔɔnwo ɛzɛkye yɛɛ yeva nyanelilɛ dɔɔnwo yera. Nɔhalɛ nu, ewiade ne adwenle wɔ agyalɛ nwo le ngoaseasɛm amgba.

13. Debie ko mɔɔ ɔti Gyihova kyi mgbanyizonlema la a le boni?

¹³ Baebolo ne ka kɛ: “[Gyihova] kyi sonla mɔɔ le mgbanyizonle la.” (Mrɛ. 16:5) Duzu ati a Gyihova kyi mgbanyizonlema a? Ɔluakɛ, menli mɔɔ lɛ angomedi subane na bɛsi nwolɛ adua la ɛlɛsukoa Seetan anwomemaazo ne. Dwenle nwo nea, ɛnee Seetan kulo kɛ Gyisɛse mɔɔ Gyihova luale ɔ nwo zo bɔle ninyɛne kɔsɔɔti la, koto sonle ye! (Mat. 4:8, 9; Kɔl. 1:15, 16) Menli mɔɔ dwenle kɛ bɛ nwo hyia tɛla awie biala la da ye ali kɛ ewiade nrɛlɛbɛ ne le ngoaseasɛm wɔ Nyamenle anye zo.

MƆƆ BAEBOLO NE KA YE WƆ ANGOMEDI SUBANE NWO LA

14. Kɛzi Wulomuma 12:3 maa yɛnyia adwenle mɔɔ fɛta la wɔ yɛ nwo ɛ?

¹⁴ Baebolo ne boa yɛ maa yɛnyia adwenle mɔɔ fɛta la wɔ yɛ nwo. Ɔmaa yɛnwu kɛ, ɔwɔ kɛ yɛkulo yɛ nwo wɔ adenle mɔɔ fɛta la azo. Gyisɛse hanle kɛ: “Kulo ɛ gɔnwo kɛ ɛ nwo,” kile kɛ ɔwɔ kɛ yɛnyia ɛlɔlɛ bie yɛmaa yɛ nwo. (Mat. 19:19) Noko, Baebolo ne ɛngilehile kɛ yɛ nwo hyia tɛla awie mɔ. Emomu, ɔka kɛ: “Bɛmmafa manzonlehwenlɛ anzɛɛ anwomemaazo bɛyɛ debie biala, emomu bɛbɛlɛ bɛ nwo aze na bɛbu bɛ gɔnwo mɔ bɛdɛla bɛ nwo.”​—Fel. 2:3; kenga Wulomuma 12:3.

15. Duzu ati a ɛte nganeɛ kɛ folɛdulɛ mɔɔ Baebolo ne fa maa wɔ angomedi nwo la le kpalɛ a?

¹⁵ Ɛnɛ, menli mɔɔ bu bɛ nwo kɛ bɛze nrɛlɛbɛ la tendɛ tia folɛdulɛ mɔɔ Baebolo ne fa maa wɔ angomedi nwo la. Bɛbaha kɛ, saa ɛbɛlɛ ɛ nwo aze ɛmaa awie mɔ a, bɛbava wɔ tofodi yɛɛ bɛnrɛbu wɔ. Noko, asoo debie kpalɛ vi angomedi subane mɔɔ Seetan ewiade ne maa nwolɛ anwosesebɛ la anu ɛra? Duzu a wɔnwu ye a? Menli mɔɔ le angomedi la anye die ɔ? Bɛlɛ abusua nu anyelielɛ ɔ? Bɛlɛ agɔnwolɛma kpalɛ ɔ? Bɛ nee Nyamenle lɛ agɔnwolɛvalɛ kpalɛ ɔ? Yemɔti boni a ɛbaha a, ewiade nrɛlɛbɛ ne yɛɛ Nyamenle Edwɛkɛ ne anu nrɛlɛbɛ ne, boni a le kpalɛ a?

16-17. Nwolɛ adenle kpole boni a yɛnyia a, na duzu ati ɔ?

¹⁶ Menli mɔɔ di bɛdabɛ mɔɔ ewiade ne bu bɛ kɛ nrɛlɛbɛ wɔ bɛ folɛdulɛ nu adehilelɛ nzi la le kɛ adendulɛnli bie mɔɔ ɛlɛkpondɛ adehilelɛ avi ɔ gɔnwo adendulɛnli ɛkɛ wɔ mekɛ mɔɔ bɛ mu nwiɔ bɛminli la. Gyisɛse hanle menli mɔɔ ɛnee bɛbu bɛ nwo kɛ bɛze nrɛlɛbɛ wɔ ye mekɛ zo la anwo edwɛkɛ kɛ: “Bɛle adekilevolɛma anyenzinliravolɛma. Na saa anyezinliravolɛ kile anyezinliravolɛ adenle a, bɛ mu nwiɔ bɛgua kuma nu.” (Mat. 15:14) Amgba, ewiade nrɛlɛbɛ le ngoaseasɛm wɔ Nyamenle anye zo.

¹⁷ Ɔle nɔhalɛ bɔkɔɔ kɛ Baebolo ne anu folɛdulɛ le kpalɛ maa “ngilehilelɛ, bɛ nyunlu ɛhwilɛ, ninyɛne ɛdenrɛdenrɛlɛ, menli ɛtetelɛ wɔ tenleneyɛlɛ nu.” (2 Tim. 3:16) Yɛ nye die kpole kɛ Gyihova ɛlua ye ahyehyɛdeɛ ne azo ɛbɔ yɛ nwo bane ɛvi ewiade nrɛlɛbɛ ne anwo la! (Ɛfɛ. 4:14) Sunsum nu aleɛ mɔɔ ɔfa ɔmaa yɛ la maa yɛnyia anwosesebɛ yɛfa ngyinlazo mɔɔ wɔ ye Edwɛkɛ ne anu la yɛyɛ gyima. Ɔle nwolɛ adenle kpole kɛ yɛbamaa Baebolo nu ngyinlazo mɔɔ ɛmkpa nwo ɛlɛ la ahile yɛ adenle!