Gyihova Bu “Amen” Mɔɔ Ɛka La Kɛ Ɔsonle Bolɛ

“MENLI NE AMUALA BAHA KƐ, ‘AMEN!’”

Edwɛkɛkpɔkɛ “amen” kile “ɔyɛ ɛkɛ.” Ɔvi Hibulu edwɛkɛkpɔkɛ mɔɔ abo kile ‘ka nɔhalɛ,’ ‘maa bɛnyia wɔ nu anwodozo’ la anu. Ɛnee bɛfa bɛdi gyima wɔ kɔɔto. Saa awie ka ndane bie wie a, ɔka “amen” ɔfa ɔkile kɛ mɔɔ yeha la le nɔhalɛ na ɔdi mɔɔ bavi nu ara la anwo ɛzonle. (Ɛdi. 5:22) Saa ɔyɛ ɛhye wɔ bagua nu a, ɔmaa ɔnyia anwosesebɛ ɔdi ye edwɛkɛ zo.​—Nih. 5:13.

“Amen” mɔɔ bɛka la anwo neazo kɛnlɛma wɔ Mɛla ne tile 27. Mɔɔ Yizilayɛma dwule Ɛwɔkɛ Azɛlɛ ne azo la anzi, ɛnee ɔwɔ kɛ bɛyia wɔ Yibale Boka nee Gɛlaezem Boka avinli na bɛtie Mɛla ne. Bɛanyia kɛ bɛtie Mɛla ne ala, emomu ɛnee bɛbahile kɛ saa bɛdie bɛto nu a. Mɔɔ bɛmaanle bɛnwunle ngyegyelɛ mɔɔ saa bɛanli zo a ɔbado bɛ la, bɛliele zo kɛ “Amen!” (Mɛla 27:15-26) Dwenle mrenyia, mraalɛ yɛɛ ngakula apenle dɔɔnwo mɔɔ ɛlɛfa ɛnelɛ ko alie zo la anwo nea! (Dwɔh. 8:30-35) Bɛ rɛle anvi edwɛkɛ mɔɔ bɛhanle ye kenle ko zɔhane la ɛlɛ. Yizilayɛma zɔhane mɔ lile bɛ edwɛkɛ zo, ɔluakɛ kɛlɛtokɛ ne ka kɛ: “Mɔɔ ɛnee Dwɔhyua de aze la, Yizilayɛma zonlenle [Gyihova], ye ewule ne anzi, mɔɔ ɛnee mgbanyinli ne mɔ mɔɔ nwunle debie biala mɔɔ [Gyihova] yɛle maanle Yizilayɛma la de aze la, menli ne hɔle zolɛ zonlenle [Gyihova].”​—Dwɔh. 24:31.

Gyisɛse noko hanle “amen” vale zile nɔhalɛ mɔɔ wɔ ye edwɛkɛ ne anu la azo, noko ɔyɛle zɔ wɔ adenle titili zo. Kɛ anrɛɛ ɔbava yeabua edwɛkɛ bie la, ɔvale “amen” (mɔɔ bɛhile ɔ bo kɛ “nɔhalɛ nu”) la ɔbɔle nɔhalɛ edwɛkɛ bie abo. Ɔyɛ a, ɔsi edwɛkɛkpɔkɛ ne azo kɛ “amen amen.” (Mat. 5:18; Dwɔn 1:51) Ɔmaanle ye tievolɛma nwunle ye wienyi kɛ ye edwɛkɛ ne le nɔhalɛ bɔkɔɔ. Gyisɛse holale vale anwodozo dendɛle ɔluakɛ ɔdaye a bɛmaa ye tumi kɛ ɔmaa Nyamenle ɛwɔkɛ ne mɔ amuala ɛrɛla nu a.​—2 Kɔl. 1:20; Yek. 3:14.

“MENLI NE AMUALA LIELE ZOLƐ ‘AMEN,’ NA BƐYELE [GYIHOVA] AYƐLƐ”

Yizilayɛma noko vale “amen” lile gyima wɔ mekɛ mɔɔ bɛlɛto ayɛlɛyelɛ edwɛne bɛamaa Gyihova na bɛayɛ asɔne la. (Nih. 8:6; Edw. 41:13) Saa bɛka edwɛkɛkpɔkɛ ne wɔ asɔneyɛlɛ ne adwulaleɛ a, menli mɔɔ ɛlɛtie la fa ye kɛ asɛɛ bɛdabɛ a bɛlɛyɛ asɔne ne a. Menli mɔɔ wɔ ɛkɛ ne amuala la fa bɛ nwo wula nu, na ɛhye maa bɛ nye die ɛzonlenlɛ zɛhae anwo. Ɛhye bie zile wɔ mekɛ mɔɔ Belemgbunli Devidi vale Gyihova Ngyekyeleɛ Ɛlɛka ne rale Gyɛlusalɛm la. Wɔ mekɛ zɔhane, ɔvile ahonle nu ɔyɛle asɔne mɔɔ le kɛ edwɛndolɛ la, na bɛyɛ nwolɛ kɛlɛtokɛ wɔ 1 Edwɛkɛsisilɛ 16:8-36. Menli mɔɔ rayiale ɛkɛ ne la amuala “liele zolɛ ‘Amen,’ na bɛyele [Gyihova] ayɛlɛ” ɔluakɛ ye edwɛkɛ ne hanle bɛ ahonle. Bɛ mualɛ ne maanle bɛ nye liele kpole wɔ kenle zɔhane.

Ɛvoya mɔɔ limoa Kilisienema noko vale “amen” lile gyima wɔ mekɛ mɔɔ bɛye Gyihova ayɛlɛ la. Ɛnee Baebolo kɛlɛvolɛma ta fa di gyima wɔ bɛ ngɛlata ne mɔ anu. (Wlo. 1:25; 16:27; 1 Pita 4:11) Yekile buluku ne ka anwuma abɔdeɛ mɔɔ bɛlɛye Gyihova ayɛlɛ la anwo edwɛkɛ, bɛka kɛ: “Amen! Bɛye Gyaa ayɛlɛ!” (Yek. 19:1, 4) Ɛnee alimoa Kilisienema ka “amen” fa dwula bɛ asɔneyɛlɛ wɔ bɛ ayia ne mɔ abo. (1 Kɔl. 14:16) Noko, ɛhye ɛnle edwɛkɛkpɔkɛ mɔɔ bɛka ye fane dɔɔnwo mɔɔ bɛndwenle nwo a.

DEƐMƆTI ƆWƆ KƐ ƐKA “AMEN” LA

Kɛkala mɔɔ yɛnwu mɔɔ “amen” kile nee kɛzi bɛvale bɛlile gyima la, yɛde deɛmɔti ɔwɔ kɛ yɛka “amen” yɛdwula yɛ asɔneyɛlɛ la abo. Saa yɛfa yɛdwula yɛ asɔneyɛlɛ a, ɛnee yɛlɛkile kɛ mɔɔ yɛha la anwo hyia yɛ. Na saa yɛka “amen” wɔ yɛ ti anu wɔ mekɛ bɔbɔ mɔɔ bɛlɛyɛ asɔne wɔ bagua nu a, ɔkile kɛ yɛdie mɔɔ bɛha la yɛto nu. Suzu debie bieko mɔɔ ɔti yɛ “amen” anwo hyia la anwo.

Ɔmaa yɛtie asɔne mɔɔ bɛlɛyɛ la. Yɛsonle Gyihova wɔ asɔneyɛlɛ nu ɔlua mɔɔ yɛka nee mɔɔ yɛyɛ la azo. Ɔluakɛ yɛkulo kɛ yɛfi ahonle nu yɛka “amen” la ati, ɔmaa yɛda subane kpalɛ ali na yɛfa yɛ adwenle yɛsie asɔneyɛlɛ ne azo.

Yɛbɔ nu kɛ Nyamenle azonvolɛ. Saa bɛlɛyɛ asɔne wɔ bagua nu wɔ debiezukoalɛ bo a, ɔmaa yɛ muala yɛte edwɛkɛ ko ne ala. (Gyi. 1:14; 12:5) Saa yɛ nee yɛ mediema bɔ nu die zo a, ɔka yɛ ɔbɔ nu kpalɛ. Saa yɛka “amen” ne kpole anzɛɛ wɔ yɛ ti anu a, ɔmaa Gyihova bua yɛ asɔneyɛlɛ ne.

Ɔmaa yɛye Gyihova ayɛlɛ. Gyihova nwu ninyɛne ngyikyi mɔɔ yɛyɛ yɛsonle ye la. (Luku 21:2, 3) Ɔnwu yɛ adwenle nee mɔɔ wɔ yɛ ahonle nu la. Saa bɔbɔ yɛlɛtie mɔɔ ɛlɛkɔ zo wɔ ayia ne abo la wɔ telefun zo a, yɛbahola yɛalie yɛali kɛ Gyihova te “amen” mɔɔ yɛka la. Ɛhye amuala boka ayɛlɛyelɛ mɔɔ yɛfa yɛmaa ye la anwo.

Bie a yɛbadwenle kɛ yɛ “amen” anwo ɛngyia kpalɛ, noko ɛhye ɛnle nɔhalɛ. Baebolo nwo encyclopedia ko ka kɛ, Nyamenle azonvolɛ dua “edwɛkɛkpɔkɛ ko ɛhye azo da bɛ anwodozo, mɔɔ bɛdie bɛ bɛto nu nee anyelazo mɔɔ bɛlɛ la ali.” Ɔrɛla ye kɛ, “amen” biala mɔɔ yɛbaha la bazɔ Gyihova anye.​—Edw. 19:14.