Ɛnɛ Bɔbɔ Ɛbahola Wɔanyia Anyelielɛ
MEKƐ bie bara mɔɔ yɛ nwo ɛnrɛdo yɛ, yɛnrɛyɛ mrelera yɛɛ yɛnrɛwu. Noko kɛkala ɛdeɛ, yɛ kɔsɔɔti yɛyia ngyegyelɛ. Kɛ ɔkɛyɛ na wɔanyia anyelielɛ wɔ ɛbɛlabɔlɛ nu ɛnɛ ɛ? Baebolo ne fa adehilelɛ mɔɔ bamaa wɔanyia ɛbɛlabɔlɛ mɔɔ yɛ anyelielɛ na ahunlundwolɛ wɔ nu la maa. Bɛmaa yɛzuzu ɛbɛlabɔlɛ nu ngyegyelɛ bie mɔ nee mɔɔ Baebolo ne ka ye wɔ nwo la anwo.
MAA Ɛ KUNLU ƐDWO Ɛ NWO
Baebolo ne folɛdulɛ: “Bɛmmamaa ezukoa nwo anyebolo ba bɛ ɛbɛlabɔlɛ nu, bɛmaa bɛ kunlu ɛdwo mɔɔ bɛlɛ ye la anwo.”—Hibuluma 13:5.
Ewiade ne fa ninyɛne ngakyile mɔɔ bɛsuzu kɛ ɔwɔ kɛ awie biala nyia la gyegye yɛ alehyenlɛ biala. Noko Baebolo ne ka kɛ ‘yɛmaa yɛ kunlu ɛdwo mɔɔ yɛlɛ ye la anwo.’ Kɛ ɔkɛyɛ na yɛayɛ ɛhye ɛ?
Mmayɛ “ezukoa nwo anyebolo.” Ɛnɛ, saa menli sɛkye bɛ kpɔkɛdelɛ, bɛ mbusua, bɛ gɔnwo mɔ, bɛ ɛbɛlabɔlɛ, nee gyinlabelɛ mɔɔ bɛlɛ la ɔlua “ezukoa” ti a ɔngyegye bɛ. (1 Timote 6:10) Ɔnle subane kpalɛ fee! Awieleɛ bɔkɔɔ ne, menli mɔɔ kulo ɛzukoa la “akunlu ɛndwo ɛlɛ.”—Nolobɔvo ne 5:10.
Menli nwo hyia tɛla ninyɛne. Nvasoɛ wɔ nwonane afoa nu ninyɛne zo ɛdeɛ, noko bɛnrɛhola bɛnrɛla ɛlɔlɛ ali anzɛɛ bɛnrɛboa yɛ; menli ala a bahola ayɛ zɔ a. Agɔnwolɛ kpalɛ mɔɔ yɛbanyia la bamaa yɛanyia ahunlundwolɛ wɔ ɛbɛlabɔlɛ nu.—Mrɛlɛbulɛ 17:17.
YƐMAA BAEBOLO NE KILE YƐ ADENLE A YƐBANYIA ANYELIELƐ WƆ ƐBƐLABƆLƐ NU
MEKƐ MƆƆ YƐNDE KPƆKƐ LA
Baebolo ne folɛdulɛ: “Ɛzelekɛ le ayile kpalɛ.”—Mrɛlɛbulɛ 17:22.
Ɛzelekɛ le kɛ “ayile kpalɛ” la, ɔboa ɔmaa yɛgyinla kpɔkɛdelɛ nwo ngyegyelɛ nloa. Noko kɛ ɔkɛyɛ na yɛ nye alie wɔ mekɛ mɔɔ yɛnde kpɔkɛ la ɛ?
Kile anyezɔlɛ. Saa yɛfa yɛ adwenle yɛsie yɛ ngyegyelɛ zo a, yɛbali nyane “mekɛ kɔsɔɔti.” (Mrɛlɛbulɛ 15:15) Baebolo ne tu yɛ folɛ kɛ ‘yɛhile anyezɔlɛ.’ (Kɔlɔsaema 3:15) Sukoa kɛ ɛbahile ninyɛne ngyikyingyikyi bɔbɔ anwo anyezɔlɛ. Sɛnzɛne mɔɔ ɛlɛkɔ ahɔdɔ, anwoma weɛlɛkɔkɔ yɛɛ kulovolɛ bie ɛzelekɛ maa ɛbɛlabɔlɛ yɛ anyelielɛ kpalɛ.
Yɛ ninyɛne boa awie mɔ. Saa yɛ kpɔkɛdelɛ ɛnle kpalɛ bɔbɔ a, yɛze kɛ ‘anyelielɛ dɔɔnwo wɔ ɛmaanlɛ nu tɛla ɛlielɛ.” (Gyima ne 20:35) Saa awie mɔ kile mɔɔ yɛyɛ la anwo anyezɔlɛ a, ɔmaa yɛ nye die, na ɔye yɛ adwenle ɔfi yɛ ngyegyelɛ ne mɔ azo. Saa yɛboa yɛmaa awie mɔ ɛbɛlabɔlɛ yɛ kpalɛ a, yɛ ɛdeɛ ne noko bayɛ kpalɛ.
MIEMIA WƆ AGYALƐ NE ANU
Baebolo ne folɛdulɛ: “Nwu ninyɛne mɔɔ hyia kpalɛ la.”—Felepaema 1:10.
Agyalɛma mɔɔ ɛnnyia mekɛ ɛmmaa bɛ nwo la agyalɛ kola sɛkye. Ɔwɔ kɛ kunlima nee yelɛma bu bɛ agyalɛ ne kɛ ninyɛne mɔɔ anwo hyia bɛ kpalɛ la anu ko.
Bɛyɛ ninyɛne bɛbɔ nu. Kɛ anrɛɛ ɛbayɛ ninyɛne mɔɔ anwo hyia ɛ ngome la, duzu ati a bɛnyɛ ngyehyɛleɛ bɛyɛ ninyɛne bɛmbɔ nu a? Baebolo ne ka kɛ: “Menli nwiɔ le kpalɛ tɛla sonla ko.” (Nolobɔvo ne 4:9) Bɛbahola bɛabɔ nu bɛado aleɛ, bɛakpundikpundi bɛ agbɔkɛ nu, bɛakpo ninyɛne anzɛɛ bɛalie bɛ nye.
Kile kɛ ɛkulo ɛ ye anzɛɛ ɛ hu. Baebolo ne tu agyalɛma folɛ kɛ bɛhulo bɛ nwo na bɛhile ɛbulɛ bɛmaa bɛ nwo. (Ɛfɛsɛsema 5:28, 33) Ninyɛne ngyikyi le kɛ ɛzelekɛ monvoo, atuuyɛlɛ anzɛɛ ahyɛlɛdeɛ ekyi kola maa agyalɛ nu mia kpalɛ. Eza ɔwɔ kɛ agyalɛma kakye kɛ bɛ mu nwiɔ ala a bɛkola bɛnyia nla nu ngitanwolilɛ a.—Hibuluma 13:4.