Nwane A Le Nyamenle?

Menli dɔɔnwo ka kɛ bɛdie Nyamenle bɛdi. Noko saa ɛbiza kɛ Nyamenle a le nwane a, ɛbanyia mualɛ ngakyile dɔɔnwo. Menli bie mɔ ka kɛ Nyamenle le ndɛnebuavolɛ mɔɔ ati yɛ se, na mɔɔ ɔkulo kɛ ɔyɛ ala a le kɛ ɔbahwe menli nzo wɔ bɛ ninyɛndane nwo. Bie mɔ noko ka kɛ Nyamenle lɛ ɛhulolɛ yɛɛ ɔfa ɛtane ɔkyɛ ɔnva nwo mɔɔ bɛyɛ la. Eza bie mɔ die di kɛ Nyamenle wɔ moamoa yɛɛ ɔndwenle yɛ nwo. Adwenle ngakyile ɛhye mɔ maa menli dɔɔnwo te nganeɛ kɛ bɛnrɛhola bɛnrɛnwu sonla holɛ mɔɔ Nyamenle de la.

Asoo nwolɛ hyia kɛ yɛbanwu sonla holɛ mɔɔ Nyamenle de la ɔ? Ɛhɛe. Saa yɛnwu sonla holɛ mɔɔ Nyamenle de la a, ɔbamaa yɛ ɛbɛlabɔlɛ agyinla kpɔkɛ zo. (Gyima ne 17:26-28) Ɛbikye Nyamenle kpalɛ a, ɔdaye noko ɔbahulo wɔ na yeaboa wɔ. (Gyemise 4:8) Awieleɛ bɔkɔɔ ne, Nyamenle mɔɔ yɛbanwu ye boɛ la bamaa yɛanyia dahuu ngoane.​—Dwɔn 17:3.

Kɛ ɔkɛyɛ na wɔanwu Nyamenle ɛ? Fa ɛ gɔnwo kpalɛ bie kɛ neazo. Kɛ ɔyɛle mɔɔ bɛyɛle agɔnwolɛma ɛ? Bie a ɛnwunle ye duma, ye subane, mɔɔ ɔkulo nee mɔɔ ɔngulo, mɔɔ yeyɛ anzɛɛ mɔɔ yebɔ kpɔkɛ kɛ ɔbayɛ, yɛɛ dɔɔnwo mɔɔ boka nwo la. Ɛhye a hwenle wɔ bikyele ye a​—ɛzukoale ɔ nwo debie.

Zɔhane ala a yɛbahola yɛanwu Nyamenle ɔlua ninyɛne ɛhye mɔ mɔɔ yɛbazuzu nwo la azo a:

• KƐ BƐFƐLƐ NYAMENLE Ɛ?

• KƐZI NYAMENLE DE Ɛ?

• DUZU A NYAMENLE ƐYƐ A?

• DUZU A ƆBAYƐ A?

• KƐZI NYAMENLE MƆƆ ƐBANWU YE KPALƐ LA BABOA WƆ Ɛ?

Magazine ɛhye bagyinla Baebolo ne azo abua kpuya ɛhye mɔ. Edwɛkɛ ɛhye mɔ baboa wɔ yeamaa wɔanwu sonla holɛ mɔɔ Nyamenle de nee mɔɔ saa ɛyɛ ɔ gɔnwo a ɔbayɛ yeamaa wɔ la.