Bɛdule Bɛ Nwo Bɛmaanle​—Wɔ Madagascar

SYLVIANA, adekpakyelɛnli bie mɔɔ wɔ ye ɛvolɛ 20 anu la ka kɛ: “Mɔɔ mendiele me gɔnwo mɔ mɔɔ bɛhɔboale wɔ ɛleka mɔɔ bɛhyia adekpakyelɛma dɔɔnwo anwubielɛ ne la, ɛnee mekulo kɛ me nye die kɛ bɛdabɛ la.” Ɔtoa zo kɛ: “Noko ɛnee mesulo kɛ menrɛhola menrɛboa wɔ ɛleka mɔɔ bɛhyia moalɛ dɔɔnwo la.”

Asoo ɔyɛ a ɛte nganeɛ kɛ Sylviana la? Ɛkulo kɛ ɛdawɔ noko ɛkɔboa wɔ ɛleka mɔɔ bɛhyia Belemgbunlililɛ nolobɔlɛma dɔɔnwo la, noko ɛngola ɛnnwu ye saa ɛbahola wɔadwu bodane zɔhane anwo ɔ? Saa ɔle zɔ a, ɛnee mmamaa ɛ sa nu to! Gyihova ɛboa mediema dɔɔnwo yemaa bɛli ngyegyelɛ mɔɔ ɛnee ɔmmaa bɛndɛlɛ bɛ ɛzonlenlɛ gyima ne anu la azo. Amaa yɛanwu kɛzi Gyihova boale bie mɔ la, yɛbahɔ Madagascar mɔɔ le bɔra kpole mɔɔ tɔ zo nna wɔ ewiade la.

Wɔ ɛvolɛ bulu mɔɔ ɛpɛ nu la anu, nolobɔlɛma mɔɔ bo 70 nee adekpakyelɛma mɔɔ bɛvi maanlea 11 azo la ɛraboa wɔ Africa azɛlɛsinli ɛhye mɔɔ bɛtie edwɛkɛ ne kpalɛ na menli dɔɔnwo bu Baebolo ne la anu. Eza nolobɔlɛma dɔɔnwo mɔɔ bɛvi ɛkɛ la ɛnyia ɛhulolɛ kɛ bɛbaha Belemgbunlililɛ edwɛkɛ ne wɔ ɛleka gyɛne mɔɔ wɔ bɔra kpole ɛhye azo la. Bɛmaa yɛzuzu bie mɔ anwubielɛ ne anwo.

BƐLILE ƐZULOLƐ NEE BƐSANUDOLƐ ZO

Louis nee Perrine, agyalɛma bie mɔɔ bɛwɔ bɛ ɛvolɛ 30 ne anu la vile France hɔle Madagascar. Bɛvale ɛvolɛ dɔɔnwo bɛdwenlenle kɛzi bɛbadu bɛahɔ maanle gyɛne zo amaa bɛadɛlɛ bɛ ɛzonlenlɛ gyima ne anu la anwo, noko Perrine hwehwenle ɔ bo azo kɛ ɔbahɔ. Ɔka kɛ: “Ɛnee mesulo kɛ mebahɔ ɛleka mɔɔ menze ɛkɛ la. Ɛnee ɔgyegye me kɛ mebagyakyi me abusua, asafo, sua, ɛleka ngakyile mɔɔ meze ɛkɛ nee ninyɛne mɔɔ yɛyɛ ye dahuu la ɛkɛ. Nɔhalɛ nu, adwenleadwenle a ɛnee le me ngyegyelɛ mɔɔ ɔwɔ kɛ medi zo a.” Perrine nyianle akɛnrasesebɛ na ɔ nee Louis hɔle wɔ 2012. Kɛzi ɔte nganeɛ wɔ bɛ kpɔkɛzilɛ ne anwo ɛ? “Saa mekakye mɔɔ yɛyɛ la a, mekola meka kɛ Gyihova asa mɔɔ yɛnwu ye wɔ yɛ ɛbɛlabɔlɛ nu la ɛmaa yɛ diedi nu ɛmia.” Louis toa zo kɛ: “Fa Ngakyelɛlilɛ mɔɔ yɛlimoa yɛhɔle ye wɔ Madagascar la kɛ neazo, yɛ Baebolo sukoavoma bulu a rale a!”

Duzu a boale agyalɛma ne maanle bɛdoale bɛ gyima ne azo wɔ mekɛ mɔɔ bɛyiale ngyegyelɛ la ɛ? Bɛzɛlɛle Gyihova kɛ ɔmaa bɛ anwosesebɛ amaa bɛagyinla ɔ nloa. (Fel. 4:13) Louis ka kɛ: “Gyihova buale yɛ asɔneyɛlɛ ne na ɔmaanle yɛnyianle ‘Nyamenle anzodwolɛ ne.’ Yɛholale yɛvale yɛ adwenle yɛziele kɛzi yɛ ɛzonlenlɛ gyima ne ɛlɛmaa yɛ nye alie la azo. Bieko, agɔnwolɛma mɔɔ bɛwɔ yɛ sua zo la luale e-mails nee ngɛlata ɛhɛlɛlɛ zo maanle yɛ anwosesebɛ kɛ yɛdoa zo.”​—Fel. 4:6, 7; 2 Kɔl. 4:7.

Gyihova yilale Louis nee Perrine kɛ bɛgyinlanle kpundii la. Louis ka kɛ: “Wɔ October 2014, yɛhɔle Kilisiene Agyalɛma Baebolo Sukulub ne mɔɔ bɛyɛle ye wɔ France la bie. Sukulu zɔhane mɔɔ yɛhɔle bie la le ahyɛlɛdeɛ mɔɔ vi Gyihova ɛkɛ mɔɔ yɛ rɛle ɛnrɛvi ye ɛlɛ a.” Mɔɔ agyalɛma ne wiele la, ɔyɛle bɛ fɛ kɛ bɛ nee bɛ hɔle Madagascar bieko la.

“YƐBAVA BƐ YƐADU YƐ NWO!”

Mɔɔ Didier nee Nadine, agyalɛma bie mɔɔ bɛvi France hɔle Madagascar wɔ 2010 la, ɛnee bɛwɔ bɛ ɛvolɛ 50 ne anu. Didier ka kɛ: “Yɛyɛle adekpakyelɛ wɔ mekɛ mɔɔ ɛnee yɛle mgbavolɛ nee mbɛlɛra la, na yɛtetele ngakula nsa. Mɔɔ bɛyɛle mgbanyinli la yɛzuzule nwo saa yɛbahola yɛazonle wɔ maanle gyɛne zo a.” Nadine ka kɛ: “Me mra ne mɔ mɔɔ mebagyakyi bɛ ɛkɛ meahɔ maanle gyɛne zo la maanle mendwehwenle me bo aze, noko bɛzele yɛ kɛ: ‘Saa bɛkɔboa wɔ ɛleka mɔɔ bɛhyia moalɛ wɔ maanle gyɛne zo a, yɛbava bɛ yɛadu yɛ nwo!’ Mɔɔ bɛhanle la maanle yɛ anwosesebɛ, ɔti yɛhɔle. Yɛ nee yɛ mra ne mɔ ɛnde ɛdeɛ, noko ɔyɛ yɛ fɛ kɛ dahuu yɛ nee bɛ tendɛ la.”

Ɛnee ɔnla aze ɔmmaa Didier nee Nadine kɛ bɛbazukoa Malagasy aneɛ ne. Nadine vale ɛzelekɛ hanle kɛ, “Yɛbo ɛvolɛ 20 dɛbadɛba.” Kɛzi bɛdwule bɛ bodane nwo ɛ? Mɔlebɛbo ne, bɛhɔle asafo mɔɔ bɛka Fenlanze aneɛ la anu. Nzinlii mɔɔ ɛnee bɛkulo kɛ bɛsukoa ɛkɛ ne aneɛ ne la, bɛhɔle asafo mɔɔ bɛka Malagasy aneɛ la anu. Nadine ka kɛ: “Menli dɔɔnwo mɔɔ yɛyia bɛ wɔ daselɛlilɛ nu la kulo kɛ bɛsukoa Baebolo ne. Bɛta bɛyɛ yɛ mo kɛ yɛrakpɔlale bɛ la. Alimoa ne, ɔyɛle me kɛ ɛnee melɛka ɛlalɛ la. Me nye die kɛ mebayɛ adekpakyelɛ gyima ne wɔ azɛlɛsinli ɛhye anu. Medwazo nwonlomɔ nu a, meka kɛ, ‘Ɔyɛ me fɛ kɛ ɛnɛ noko mebahɔ daselɛlilɛ la!’”

Mɔɔ Didier hakyele kenle mɔɔ ɔbɔle ɔ bo kɛ ɔsukoa Malagasy aneɛ ne la, ɔzelele. “Ɛnee melɛnea asafo debiezukoalɛ bie azo, noko ɛnee mende mualɛ mɔɔ mediema ne mɔ ɛlɛmaa la abo. Mɔɔ mekola meka la a le, ‘Mo.’ Mɔɔ menyɛle adiema raalɛ ko mɔɔ maanle mualɛ mo menwiele la, mediema mɔɔ de ɔ nzi la dole me ɛsalɛ kɛ mualɛ ne ɛnle kpalɛ. Ɛkɛ ne ala menvɛlɛle adiema nrenyia ko, na ɔbuale ye fɔɔnwo​—medie medi kɛ ɔyɛle ye zɔ.”

ƆVALE ANYELIELƐ ƆLIELE ƐSALƐDOLƐ NE AZO

Thierry nee ɔ ye Nadia nleanle drama bie mɔɔ bɛyɛle ye wɔ 2005 nyianu ne abo mɔɔ ɔti ne se, “Fa Ninyɛne Mɔɔ Wula Nyamenle Anyunlunyia La Sie Ɛ Nye Zo.” Baebolo nu drama zɔhane mɔɔ fale Timote anwo la hanle bɛ ahonle na bɛnyianle ɛhulolɛ kɛ bɛbaboa wɔ ɛleka mɔɔ bɛhyia Belemgbunlililɛ nolobɔlɛma dɔɔnwo la. Thierry ka kɛ: “Bɛyɛle drama ne bɛwiele na yɛlɛbɔ yɛ sa nu la, menvale me ti mengɔle me ye anzo anwo na membizale ye kɛ, ‘Nienwu a yɛbahɔ a?’ Me ye hanle kɛ ɛnee ɔlɛdwenle deɛ ko ne ala anwo.” Yeangyɛ, bɛbɔle ɔ bo kɛ bɛyɛ bɛ bodane ne anwo gyima. Nadia ka kɛ, “Yɛdele ninyɛne mɔɔ yɛlɛ la azo ngyikyingyikyi yɛmaanle ɔhɔle baage nna ala anu!”

Bɛdwule Madagascar wɔ 2006 la, ɛkɛ ne ala bɛ nye liele daselɛlilɛ gyima ne anwo. Nadia ka kɛ, “Menli mɔɔ yɛyia bɛ la maa yɛ nye die somaa.”

Noko, ɛvolɛ nsia anzi, agyalɛma ne yiale ngyegyelɛ. Nadia mame, Marie-Madeleine mɔɔ ɔvi France la dɔle aze, na ɔ sa bule yɛɛ ɔ ti bodale. Mɔɔ agyalɛma ne nee Marie-Madeleine dɔketa ne lile ngitanwo wiele la, bɛzele bɛ mame kɛ ɔradɛnla bɛ nwo wɔ Madagascar. Ɛnee yenyia ɛvolɛ 80 ɛdeɛ, noko ɔvale anyelielɛ ɔliele ɔdole nu na ɔhɔle. Kɛzi ɔte nganeɛ wɔ maanle gyɛne zo mɔɔ ɔde la anwo ɛ? Ɔka kɛ: “Ɔyɛ a, me nwo kyele me, noko ɔnva nwo kɛ menlɛ anwosesebɛ la, mete nganeɛ kɛ me nwo hyia wɔ asafo ne anu. Mɔɔ maa me nye die kpole la a le kɛ, ɛke mɔɔ mede la maa me mra ne mɔ nyia adenle toa bɛ ɛzonlenlɛ gyima ne mɔɔ ɛlɛso ma la azo.”

“MENDELE NGANEƐ KƐ GYIHOVA ƐLƐBOA ME”

Riana le adiema nrenyia mɔɔ ɔwɔ ye ɛvolɛ 20 ne anu. Ɔnyinle wɔ Alaotra Mangoro maanzinli bie mɔɔ ye azɛlɛ ne kye aleɛ wɔ Madagascar aduduleɛ la. Ɛnee ɔze debie wɔ sukulu la ati, ɔnyianle ɛhulolɛ kɛ ɔbazukoa nwoma kpole. Noko, ɔzukoale Baebolo ne la, ɔhakyile ye adwenle. Ɔka kɛ: “Ɛnee mekulo kɛ mewie sukunwiɔ ndɛndɛ, na membɔle Gyihova ɛwɔkɛ kɛ, ‘Saa mepɛ me sɔnea ne mɔɔ li awieleɛ la a mebabɔ adekpakyelɛ gyima ne abo.’” Riana wiele sukulu la, ɔlile ye ɛwɔkɛ zo. Ɔhɔdɛnlanle adiema nrenyia bie mɔɔ le adekpakyelɛnli la anwo, ɔnyianle gyima mɔɔ bɛfa mekɛ foa bɛyɛ la na ɔbɔle adekpakyelɛ gyima ne abo. Ɔka kɛ, “Ɛhye a le kpɔkɛ kpalɛ mɔɔ menzile a.”

Noko, Riana mbusuafoɔ ande ɔ bo kɛ yeanva nwoma kpole ɛzukoalɛ yeanzie ɔ nye zo la. Ɔka kɛ: “Me papa, ɔ diema nrenyia nee ɔ diema raalɛ kakula amuala zile me adua kɛ menzukoa nwoma kpole. Noko ɛnee mengulo kɛ megyakyi adekpakyelɛ gyima ne.” Yeangyɛ, Riana nyianle ɛhulolɛ kɛ ɔbaboa wɔ ɛleka mɔɔ bɛhyia gyimayɛvoma dɔɔnwo la. Duzu a maanle ɔnyianle ɛhulolɛ ɛhye a? Ɔka kɛ: “Nwulema bule yɛ sua na bɛwuale me ninyɛne dɔɔnwo. Yemɔ maanle mengakyele Gyisɛse edwɛkɛ ne mɔɔ se, yɛkpondɛ yɛ anwonyia ‘yɛzie anwuma’ la. Menzile kpɔkɛ kɛ mebabɔ mɔdenle meakpondɛ sunsum nu anwonyia.” (Mat. 6:19, 20) Ɔhɔle maanle ne nyiakɛ​—ɛleka mɔɔ ezule ɛnda ɛndɔ la, na ɔvi ɛleka mɔɔ ɛnee ɔde mɔɔ kɔ ɛkɛ la bayɛ mayɛle 800 (km 1,300). Antandroyma a de maanzinli ɛhye anu a. Duzu ati a ɔhɔle ɛkɛ a?

Riana bɔle ɔ bo kɛ ɔ nee Antandroy mrenyia nwiɔ sukoa Baebolo ne la, ye siane ko yɛɛ bɛwuale bɛ a. Ɔzukoale edwɛkɛ agbɔkɛ bie mɔ wɔ bɛ aneɛ nu na ɔdwenlenle Antandroyma mɔɔ bɛtɛtele Belemgbunlililɛ edwɛkɛ ne la anwo. Ɔka kɛ, “Menzɛlɛle Gyihova kɛ ɔboa me ɔmaa mengɔdɛnla Tandroyma maanzinli ne anu.”

Riana hɔle, na ɛkɛ ne ala ɔyiale ngyegyelɛ. Ɛnee ɔnnyia gyima. Nrenyia bie bizale ye kɛ: “Kɛmɔti a wɔra ɛke ɛ? Menli mɔɔ wɔ ɛke la kɔkpondɛ gyima wɔ ɛleka mɔɔ ɛvi ɛrale la!” Riana nyianle dapɛne nwiɔ wɔ ɛkɛ la, ɔhɔle maanzinli nyianu bie mɔɔ ɛnee asɛɛ ye ezukoa ɛwie mɔɔ ɔnnwu mɔɔ ɔyɛ a. Wɔ kenle mɔɔ li awieleɛ la, adiema nrenyia ko vale debie wulale Riana tɛladeɛ ne kodoku nu. Ɛnee ɔle ezukoa kpole mɔɔ bahola amaa yeazia yeahɔ Antandroy na yeabɔ yogurt ɛdɔnenlɛ bo wɔ ɛkɛ a. Riana ka kɛ: “Mendele nganeɛ kɛ Gyihova a ɛlɛboa me a. Mengɔle zo memboale bɛdabɛ mɔɔ bɛtɛsukoale Gyihova anwo debie ɛlɛ la!” Ɛnee me gyimalilɛ zonle wɔ asafo ne anu. Riana toa zo kɛ: “Bɛmaa memaa bagua nu ɛdendɛlɛ dapɛne biala. Ɛnee Gyihova ɛlɛdua ye ahyehyɛdeɛ ne azo atete me.” Ɛnɛ, Riana tɛka Belemgbunlililɛ edwɛkɛ ne tɛkile Tandroyma mɔɔ bɛkulo kɛ bɛsukoa Gyihova anwo debie la.

‘NƆHAVO NYAMENLE NE YILALE YE’

Gyihova ɛbɔ yɛ ɛwɔkɛ kɛ ‘awie biala mɔɔ kpondɛ nyilalɛ maa ɔ nwo wɔ maanle ne anu la bava Nɔhalɛ Nyamenle ne ayila ɔ nwo.’ (Aye. 65:16) Saa yɛbɔ mɔdenle yɛdi yɛ ngyegyelɛ zo na yɛtɛlɛ yɛ ɛzonlenlɛ gyima ne anu a, ɔmaa yɛnyia Gyihova nyilalɛ. Fa Sylviana, mɔɔ yɛlimoa yɛhanle ɔ nwo edwɛkɛ wɔ edwɛkɛ ɛhye mɔlebɛbo ne la kɛ neazo. Kakye kɛ, ɛnee ɔsulo kɛ ɔnrɛhola ɔnrɛboa wɔ ɛleka mɔɔ bɛhyia moalɛ dɔɔnwo la. Duzu ati a ɔnyianle adwenle ɛhye a? Ɔka kɛ: “Me gyakɛ fema ne wale tɛla bɛne ne kɛyɛ enkyi nsa nee foa (cm 9). Ɔti metia metɔ zo na ɔngyɛ ɛnee mevɛ.”

Noko wɔ 2014, Sylviana nee Sylvie Ann, adekpakyelɛnli bɛlɛra bie mɔɔ wɔ ye asafo ne anu la hɔle namule ekyi bie mɔɔ ɔvi bɛ sua zo mɔɔ kɔ ɛkɛ la le mayɛle 53 (km 85) la. Ɔnva nwo kɛ Sylviana lɛ ngyegyelɛ la, ɔdwule ye bodane nwo​—na nea kɛzi bɛyilale ye la! Ɔka kɛ, “Menyɛle daselɛlilɛ gyima ne ɛvolɛ ko wɔ ɛke la, bɛzɔnenle me Baebolo sukoavo Doratine, bɛlɛra bie mɔɔ le ninli la wɔ yɛ maangyebakyi nyianu bie abo.”

“MEBABOA BƐ”

Kɛ mɔɔ bɛdabɛ mɔɔ bɛkɔboa ɛleka mɔɔ bɛhyia moalɛ nwo anwubielɛ ne kile la, saa yɛbɔ mɔdenle yɛdi yɛ ngyegyelɛ zo na yɛyɛ dɔɔnwo wɔ yɛ ɛzonlenlɛ gyima ne anu a, ɔmaa yɛnwu kɛ ɛwɔkɛ mɔɔ Gyihova ɛbɔ ye azonvolɛ la le nɔhalɛ: “Mebamaa bɛ anwosesebɛ, mebaboa bɛ.” (Aye. 41:10) Ɛhye maa yɛ nee Gyihova agɔnwolɛvalɛ ne anu mia kpalɛ. Bieko, saa yɛtu yɛ nwo yɛmaa yɛboa wɔ ɛleka mɔɔ yɛde anzɛɛ maanle gyɛne zo a​—ɔsiezie yɛ ɔmaa teokelase gyima mɔɔ la yɛ nyunlu wɔ ewiade fofolɛ ne anu la. Didier mɔɔ yɛlimoa yɛha ɔ nwo edwɛkɛ la ka kɛ, “saa yɛkɔboa wɔ ɛleka mɔɔ bɛhyia moalɛ la a, ɔsiezie yɛ kpalɛ ɔmaa kenle bie!” Ɔrɛla ye kɛ, gyimayɛvoma dɔɔnwo bɛabɔ zɔhane ndetelɛ ne abo ndɛndɛ!